ពលរដ្ឋខេត្តស្វាយរៀងមកជួបជុំគ្នានៅព្រៃសហគមន៍
ស្វាយរៀងៈ អាជ្ញាធរស្រុករមាសហែកបានចេញលិខិតហាមមិនឲ្យតំណាងប្រជាពលរដ្ឋ ចំនួន៤រូបនៅក្នុងឃុំក្រសាំង ស្រុករមាសហែក ខេត្តស្វាយរៀង ដែលមានទំនាស់ដីធ្លីជាមួយក្រុមហ៊ុនចម្ការកៅស៊ូមិត្តភាព ធ្វើការប្រមូលផ្តុំគ្នាដើម្បីសុំបង្កើតព្រៃសហគមន៍របស់ពួកគេ ព្រោះជាសកម្មភាពអនាធិបតេយ្យខុសច្បាប់រដ្ឋ។
នៅក្នុងលិខិតដែលបានចេញដោយលោក ហែម សុគន្ធ អភិបាលស្រុករមាសហែកបានឲ្យដឹងថា តំណាងប្រជាពលរដ្ឋនៅឃុំក្រសាំងចំនួនបួនរូបដែលមានឈ្មោះ ចាប សុផាត ប៊ូ សាមុត ណិប ធឿន សួន សីហា សូមបញ្ឈប់សកម្មភាពដែលជាហេតុនាំឲ្យប៉ះពាល់ សន្តិសុខ សណ្តាប់ធ្នាប់សង្គម ការសុំបង្កើតព្រៃសហគមន៍របស់ប្រជាពលរដ្ឋកន្លងទៅគឺពុំទាន់មានការ ទទួលស្គាល់ជាផ្លូវច្បាប់នៅឡើយទេ។ លោកបានបញ្ជាក់ថា៖ «សកម្មភាពដែលបានធ្វើកន្លងទៅដូចជា ការហែក្បួន ការបោះព្រំដី មិនបានស្តាប់ការអប់រំណែនាំរបស់អាជ្ញាធរមូលដ្ឋាន សកម្មភាពបែបនោះគឺជាសកម្មភាពអនាធិបតេយ្យខុស នឹងច្បាប់របស់រដ្ឋយើង»។
លោកចាប សុផាត តំណាងពលរដ្ឋដែលត្រូវបានហាមមិនឲ្យជួបជុំគ្នានោះបានឲ្យដឹងថា លោកមិនយល់អំពីលិខិតរបស់លោកអភិបាលស្រុកដែលបានចេញហាមរូបគាត់ និងពលរដ្ឋផ្សេងទៀតមិនឲ្យការពារព្រៃសហគមន៍នោះទេ។ លោកមិនដឹងថាលោកអភិបាលរូបនោះគាត់ចង់ធ្វើអ្វីនោះទេ។ លោកបានឲ្យដឹងថា៖ «ពលរដ្ឋដែលនាំគ្នាពុះពារថែរក្សាព្រៃបែរជាត្រូវបានគេហាមទៅ វិញ ចុះហេតុអ្វីក៏លោកអភិបាលស្រុកមិនទៅហាមក្រុមហ៊ុនដែលគេឈូស ព្រៃម៉េចក៏មិនចេញលិខិតឲ្យគេឈប់ឈូសព្រៃផង»។
លោកបានឲ្យដឹងថា លោកនឹងមិនបញ្ឈប់សកម្មភាពក្នុងការការពារព្រៃនិងថែរក្សាព្រៃនោះទេ ប្រសិនអាជ្ញាធរនៅមិនទាន់សម្រេចថាព្រៃនោះត្រូវបានថែរក្សាទុក។ លោកបានឲ្យដឹងទៀតថា៖«ខ្ញុំគ្មានធ្វើអ្វីខុសច្បាប់ឬនោះទេ ខ្ញុំគ្រាន់តែការពារព្រៃប៉ុណ្ណោះ»។
លោក ប៊ូ សាមុត តំណាង ពលរដ្ឋបានឲ្យដឹងថា អាជ្ញាធរប្រហែលជាមានគោលបំណងអ្វីមួយក្នុងការហាមពួកលោកដែលជា តំណាងនោះវាអាចមានអ្វីផ្សេងនៅពីក្រោយការហាមនោះ ពីព្រោះអីទង្វើរបស់ពលរដ្ឋដែលគ្រាន់តែការពារព្រៃនោះវាមិនមានអី្វ ទៅប៉ះពាល់សន្តិសុខសណ្តាប់ធ្នាប់នោះទេ។ លោកបានឲ្យដឹងថា ៖ «ខ្ញុំមិនខ្លាចចំពោះការចេញលិខិតនោះទេ ហើយក៏មិនបាច់គំរាមដែរ ខ្ញុំនឹងធ្វើការការពាររហូតដល់ពួកខ្ញុំទទួលបានព្រៃនោះមក ថែរក្សាជាសម្បត្តិរួមនៅក្នុងសហគមន៍»។
ប្រជាពលរដ្ឋ ១០ភូមិ នៅឃុំក្រសាំង ស្រុករមាសហែក ខេត្តស្វាយរៀង ដែលមានទំនាស់ដីធ្លីជាមួយក្រុមហ៊ុនចម្ការកៅស៊ូមិត្តភាពបាន ធ្វើការស្នើសុំទៅអាជ្ញាធរលើផ្ទៃដីចំនួន៥០០ហិកតាដើម្បីរក្សាព្រៃ សហគមន៍ចាប់តាំងពីខែ មករា ឆ្នាំ ២០០៦។
លោក ហែម សុគន្ធ អភិបាលស្រុករមាសហែកបានមានប្រសាសន៍ឲ្យដឹងថា មូលហេតុដែលលោកចេញនូវលិខិតនោះដោយសារតែឃើញភាពអនាធិបតេយ្យពេក ហើយពួកគេមិនស្តាប់ការហាមប្រាមរបស់អាជ្ញាធរដើរហែក្បូនធ្វើឲ្យមានចលាចលក្នុងសង្គមពីព្រោះដីព្រៃសហគមន៍របស់គេពុំទាន់ទទួលស្គាល់តាមផ្លូវច្បាប់ទេ។
លោកបានឲ្យដឹងទៀតថា៖ «ចេតនារបស់ពលរដ្ឋទាំងនោះគ្រាន់តែចង់បានដីនោះហើយយកមកវាស់វែង ចែកគ្នាតែប៉ុណ្ណោះ។ ខ្ញុំគាំទ្រនូវឆន្ទៈរបស់ពួកគេដែលចង់ការពារព្រៃ ប៉ុន្តែនៅកន្លែងនោះគ្មានព្រៃទេមានតែស្មៅ។ ខ្ញុំស្រឡាញ់ប្រជាពលរដ្ឋ តែពលរដ្ឋត្រូវចេះគោរពអាជ្ញាធរផង»។
លោក ចាន់ សុវ៉េត មន្ត្រីស៊ើបអង្កេតជាន់ខ្ពស់អង្គការសិទ្ធិមនុស្សអាដហុកបានថ្លែងថា នៅក្នុងលិខិតរបស់លោកអភិបាលស្រុកដែលបានចេញហាមពលរដ្ឋមិនឲ្យ ប្រជុំគ្នាធ្វើអ្វីមួយនោះគឺជាការគំរាមមកលើពលរដ្ឋពីព្រោះនៅ ក្នុងប្រទេសប្រកាន់លទ្ធិប្រជាធិបតេយ្យគឺពលរដ្ឋមានសិទ្ធិសម្តែង មតិតវ៉ា ពីព្រោះសិទ្ធិរបស់គេត្រូវបានចែងនៅក្នុងរដ្ឋធម្មនុញ្ញ របស់កម្ពុជា៕
No comments:
Post a Comment
yes