លោក ជា មុនី នៅក្នុងសកម្មភាពកូដកម្ម កម្មករកន្លងមក
ភ្នំពេញៈ លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា កាលពីថ្ងៃអាទិត្យបានជួបជាមួយតំណាងសហជីពជាង៧០ផ្សេងគ្នាមកពី រោងចក្រ ៣៥ រោងចក្រ បានបដិសេធមិនទទួលយកប្រាក់អត្ថប្រយោជន៍ថ្មីចំនួន ១០ ដុល្លារ ដែលបានឯកភាពពីក្រសួងការងារនោះទេ ហើយគំរាមធ្វើកូដកម្មដ៏ធំ បើចំនួនទឹកប្រាក់នេះមិនត្រូវបានដំឡើងឲ្យសមរម្យ។ នេះបើយោងតាមមន្រ្តីសហជីពបានអះអាងឲ្យដឹង។
លោក ជា មុនី ថ្លែងថា ចំនួនទឹកប្រាក់ផ្តល់ឲ្យកាលពីថ្ងៃទី១១ ខែកក្កដា ដោយគណៈកម្មការប្រឹក្សាការងារដែលនឹងចូលជាធរមានចាប់ពីថ្ងៃទី១ កញ្ញា ខាងមុខនេះ គឺជាចំនួនតិចតួច។ លោកបានលើកឡើងពីបញ្ហាដែលកម្មករកំពុងជួបប្រទះការចំណាយកើន ឡើងក្នុងការរស់នៅ ហើយក៏បានស្នើសុំជួបជជែកទ្វេភាគីជាមួយសមាគមរោងចក្រកាត់ ដេរនៅកម្ពុជា ដើម្បីពិភាក្សាពីបញ្ហាអត្ថប្រយោជន៍កម្មករនេះ។
លោកបន្តថា៖ «ខ្ញុំចង់បញ្ជាក់ថា សេចក្តីសម្រេចរបស់ក្រុមប្រឹក្សាការងារនៅមានបញ្ហា ហើយធ្វើឲ្យកម្មករលំបាក ព្រោះវាតិចពេក។ យើងមិនអាចទទួលយកបានទេ ខ្ញុំនៅតែមិនទាន់សុខចិត្ត»។
លោក ជា មុនី អះអាងថា ការផ្តល់ឲ្យរបស់គណៈកម្មការប្រឹក្សាការងារគួរតែកៀកទៅនឹង ចំនួនដែលផ្តល់ឲ្យកម្មករនៅក្រុងបាវិត ដែលក្នុងនោះកម្មករត្រូវបានផ្តល់ឲ្យនូវប្រាក់ថ្លៃសោហ៊ុយ ធ្វើដំណើរ និងថ្លៃស្នាក់នៅ១០ដុល្លារ ប្រាក់រង្វាន់ការងារទៀងទាត់១០ដុល្លារក្នុងមួយខែ និងប្រាក់ថ្ងៃបុណ្យ។
លោកថ្លែងថា៖ «ខ្ញុំបានផ្ញើលិខិតមួយទៅសមាគមរោងចក្រកាត់ដេរនៅកម្ពុជា ដើម្បីស្នើសុំពិភាក្សាការទាមទារអត្ថប្រយោជន៍បន្ថែម សម្រាប់កម្មករ ហើយយើងនឹងធ្វើកូដកម្មដ៏ធំមួយ បើសិនពុំមានដំណោះស្រាយទេ»។ លោកបន្ថែមថា លោកបានស្នើថា ការជជែកទ្វេភាគីនោះ គួរតែធ្វើឡើងនៅក្នុងខែសីហាខាងមុខ។
តំណាងកម្មករ និងសមាជិកសហជីពសេរីកម្មករកម្ពុជា អ្នកនាង ជាង ធីតា និយាយថា កម្មករបានប្រាប់ពីការដំឡើងថ្លៃជួលផ្ទះ ដែលម្ចាស់ផ្ទះដំឡើងខ្ពស់ជាងទឹកប្រាក់អត្ថប្រយោជន៍ដែលទើប ផ្តល់ឲ្យថ្មីៗនេះ ហើយចាំបាច់ត្រូវមានអន្តរាគមន៍ពីរដ្ឋាភិបាលចំពោះករណីនេះ។
ធីតាបានបន្តថា៖ «ម្ចាស់ផ្ទះតែងតែឆ្លៀតកេងយកចំណេញពីអត្ថប្រយោជន៍ដែលត្រូវបាន ផ្តល់ឲ្យទៅកម្មករជានិច្ច នៅពេលណាពួកកម្មករទទួលបាននូវអត្ថប្រយោជន៍ណាមួយ» ហើយថា «ពួកគេដំឡើងការចំណាយលើថ្លៃជួល... ខណៈយើងបានព្យាយាមទាមទារអត្ថប្រយោជន៍អស់ពេលជាយូរមកហើយ»។
អ្នកនាង ធីតា បានបញ្ជាក់ទៀតថា កម្មករបានត្រៀមខ្លួនរួចជាស្រេចហើយដើម្បីធ្វើកូដកម្ម ដោយរង់ចាំលទ្ធផលនៃការជួបចរចាគ្នានៅថ្ងៃទី២ ខែសីហា ជាមួយតំណាងរោងចក្រ ដែលអ្នកនាងសុំមិនប្រាប់ឈ្មោះដោយសារខ្លាចថា នឹងអាចប៉ះពាល់ដល់ការចរចាគ្នា៕
No comments:
Post a Comment
yes