លោក រ៉ុង ឈុន ក្នុងការចូលរួមធ្វើកូដកម្ម ជាមួយកម្មកររោងចក្រតៃយ៉ាងកន្លងមក
កណ្តាលៈ សមាគមរោងចក្រកាត់ដេរកម្ពុជា(GMAC)បានថ្កោលទោសកូដកម្មរយៈពេល៥ សប្ដាហ៍នៅឯរោងចក្រតៃយ៉ាង(Tai Yang)និងរោងចក្រកាត់ដេរខាំវ៉ែល (Camwell) នៅក្នុងខេត្តកណ្ដាលថា វាជាការកុហកភូតភរអំពីការផ្លាស់ប្ដូរយីហោខុសច្បាប់ពីសហជីព។
នៅក្នុងសេចក្ដីថ្លែងការណ៍ចេញកាលពីថ្ងៃសៅរ៍ អគ្គលេខាធិការសមាគម GMAC លោក ខេន លូ បានកត់សម្គាល់ថា រោងចក្រតៃយ៉ាងមិនបានផ្លាស់ប្ដូរឈ្មោះ ទៅជាឈ្មោះ តៃណាន ទេ កាលពីឆ្នាំ ២០១០ និងថា វាជាការចោទប្រកាន់ដែលនាំឲ្យកម្មកររហូតដល់៤ពាន់នាក់នាំ គ្នាធ្វើកូដកម្ម តាំងតែពីថ្ងៃទី២៥ មិថុនា មក ហើយថា រដ្ឋាភិបាលនិងសមាគមរោងចក្រកាត់ដេរកម្ពុជា មានឯកសារសម្រាប់ការបញ្ជាក់រឿងនេះ។
សេចក្ដីថ្លែងការណ៍នេះឲ្យដឹងដែរថា៖ «រោងចក្រទាំងបីនេះ( រោងចក្រ តៃយ៉ាង ខាំវ៉ែល និងតៃណាន)គឺជាសមាជិករបស់ សមាគមរោងចក្រកាត់ដេរកម្ពុជាតាំងពីមានការរួមបញ្ចូលគ្នា ហើយបានបន្តនូវសមាជិកភាព ក្នុងសមាគម GMAC រហូតមកដល់សព្វថ្ងៃនេះ ហើយក៏មិនដែលមានភាពច្របូកច្របល់ណាមួយពីបញ្ហានេះដែរ ខណៈយើងបានចុះបញ្ជីក្រុមហ៊ុនទាំងបីនេះពីក្រសួងរដ្ឋាភិបាលដែល ពាក់ព័ន្ធ»។
ប៉ុន្តែ កម្មករបានអះអាងផ្ទុយថា រោងចក្រតៃយ៉ាង ដែលនៅជិតរោងចក្រខាំវ៉ែល ក្នុងស្រុកអង្គស្នួល បានប្តូរឈ្មោះដើម្បីរោងចក្រអាចគេចផុតពីការផ្ដល់ប្រាក់អតីត ភាពដល់កម្មករ។
ទោះជាយ៉ាងណា លោក ខេន លូ បានថ្លែងថា៖ «សហព័ន្ធសហជីពកម្ពុជា បានធ្វើឲ្យកម្មករមានការចងចាំខុសនូវ«ការចោទប្រកាន់មិនត្រឹម ត្រូវ»នេះ ហើយនិងការបំផ្លើសពីចំនួនកម្មករធ្វើកូដកម្ម»។
សេចក្ដីថ្លែងការណ៍របស់លោក លូ បានលើកឡើងថា ៖ «សហព័ន្ធសហជីពកម្ពុជា គឺជាអង្គការមិនស្របច្បាប់ក្រោមការគ្រប់គ្រងផ្នែករដ្ឋបាលណា មួយ។ វាប្រាកដណាស់ថា សហព័ន្ធសហជីពកម្ពុជា គឺមិនបានចុះបញ្ជីជាសហជីពក្នុងរោងចក្រតៃយ៉ាង ឬរោងចក្រខាំវ៉ែលនោះទេ»។
ប្រធានសហព័ន្ធសហជីពកម្ពុជា លោក រ៉ុង ឈុន ដែលមានវត្តមានក្នុងការតវ៉ាជាច្រើន លើក រួមទាំងការតវ៉ាមួយដែលក្មួយប្រុសរបស់លោក គឺលោក រ៉ុង បញ្ញា បានរងរបួសនៅក្នុងការប៉ះទង្គិចគ្នាជាមួយនឹងកងកម្លាំងនគរបាល កាលពីថ្ងៃទី១១ ខែកក្កដា បានច្រានចោលការអធិប្បាយរបស់លោក លូ។
លោកបានថ្លែងថា ៖ «យើងមិនបានធ្វើកូដកម្មខុសច្បាប់ទេ។ យើងបានជូនដំណឹងទៅ(ក្រសួងការងារ)និងសាលារាជធានីភ្នំពេញរួចហើយ។ បើសិនកូដកម្មនេះខុសច្បាប់ តើយើងអាចធ្វើបានដល់មួយខែយ៉ាងដូចម្ដេចទៅ?»។
លោក រ៉ុង ឈុន បន្តថា កូដកម្មនេះធ្វើឲ្យកម្មករខ្វះប្រាក់ចាយវាយនិងស្បៀងអាហារ ប៉ុន្តែថា កម្មករនឹងបន្តធ្វើរហូតទាល់តែពួកគេទទួលបាននូវដំណោះស្រាយ។ លោកបញ្ជាក់ថា៖«រោងចក្របានប្ដូរឈ្មោះ ហើយយើងនឹងបន្តធ្វើកូដកម្ម»។
លោក វូ មីងហួរ អ្នកគ្រប់គ្រងរោងចក្រទាំងបីប្រាប់ភ្នំពេញប៉ុស្តិ៍ថា រោងចក្រតៃយ៉ាង ដាច់ចេញទាំងស្រុងពីរោងចក្រតៃណាន៕
No comments:
Post a Comment
yes