តំណាងប្រជាសហគមន៍ការពារព្រៃឡង់ ឃុំសៀមបូក ថ្លែងថា បទល្មើសព្រៃឈើនៅតំបន់ព្រៃឡង់ នៅខែសីហា នេះ មានការថមថយ ដោយសារតែឈើនៅតំបន់ព្រៃឡង់ ក្នុងខេត្តស្ទឹងត្រែង លែងសូវសម្បូរ ហើយប្រជាសហគមន៍ និងអាជ្ញាធរមូលដ្ឋានចុះល្បាតព្រៃជាប្រចាំទៀត ទើបឈ្មួញឈើបង្វែរទិសដៅទៅកាប់ឈើនៅតំបន់ផ្សេង។
ចំណែកឯពលរដ្ឋនៅក្រុងស្ទឹងត្រែង វិញ អះអាងថា ឈ្មួញឈើកំពុងតែដឹកឈើចុះទៅវៀតណាម បានជាធម្មតា ដោយមិនមានការរាំងស្ទះនោះឡើយ។
អនុប្រធានសហគមន៍ការពារព្រៃឡង់ ឃុំសៀមបូក អ្នកស្រី ខា ស្រស់ នៅថ្ងៃទី២៦ សីហា មានប្រសាសន៍ថា កាលពីខែមុន មានបទល្មើសព្រៃឈើច្រើនណាស់ ដោយមានឈ្មួញឈើមកពីខេត្តផ្សេងចំណាយលុយឲ្យកម្មករចូលកាប់ឈើ រួចដឹកជញ្ជូនតាមទូក។ អ្នកស្រីបន្តថា នៅក្នុងខែសីហា នេះ ប្រជាសហគមន៍ការពារព្រៃឡង់ ឃុំសៀមបូក និងអាជ្ញាធរមូលដ្ឋាន បានចុះល្បាតព្រៃចំនួនពីរដង ប៉ុន្តែមិនមានឃើញបទល្មើសកើតឡើងឡើយ។
អ្នកស្រី ខា ស្រស់ បញ្ជាក់ថា សហគមន៍ការពារព្រៃឡង់ ឃុំសៀមបូក យល់ថា ការថយចុះនៃចំនួនបទល្មើស ជាការសន្សំកម្លាំងទុករបស់ឈ្មួញជួញឈើប៉ុណ្ណោះ៖ «នៅខេត្តក្រចេះ អ៊ីចឹង គេយកសម្ភារៈមកទាំងអស់ កម្មករមកទាំងអស់ គេកាប់ឈើចេញពីព្រៃឡង់ ហើយដាក់ទូកទៅខេត្តក្រចេះ វិញ»។
អ្នកស្រី ខា ស្រស់ បន្តថា កន្លងមកអ្នកដែលរកស៊ីឈើ ច្រើនតែសហការជាមួយមន្ត្រីមានអំណាច ចូលកាប់ឈើនៅតំបន់ព្រៃឡង់ ដោយសមត្ថកិច្ចមូលដ្ឋានមិនហ៊ានបង្ក្រាបឡើយ។
យ៉ាងណាក៏ដោយ ពលរដ្ឋរស់នៅម្តុំអូរពងមាន់ លោក វ៉ាន់ ធី មានប្រសាសន៍ថា នៅខែសីហា មានរថយន្តដឹកឈើជាច្រើនគ្រឿង ដឹកកាត់ចំណុចអូរពងមាន់។ លោកបន្តថា នៅសប្ដាហ៍មុន មានរថយន្តយីឌុប ចំនួន៥គ្រឿង ផ្ទុកទៅដោយឈើពេញ ដឹកកាត់មុខផ្ទះលោកពេលយប់ តាមផ្លូវជាតិឆ្ពោះទៅខេត្តក្រចេះ សំដៅទៅប្រទេសវៀតណាម។ លោក វ៉ាន់ ធី បញ្ជាក់ថា ក្នុងរយៈពេលមួយខែចុងក្រោយនេះ មានរថយន្តដឹកឈើធំៗរាប់សិបគ្រឿងឆ្លងកាត់ជាធម្មតា មិនដែលឃើញសមត្ថកិច្ចបង្ក្រាបនោះទេ។
វិទ្យុអាស៊ីសេរី មិនអាចទាក់ទងមន្ត្រីខណ្ឌរដ្ឋបាលព្រៃឈើ និងមន្ត្រីបរិស្ថាន ខេត្តស្ទឹងត្រែង ដើម្បីសុំការបកស្រាយបានទេ នៅថ្ងៃទី២៦ សីហា ឆ្នាំ២០១២។
ទោះជាយ៉ាងនេះក្តី អភិបាលខេត្តស្ទឹងត្រែង លោក ឡូយ សុផាត នៅសប្ដាហ៍មុន ក្នុងកិច្ចប្រជុំជាមួយមេឃុំ ចៅសង្កាត់ទូទាំងខេត្ត លោកបានបញ្ជាឲ្យមេឃុំគ្រប់ឃុំ រួមគ្នាបង្ក្រាបបទល្មើសព្រៃឈើ។ លោកបន្តថា ឈ្មួញដឹកឈើបានជារៀងរាល់ថ្ងៃ ស្របពេលដែលសមត្ថកិច្ចជំនាញរាប់សិបនាក់ បណ្ដាក់គ្នាដូចខ្យងចាំយកលុយ។
លោក ឡូយ សុផាត បញ្ជាក់ថា អាជ្ញាធរខេត្តត្រូវដោះស្រាយបញ្ហាបទល្មើសព្រៃឈើនេះជាបន្ទាន់ ពិសេសចាត់ការចំពោះមន្ត្រីដែលពុករលួយក្នុងសំណុំរឿងព្រៃឈើ៖ «អ្នកបទល្មើសមុនគេ មេព្រៃ ប៉ូលិស ប៉េអិម យោធា ត្រូវគ្នាពីលើដល់ក្រោម អំពើពុករលួយក្នុងបទល្មើសព្រៃឈើ ប្រជាពលរដ្ឋវិញ មើមគ្រញូង គាត់គាស់ពីក្នុងដីក៏ពួកវាចាប់ដែរ»។
ប្រជាពលរដ្ឋឲ្យដឹងថា ក្នុងខេត្តស្ទឹងត្រែង កើតមានការកាប់ឈើនៅស្ទើរតែគ្រប់តំបន់ រាប់ទាំងព្រៃឡង់ និងមានអ្នកទិញទៅលក់បន្ត ដូចជា អ្នករត់តាក់ស៊ី អ្នកដឹកតាមម៉ូតូ តាមរថយន្តទំនើប តាមទូក និងមានឈ្មួញធំៗដឹកតាមរថយន្តយីឌុប ទៀតផង។
ក្រុមប្រជាពលរដ្ឋសហគមន៍ព្រៃឡង់លើកឡើងថា បើសិនជារដ្ឋាភិបាលមិនកំចាត់អំពើពុករលួយក្នុងបទល្មើសព្រៃឈើ ឲ្យមានប្រសិទ្ធភាពទេនោះ ព្រៃឡង់នឹងវិនាសឆាប់ៗនៅពេលខាងមុខ៕
No comments:
Post a Comment
yes