អាជីវករ ណាវ វួចឃីម លក់នំព្រះខែអប្សរា ដែលផលិតសម្រាប់
មនុស្សមានជំងឺទឹកនោមផ្អែម
ភ្នំពេញៈ ខណៈថ្ងៃបុណ្យសែនព្រះខែតាមប្រពៃណីចិនកំពុងតែខិតជិតមកដល់នោះ នៅតាមបណ្ដាមហាវិថី និងដងផ្លូវនានាចាប់ផ្ដើមមានវត្តមានតូបពណ៌ក្រហមឆ្អិនឆ្អៅ ដែលដាក់តាំងលក់នំព្រះខែជាច្រើនប្រភេទ ជាមួយនឹងចង្កៀងគោមសម្រាប់តាំងលម្អផ្ទះផងដែរ។
ជាមួយនឹងវត្តមានម៉ាកយីហោនំជាច្រើន នៅលើទីផ្សារ អ្នកផលិតនំកាន់តែបង្កើនភាពច្នៃប្រឌិតលើអាជីវកម្មរបស់ខ្លួន ជាមួយនឹងការបង្កើតប្រភេទនំថ្មីៗ កែច្នៃរូបមន្តផ្សំគ្រឿង និងការរចនាប្រអប់នំឲ្យកាន់តែមានភាពទាក់ទាញដល់អតិថិជនសែស្រឡាយ ចិនផងដែរ។
នំសែនព្រះខែមានជាច្រើនប្រភេទណាស់ ប៉ុន្តែជាទូទៅរសជាតិរបស់វាគឺផ្អែមល្មួតតែម្ដង មិនថាចំពោះនំផ្អែមស្នូលសណ្ដែក ឬស្នូលចម្រុះគ្រប់មុខនោះទេ។ រសជាតិផ្អែមនេះហើយ បានធ្វើឲ្យអតិថិជនមួយចំនួនខ្លាចរអានឹង បរិភោគ ដោយសារតែការបារម្ភដល់សុខភាព ជាពិសេសគឺមនុស្សវ័យមជ្ឈិមដែលរងជំងឺទឹកនោមផ្អែមតែម្ដង។
ដោយ ហេតុដូច្នេះហើយ ទើបហាងនំដ៏ធំមួយនៅរាជធានីភ្នំពេញបានផលិតនំព្រះខែពិសេស តម្រូវសម្រាប់អ្នកមានជំងឺទឹកនោមផ្អែម ដើម្បីកុំឲ្យពួកគាត់ខកខានទទួលទានចំណីនេះជួបជុំគ្រួសារនារដូវ កាលបុណ្យសែនព្រះខែ។
កញ្ញា ចាន់ អង្គារា ជាអនុប្រធានគ្រប់គ្រង់នៅក្នុងហាងនំអប្សារា បានឲ្យដឹងថា ហាងរបស់ខ្លួនបានផ្ដួចផ្ដើមគំនិតផលិតនំព្រះខែសម្រាប់អ្នកជំងឺ ទឹកនោមផ្អែមនេះតាំងពី៥-៦ឆ្នាំមុនមកម្ល៉េះ។
កញ្ញាបានបន្ត ថា៖ «ដោយសារនៅក្នុងស្រុកខ្មែរយើងឃើញមានអ្នកកើតជំងឺទឹកនោមផ្អែម ច្រើន ហើយអ្នកទាំងនោះគាត់ចង់ញ៉ាំនំហាងរបស់ខ្ញុំ ជាពិសេសចាស់ៗគាត់ចង់ពិសានំព្រះខែ តែកូនរបស់គាត់មិនចង់ឲ្យបរិភោគ ពីព្រោះនំមានរសជាតិផ្អែម។ អ៊ីចឹងហើយបានជាហាងនំខ្ញុំ មានគំនិតផលិតនំនេះឡើង ដើម្បីបំពេញតម្រូវការរបស់គាត់»។
យោងតាមកញ្ញា ចាន់ អង្គារា លក្ខណពិសេសនៃនំដែលផលិតសម្រាប់អ្នកទឹកនោមផ្អែមនោះគឺស្ថិតនៅលើ ប្រភេទស្ករដែលជាគ្រឿងផ្សំចម្បងតែម្ដង។
អនុប្រធានគ្រប់គ្រង់នៅក្នុងហាងនំអប្សរារូបនេះបានឲ្យដឹងថា៖ «នំសម្រាប់អ្នកជំងឺទឹកនោមផ្អែមនេះផ្សំឡើងពីស្ករពិសេស ដែលកុម្ម៉ង់មកពីប្រទេសសិង្ហបុរី។ ស្ករនេះគឺសម្រាប់អ្នកដែលកើតទឹកនោមផ្អែម តែអ្នកដែលមិនកើតទឹកនោមផ្អែមក៏អាចញ៉ាំបានដែរ។ សម្រាប់តម្លៃវិញគឺមិនថ្លៃជាងនំធម្មតានោះទេ»។
នំសែន ព្រះខែទូទៅគឺមានតម្លៃចាប់ពី២ម៉ឺនរៀល ទៅតាមសណ្ឋាន និងប្រភេទនំ។ នំស្នូលសណ្តែកស្លឹកតើយសម្រាប់អ្នកទឹកនោមផ្អែម គឺមានតម្លៃប្រមាណជា៣៩៥០០រៀលក្នុងមួយប្រអប់។
កញ្ញាបាន ឲ្យដឹងថា៖ «ការផលិតនំសម្រាប់អ្នកជំងឺទឹកនោមផ្អែមនេះទទួលបានការគាំទ្រច្រើន ពីអតិថិជន ចាប់តាំងពីចេញលក់ដំបូងម្ល៉េះ»។
លោក ស៊ុង លាភ ជាអាជីវករលក់ដូរ និងជាអតិថិជនម្នាក់របស់ហាងនំអប្សរាបានឲ្យដឹងថា ដើមឡើយឪពុកវ័យ៦៩ឆ្នាំរបស់លោកមិនហ៊ានទទួលទាននំព្រះខែឡើយ ដោយសារតែគាត់មានជំងឺទឹកនោមផ្អែម។ ប៉ុន្តែចាប់តាំងពីមាននំព្រះខែសម្រាប់អ្នកជំងឺទឹកនោមផ្អែមនេះមក គាត់ក៏អាចទទួលទាននំនេះក្លែមជាមួយទឹកតែក្រោយសែនព្រះខែហើយ។
លោក បាននិយាយថា៖ «ស្រុកយើងឥឡូវមានអ្នកកើតជំងឺនេះច្រើនណាស់ បើមានគេផលិតនំសម្រាប់អ្នកជំងឺទឹកនោមផ្អែមអ៊ីចឹង គាត់អ្នកឈឺក៏អាចហូបនំលោកខែបានដូចយើងដែរណា៎»។
ដោយឡែកកញ្ញា លន់ រស់ ដែលជាអតិថិជនប្រចាំរបស់ហាងនំនេះហាក់មិនទាន់ដឹងថា មាននំព្រះខែសម្រាប់អ្នកជំងឺទឹកនោមផ្អែមឡើយ។
អតិថិជនរូបនេះ បាននិយាយថា៖ «ខ្ញុំអត់ដែលដឹងថា ឥឡូវមាននំសម្រាប់អ្នកកើតជំងឺទឹកនោមផ្អែមនោះទេ តែប្រសិនជាមាន ខ្ញុំនឹងទិញជូនបងប្អូនរបស់ខ្ញុំនៅថ្ងៃបុណ្យសំពះព្រះខែខាងមុខ នេះ»៕
No comments:
Post a Comment
yes