អតីតប្រធានអង្គរក្សរបស់សម្តេចជា ស៊ីមលោកឧត្តមសេនីយ៍ឯក
ឈឿន ចាន់ថន(អាវខៀវ) ហៅម៉ៅ
ភ្នំពេញៈ មន្រ្តីតុលាការ និងមេធាវីការពារក្តី បាននិយាយថា សាលាឧទ្ទរណ៍ លើកយកសំណុំរឿង ករណី អតីតប្រធានអង្គរក្សរបស់សម្តេចជា ស៊ីម ប្រធានព្រឹទ្ធសភាកម្ពុជាលោកឧត្តមសេនីយ៍ឯក ឈឿន ចាន់ថន ហៅម៉ៅ វ័យ៤១ឆ្នាំ អតីតនាយរងសេនាធិការចម្រុះនៃកងយោធពលខេមរៈភូមិន្ទ ហើយក៏ជាប្រធានក្រុមហ៊ុនឈឿន ចាន់ថន អាហរណ-និហរណដែរនោះ មកជំនុំជម្រះ នៅថ្ងៃទី ២៧ខែ កញ្ញា ស្អែកនេះ។
លោក ឈឿន ចាន់ថន ត្រូវបានចោទប្រកាន់ដោយតុលាការយោធា៥ករណីដែលរួមមាន ការរំលោភសេចក្តីទុកចិត្ត ការបំផ្លាញដោយចេតនា និងការគេងបន្លំដោយទុច្ចរិត ការចែកចាយអាវុធខុសច្បាប់ ការបំផ្លិចបំផ្លាញសម្ភារៈសម្រាប់បម្រើការប្រយុទ្ធ និងការខ្វះស្មារតីទទួលខុសត្រូវក្នុងការដឹកនាំគ្រប់គ្រងអង្គភាព។ ជាមួយនឹងការចោទប្រកាន់ទាំងនេះ តុលាការយោធា បានកាត់ឲ្យលោក ជាប់ពន្ធនាគារ២៦ឆ្នាំ និងពិន័យជាប្រាក់៣ (បី)លានដុល្លារ។
ក្រៅពីការចោទប្រកាន់ទាំង៥នេះក្នុងតុលាការយោធា លោក ត្រូវចោទប្រកាន់ដោយសាលាដំបូងរាជធានីភ្នំពេញ៤ករណីទៀតដែលរួមមាន ការមានអាវុធ និងគ្រាប់រំសេវខុសច្បាប់ដោយមិនមានការអនុញ្ញាត ការចេញប័ណ្ណប្រើប្រាស់អាវុធ និងគ្រាប់រំសេវទៅឲ្យអ្នកដែលមិនមែនជាសមត្ថកិច្ច ការក្លែងឯកសារសាធារណៈ និងការប្រើប្រាស់ឯកសារសាធារណៈក្លែងក្លាយ។ ក្នុងរឿងក្តីតុលាការស៊ីវិលនេះ លោក ត្រូវបានតុលាការផ្តន្ទាទោសឲ្យជាប់ពន្ធនាគារ១០ឆ្នាំ និងពិន័យជាប្រាក់៥លានរៀល (ប្រមាណ១២៥០ដុល្លារ)។
លោក ឈឿន ចាន់ថន ត្រូវបានចាប់ខ្លួនដោយមន្រ្តីប៉េអឹមកាលពីថ្ងៃទី១៣ សីហា ឆ្នាំ២០១១ ជាមួយនឹងអង្គរក្សរបស់លោកបីនាក់ផ្សេងទៀតនៅឯលំនៅដ្ឋានប្រណិតរបស់លោកនៅសង្កាត់បឹងកេងកង៣ ខណ្ឌចម្ការមន រាជធានីភ្នំពេញ។ បន្ទាប់ពីការចាប់ខ្លួន ប៉ូលិស រឹបអូសបានអាវុធ និងគ្រាប់រំសេវជាច្រើនដែលរួមមានកាំភ្លើងអូកាណូ១ដើមជាមួយគ្រាប់បីបង់ កាំភ្លើងខ្លី៥ដើម កាំភ្លើងអាកា១ដើម កាំភ្លើងយន្ត១ដើម ជាមួយគ្រាប់១៤០០គ្រាប់ និងសម្លៀកបំពាក់យោធារាប់រយ និងសម្ភារៈយោធាពាក់ព័ន្ធច្រើនទៀតនៅក្នុងលំនៅដ្ឋានរបស់លោក៕
No comments:
Post a Comment
yes