ភ្នំពេញ: រូបសំណាកលោក ជា វិជ្ជា អតីតមេដឹកនាំសហជីពសេរីកម្មករ នៃព្រះរាជាណាចក្រកម្ពុជា ដែលធ្វើពីថ្មភក់ ពណ៌ខៀវ បានធ្វើការឆ្លាក់បាន ៥០ ភាគរយហើយ តែមិនមែន ដាក់តាំងនៅសួនច្បារ ជិតវត្តលង្ការទេ។ នេះបើតាមការឲ្យដឹងពីលោក ជា មុនី ប្រធានសហជីពសេរីកម្មករ នៃព្រះរាជាណាចក្រកម្ពុជា កាលពីរសៀលថ្ងៃទី៥ ខែកញ្ញា ឆ្នាំ២០១២។
លោក ជា មុនី ដែលជាប្អូនប្រុសស្នងតំណែងមេសហជីព បន្តពីលោកជាវិជ្ជា បានឲ្យដឹងថា "រូបសំណាកលោក ជា វិជ្ជា ត្រូវបានសម្តេចនាយករដ្ឋមន្ត្រី ហ៊ុន សែន សម្រេចអនុញ្ញាត ឲ្យសាងសង់ កាលពីថ្ងៃទី៣១ ខែធ្នូ ឆ្នាំ២០១១។ ជាទូទៅ យើងត្រូវទទួលយកសេចក្តីជូនដំណឹង និងចំណារសម្តេចនាយករដ្ឋមន្ត្រី ហ៊ុន សែន"។
លោក ជា មុនី បានបញ្ជាក់ឲ្យដឹងថា “រូបសំណាកនេះ វាមានលក្ខណៈស្មុគស្មាញ។ យើងមិនចង់ធ្វើព័ត៌មានលំអិត ហើយអត់មានដាក់នៅវត្តលង្ការទេ”។
សូមជម្រាបថា រូបសំណាកលោក ជា វិជ្ជា ត្រូវបានជួលជាងឆ្លាក់ តាំងពីថ្ងៃទី២ ខែកក្កដា ឆ្នាំ២០១២ នៅកន្លែងឆ្លាក់រចនាបន្ទាយស្រី២ ស្ថិតក្នុងខេត្តសៀមរាប។ រូបសំណាកនេះ ធ្វើពីប្រភេទថ្មភក់ ពណ៌ខៀវ យកមកពីភ្នំត្បែងមានជ័យ ខេត្តព្រះវិហារ ដោយមានជើងទំរមួយម៉ែត្រ និងកំពស់ ១,៦៨ម៉ែត្រ និងឆ្លាក់រួចរាល់ អាចនៅពាក់កណ្តាលខែតុលា ឆ្នាំ២០១២។
លោក ជា វិជ្ជា អតីតប្រធានសហជីពសេរីកម្មករ នៃព្រះរាជាណាចក្រកម្ពុជា ត្រូវបានឃាតករបាញ់សម្លាប់ កាលពីថ្ងៃទី២២ ខែមករា ឆ្នាំ២០០៤ ខណៈពេលដែលលោកកំពុងតែអានកាសែត នៅតូបលក់កាសែតក្បែររបងវត្តលង្ការ។
ក្នុងសំណើរបស់លោកជាមុនី ជូនសម្តេចនាយករដ្ឋមន្ត្រីហ៊ុនសែន គឺបានស្នើសុំសម្តេច ដើម្បីសាងសង់រូបសំណាកលោកជាវិជ្ជា ដាក់នៅលើសួនច្បារ កែងច្រមុះជ្រូក ជិតតូបលក់កាសែត ជាប់របងវត្តលង្ការ ខាងលិចវិមានឯករាជ្យ ក្នុងរាជធានីភ្នំពេញ។ សំណើនោះ ត្រូវបានសម្តេចនាយករដ្ឋមន្ត្រី ហ៊ុន សែន បានចារព្រមព្រៀង កាលពីថ្ងៃទី៣១ ខែធ្នូ ឆ្នាំ២០១១ ហើយសម្តេចបានបញ្ជាឲ្យលោកកែបជុតិមា អភិបាលរាជធានីភ្នំពេញ ប្រជុំពិភាក្សាជាមួយលោកជាមុនី ដើម្បីរៀបចំការសាងសង់រូបសំណាកលោកជាវិជ្ជា។
ក្នុងដំណើការប្រជុំ រៀបចំសាងសង់រូបសំណាកលោកជាវិជ្ជា ត្រូវបានធ្វើឡើងជាបន្តបន្ទាប់ រហូតដល់ចុងក្រោយនេះ មានសេចក្តីសម្រេចពីទីស្តីការគណៈរដ្ឋមន្ត្រីថែមទៀត៕
No comments:
Post a Comment
yes