សកម្មភាពនៃការបូបខ្សាច់ចាក់លុបបឹងមួយកន្លែងក្នុងរាជធានីភ្នំពេញ នាពេលកន្លងមក
ភ្នំពេញៈ ក្រុមអ្នកជំនាញអចលនទ្រព្យបានសម្តែងនូវការព្រួយបារម្ភនឹងហានិភ័យ នៃការជន់លិចរាជធានីភ្នំពេញ នៅពេលទឹកចាប់ផ្តើមជន់ឡើងជាបណ្តើរៗ។
លោក ឌឹត ចណ្ណា នាយកគ្រប់គ្រងក្រុមហ៊ុនអចលនទ្រព្យ VMC បានប្រាប់ថា យើងមានការព្រួយបារម្ភអំពីបញ្ហាទឹកជំនន់លិចរាជធានីភ្នំពេញ ព្រោះតំបន់ភាគខាងជើង និងខាងលិចរាជធានី ដែលដីនៅតំបន់ទាំងនោះភាគច្រើនជាដីទំនាប និងបឹងធំៗដូចជាបឹងកក់ បឹងពោងពាយ កំពុងត្រូវក្រុមហ៊ុនឯកជនបូមខ្សាច់បំពេញមួយផ្នែកធំ ដែលជាហេតុធ្វើឲ្យភ្នំពេញប្រឈមមុខនឹងគ្រោះទឹកជំនន់ ព្រោះកន្លែងរំដោះទឹកមួយចំនួនធំត្រូវចាក់ដីបំពេញ។ ទោះបីជាយ៉ាងណាលោកលើកលើកឡើងថា បញ្ហាទាំងអស់នេះអាចដោះស្រាយបានប្រសិនបើអាជ្ញាធររាជធានីលើក ច្រាំងទន្លេឲ្យខ្ពស់ និងសាងសង់ទំនប់ការពារទឹកជំនន់ឲ្យបានរឹងមាំ។
លោកបញ្ជាក់ថា ៖«ស្ថានភាពសព្វថ្ងៃនេះមិនទាន់មានបញ្ហាទេ ប៉ុន្តែទឹកជំនន់បានបង្កផលប៉ះពាល់ខ្លះៗរួចមកហើយនៅភាគខាងជើង ភ្នំពេញ។ បើទោះបីជាវាមិនទាន់មានបញ្ហាធំ តែបើរដ្ឋាភិបាលធ្វេសប្រហែសនឹងមានបញ្ហាធំជាមិនខាន»។ លោកបន្ថែមទៀតថា៖«ប្រសិនបើមានទឹកជំនន់លិចភ្នំពេញ យើងនឹងខាតបង់ច្រើនណាស់ ដូចទីក្រុងបាងកកជាគំរូស្រាប់ដែលអ្នកវិនិយោគមួយចំនួនចង់រើចាក ចេញ ហេតុនេះប្រសិនបើទឹកជំនន់លិចរាជធានីភ្នំពេញនោះ នឹងធ្វើឲ្យអ្នកវិនិយោគដែលចង់ចូលមកវិនិយោគនៅប្រទេសយើងពួកគេ នឹងមានការរួញរាជាមិនខាន»។
កាលពីឆ្នាំ២០១១កន្លងមក បើទោះបីជាទឹកជំនន់មិនទាន់លិចចូលកណ្តាលភ្នំពេញក៏ដោយ ប៉ុន្តែមានសង្កាត់នៅជាយក្រុងមួយចំនួនបានទទួលរងគ្រោះដោយសារ បញ្ហាទឹកជំនន់រួចទៅហើយ។
លោក ស៊ឹង ប៊ុណ្ណា អគ្គនាយកក្រុមហ៊ុន ប៊ុណ្ណា រៀលធីគ្រុប និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បាននិយាយថា ដោយសារសណ្ឋានដីរាជធានីភ្នំពេញសម្បូរបឹង និងសណ្ឋានដីរបៀបជាបាតខ្ទះ ព្រមទាំងមានហេដ្ឋារចនាសម្ព័ន្ធ(ប្រព័ន្ធលូបង្ហូរទឹក) ក្នុងទីក្រុងមិនសូវល្អផងនោះ យើងពិតជាព្រួយបារម្ភអំពីហានិភ័យទឹកជំនន់នៅក្នុងទីក្រុងនេះ។
លោក ថ្លែងថា៖«សូម្បីតែផ្ទះប្រជាជនមួយកាលណាមានទឹកជំនន់លិចពួក គាត់ត្រូវរងការខាតបង់ទ្រព្យសម្បត្តិ និងជួបការលំបាកច្រើន ចុះទម្រាំលិចរាជធានីនោះ គឺពិតជាមានការខាតបង់ធ្ងន់ធ្ងរណាស់»។ លោកបានបន្តទៀតថា៖«ប្រទេសយើងអាចមានហានិភ័យខ្ពស់ជាងប្រទេសដទៃ ព្រោះប្រទេសយើងមិនមានប្រាក់បម្រុងច្រើនដើម្បីទុកជួយសង្គ្រោះ ប្រជាពលរដ្ឋរងគ្រោះដោយសារទឹកជំនន់ទេ»។
លោក សេន ច័ន្ទរាត្រី អគ្គនាយកក្រុមហ៊ុនអចលនទ្រព្យស៊ីអ៊ីអេ មានលើកឡើងថាភ្នំពេញនៅជិតទន្លេមានទាំងគុណសម្បត្តិ និងគុណវិបត្តិព្រមគ្នា ហេតុនេះភ្នំពេញពិតជាប្រឈមនឹងការលិចដោយទឹកជំនន់ ប្រសិនបើអាជ្ញាធររាជធានីរៀបចំហេដ្ឋារចនាសម្ព័ន្ធមិនបានល្អ។
លោកបាននិយាយថា៖«ប្រសិនបើធ្វេសប្រហែសយើងនឹងរងគ្រោះខ្លាំងជាងគេព្រោះប្រទេសយើងក្រីក្រ»។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មានប្រសាសន៍ថា អាជ្ញាធររាជធានីភ្នំពេញពិសេសលោកអភិបាលរាជធានីបានកោះប្រជុំ មន្ត្រីមកពីមន្ទីរពាក់ព័ន្ធ និងអភិបាលខណ្ឌទាំង៩រួចហើយ ដើម្បីត្រៀមទប់ទល់គ្រោះទឹកជំនន់ជាយថាហេតុណាមួយ ដោយអាជ្ញាធរក្រុងបានធ្វើការស្តារប្រឡាយទឹកនានា និងពិនិត្យស្ថានីយ៍បូមទឹកទំនប់កប់ស្រូវដើម្បីត្រៀមបូមទឹកចេញពី រាជធានីផងដែរ។
លោកបញ្ជាក់ថា៖«យើងសង្ឃឹមថា ហេដ្ឋារចនាសម្ព័ន្ធដែលយើងត្រៀមបម្រុងអាចដោះស្រាយបញ្ហាបាន ប៉ុន្តែក៏ទាមទារការសហការពីមន្ត្រី និងប្រជាជនផងដែរ ទើបយើងអាចទប់ស្កាត់គ្រោះទឹកជំនន់លិចភ្នំពេញបាន»៕
No comments:
Post a Comment
yes