ក្មេងនិងអ្នកភូមិបឹងកក់ឈរស្រែកតវ៉ានៅមុខសាលាដំបូងរាជធានីនៅព្រឹកថ្ងៃអង្គារនេះ
ភ្នំពេញៈ នៅព្រឹកថ្ងៃពុធទី០៥ខែកញ្ញានេះ ប្រជាពលរដ្ឋនៅសហគមន៍បឹងកក់ បានឈរស្រែកតវ៉ាទាមទារឲ្យមានការដោះលែងអ្នកស្រី យ៉ោម បុប្ផា សកម្មជនការពារដីធ្លីនិងជាអ្នកភូមិបឹងកក់ ចេញពីពន្ធនាគារព្រៃសវិញ បន្ទាប់ពីត្រូវបានតុលាការឃុំខ្លួនពីបទហិង្សាដោយចេតនា មានស្ថានទម្ងន់ទោស។
អ្នកស្រី យ៉ោម បុប្ផា និងប្តី ឈ្មោះ លួស សាខន ត្រូវបានសមត្ថកិច្ចប៉ូលិសខណ្ឌដូនពេញ ឃាត់ខ្លួន កាលពីព្រឹកថ្ងៃទី៤ ខែកញ្ញា ឆ្នាំ២០១២ នៅចំណុចមុខស្ថានីយរថភ្លើង តាមដីកាបង្គាប់ឱ្យនាំខ្លួនរបស់លោក តែ សំអាង ចៅក្រមស៊ើបសួរនៃសាលាដំបូងរាជធានីភ្នំពេញ រួចបញ្ជូនមកតុលាការ ដើម្បីសាកសួរករណីជាប់ពាក់ព័ន្ធនឹងការព្រួតគ្នាជាមួយបងប្អូន ចាក់ដោយទួណឺវីស និងកាប់ដោយពូថៅ ទៅលើបុរស ២នាក់ បណ្តាលឱ្យរងរបួសជាទម្ងន់នោះ ដាក់ពន្ធនាគារ ក្រោមការចោទប្រកាន់ពីបទ ហិង្សាដោយចេតនា មានស្ថានទម្ងន់ទោស។
នៅព្រឹកថ្ងៃពុធនេះដែរ សាលាដំបូងរាជធានីភ្នំពេញក៏បានចេញដីកាកោះហៅពលរដ្ឋបុរីកីឡាម្នាក់ចូលទៅកាន់អយ្យការសាលាដំបូងរាជធានីភ្នំពេញ ដើម្បីធ្វើការបំភ្លឺ លើដំណើររឿង ញុះញង់ឲ្យប្រព្រឹត្តបទឧក្រិដ្ឋ តាមបណ្តឹងរបស់ឧកញ៉ាស៊ុយ សុផាន។
ក្នុងដីកាចុះថ្ងៃទី២៤ ខែសីហាឆ្នាំ២០១២ បានបញ្ជាក់ថា លោកទឹម សាក់មុន្នី ស្នាក់នៅអណាធិបតេយ្យក្រោមអគារទី៧ ប្លុកបុរីកីឡា សង្កាត់វាលវង់ ខណ្ឌ៧មករាត្រូវបានលោកសៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចេញដីកាកោះហៅឲ្យចូលទៅបំភ្លឺនៅថ្ងៃពុធ ទី០៥ខែកញ្ញាឆ្នាំ២០១២នេះ។
No comments:
Post a Comment
yes