លោក យឹម សុវណ្ណ តំណាងរាស្រ្តមណ្ឌលភ្នំពេញ
ប្រទេសកម្ពុជានៅក្រោយពីការរៀបចំការបោះឆ្នោតដោយអ៊ុនតាក់ កាលពីឆ្នាំ១៩៩៣មក ត្រូវបានគេមើលឃើញថា
ការបោះឆ្នោតដែលរៀបចំឡើងដោយកម្ពុជាខ្លួនឯង គឺពុំមានឯករាជ្យ សេរី ត្រឹមត្រូវ
និងយុត្តិធម៌នោះឡើយ ។
ការបោះឆ្នោតពីមួយអាណត្តិទៅមួយអាណត្តិចាប់តាំងពីឆ្នាំ១៩៩៨ បានបង្ករលក្ខណៈលំបាក
ដល់ប្រជាពលរដ្ឋដែលជាម្ចាស់ឆ្នោត ក្នុងនោះរួមមានទាំងការលួចបន្លំសន្លឹកឆ្នោត ការលុបឈ្មោះប្រជាពលរដ្ឋចេញពីបញ្ជីឈ្មោះអ្នកបោះឆ្នោត
ដែលគេដឹងថា ប្រជាពលរដ្ឋរូបនោះមាននិន្នាការគាំទ្រមកគណបក្សប្រឆាំង ក៏ដូចជាការផ្លាស់ប្តូរការរិយាល័យបោះឆ្នោតដោយពុំមានជូនដំណឹងដល់ប្រជាពលរដ្ឋជាមុន
ការចេញទម្រង់លិខិតបញ្ជាក់អត្តសញ្ញាណដល់ជនអន្តោប្រវេសន៏ដោយខុសច្បាប់
ដើម្បីបង្កើនសំឡេងឆ្នោតឲ្យគណបក្សកាន់អំណាច និងប្រជាពលរដ្ឋដែលជាអ្នកគាំទ្រគណបក្សកាន់អំណាច
រួមជាមួយនិងការបង្ខិតបង្ខំ បំភិតបំភ័យ គំរាមកំហែង ទិញដូរ ដើម្បីឲ្យប្រជាពលរដ្ឋបោះឆ្នោតឲ្យគណបក្សប្រជាជន
ជាមួយគ្នានោះគណៈកម្មាធិការជាតិរៀបចំការបោះឆ្នោត
ក៏បានជួយសម្រួលឲ្យគណបក្សកាន់អំណាចមានសិទ្ធិពេញលេញជាងគណបក្សប្រឆាំងក្នុងការឃោសនានយោបាយរបស់ខ្លួន
ហើយអ្វីដែលសំខាន់ប្រព័ន្ធផ្សព្វផ្សាយ៩៩%គឺគ្រប់គ្រងដោយគណបក្សកាន់អំណាច
ចំណែកឯគណបក្សប្រឆាំងត្រូវបានគេបំបិទសិទ្ធិពុំឲ្យមានប្រព័ន្ធផ្សព្វផ្សាយឯករាជ្យដោយខ្លួនឯងសូម្បីតែមួយ
។
ដោយកត្តាទាំងអស់នេះហើយបានជាគណបក្សប្រឆាំង មន្រ្តីអង្គការសង្គមស៊ីជាតិ និងអន្តរជាតិ
បានធ្វើការទាមទារឲ្យរដ្ឋាភិបាលត្រូវតែផ្លាស់ប្តូរសមាសភាពគណៈកម្មាធិការជាតិរៀបចំការ
បោះឆ្នោត ដើម្បីឲ្យការបោះឆ្នោតនៅក្នុងប្រទេសកម្ពុជាដំណើរការទៅដោយរលូន សេរី
ត្រឹមត្រូវ និងយុត្តិធម៌ ដែលជាការបោះឆ្នោតមួយបញ្ជាក់ពីឆន្ទះរបស់ប្រជាពលរដ្ឋខ្មែរដោយពិតៗ
ចំពោះការជ្រើសរើសយកមេដឹកនាំរបស់ខ្លួន ។ ជាមួយគ្នានោះកាលពីថ្ងៃទី២០ ខែកញ្ញា
ឆ្នាំ២០១២ តំណាងគណបក្សប្រឆាំងទាំងពីរគណបក្សដែលបានរួមគ្នាជាសំឡេងតែមួយនៅក្នុង
ចលនាប្រជាធិបតេយ្យសង្គ្រោះជាតិ
បានជួបជជែកពិភាក្សាជាមួយខាងតំណាងក្រសួងមហាផ្ទៃអំពីការការរៀបចំសមាសភាពគណៈកម្មាធិការជាតិរៀបចំការបោះឆ្នោត
សម្រាប់ការបោះឆ្នោតជ្រើសតាំងតំណាងរាស្រ្តអាណត្តិទី៥ នៅថ្ងៃទៅ២៨ ខែកក្កដា
ឆ្នាំ២០១៣ ក៏ប៉ុន្តែសំណើររបស់គណបក្ស
ប្រឆាំងត្រូវបានក្រសួងមហាផ្ទៃធ្វើការបដិសេធដោយមិនព្រមធ្វើការផ្លាស់ប្តូរសមាសភាពគណៈ
កម្មាធិការជាតិរៀបចំការបោះឆ្នោតឡើយ ។
លោក យឹម សុវណ្ណ តំណាងរាស្រ្តមណ្ឌលភ្នំពេញបានមានប្រសាសន៏ថា ក្រសួងមហាផ្ទៃ ឬគណ
បក្សកាន់អំណាចនូវតែរក្សាជំហ៊រដើមរបស់ខ្លួនបែបនេះ លោកបារម្ភអំពីការស្វែងរកឯកភាពគ្នាពិសេសគឺការឯកភាពជាតិ
ក្នុងការរកដំណោះស្រាយនយោបាយ ហើយប្រសិនបើពុំមានដំណោះស្រាយនយោបាយសមស្របណាមួយ និងគ្មានការឯកភាពគ្នាទៅលើការបង្កើតឲ្យមាន
សមាជិក គ.ជ.ប មួយដែលទទួលយកបានទាំងអស់គ្នា នោះជាបញ្ហាមួយដែលយើងមានការព្រួយបារម្ភចំពោះស្ថានការណ៏នយោបាយ
ដែលនិងវិវត្តន៏នៅក្នុងពេលឆាប់ៗខាងមុខនេះ ។
លោក យឹម សុវណ្ណ បន្តថា គណបក្សប្រឆាំងសូមអំពាវនាវម្តងហើយម្តងទៀតថាយើងនៅ តែទទូចសុំឲ្យមានការពិនិត្យពិចារណា
ព្រោះគណបក្សប្រឆាំងមិនអាចទទួលយកបានទេ ការរៀប ចំ គ.ជ.ប របៀបបច្ចុប្បន្ននេះ
គឺមិនមានការឯកភាពជាតិនោះឡើយ ពីព្រោះយន្តការនៃការជ្រើសរើសនោះគឺវាមិនឯករាជ្យ ចំណែកក្រសួងមហាផ្ទៃយើងបានដឹងទាំងអស់គ្នាហើយថា
គណបក្សប្រជាជនគឺជាអ្នកគ្រប់គ្រង ។ ដូច្នេះគណបក្សមួយ យន្តការដែលមានតែបក្សមួយជ្រើសរើសបេក្ខជនសមាជិក
គ.ជ.ប គឺមិនអាចធានាបាននូវឯករាជ្យភាពពិតប្រាកដនោះទេ
គឺទាល់តែមានការចូលរួមពីគ្រប់គណបក្សនយោបាយដែលមានអាសនៈនៅក្នុងរដ្ឋសភា
ពេលនោះទើបបានយើងរកឃើញចំណុចឯកភាពគ្នា ហើយលោកគិតថាចំណុចនេះគឺល្អណាស់ ប្រសិនបើឯកភាពគ្នាពីចំងាយអំពីសមាជិក
គ.ជ.ប ទាំងគណៈកម្មាធិការជាតិបោះឆ្នោតខេត្ត
និងឃុំ នោះយើងនិងបានដំណោះស្រាយនយោបាយ បង្ករជំនឿជឿទុកចិត្តចំពោះ គ.ជ.ប ឡើងវិញ ហើយយើងនិងកាត់បន្ថយជម្លោះបានច្រើនជាអតិបរមា
។
លោក យឹម សុវណ្ណ ថ្លែងបន្តថា
គណបក្សប្រឆាំងនិងពិចារណាប្រសិនបើការបោះឆ្នោតមិនមាន ការប្រែប្រួលអ្វីនោះ ហើយគ.ជ.ប នៅតែដដែល យន្តការនៅតែដដែលនោះ ។ លោកថាដូចយើងបានឃើញទាំងអស់គ្នាហើយ ដោយសារតែការបោះឆ្នោតមិនឆ្លុះបញ្ចាំងពីភាពត្រឹមត្រូវ
និងយុត្តិធម៌ ដែលទាំងអស់នេះគឺវាមិនត្រឹមត្រូវតាំងពីដំបូងរហូតមកដល់ទីបញ្ចប់
ចំណែកឯលទ្ធផលដែលចេញមកគឺពុករលួយនៅតែពុករលួយ ប្រជាពលរដ្ឋនៅតែរងគ្រោះគ្មានទីបញ្ចប់
អំពីវិបត្តិដីធ្លី អំពើអយុត្តិធម៌នៅតែមានក្នុងសង្គម ភាពក្រីក្រនៅតែដោះស្រាយមិនចេញ
រីឯបំណុលកាន់តែ
មានការកើនឡើងច្រើនឡើងៗ ដែលទាំងអស់នេះហើយគឺជាការព្រួយបារម្ភទៅយ៉ាងខ្លាំងដល់ស្ថេរភាពសង្គម
ដូច្នេះមធ្យោបាយគឺមានតែពីរទេ ហើយការធ្វើសង្គ្រាមគឺមិនមានឡើយ រឿងសង្គ្រាម រឿងអំពើហិង្សាគឺគ្មានជាដាច់ខាត
គឺមានតែប្រជាធិបតេយ្យ និងការបោះឆ្នោតដ៏ត្រឹមត្រូវនិងយុត្តិធម៌ ។ លោកថាបោះឆ្នោតមិនត្រឹមត្រូវនិងយុត្តិធម៌
គឺដូចយើងបានឃើញហើយនៅតាមបណ្តាប្រទេសមួយចំនួន ដែលគ្មានការបោះឆ្នោតដោយត្រឹមត្រូវ
និងយុត្តិធម៌ ដែលរៀបចំឡើងដោយមេដឹកនាំផ្តាច់ការមួយចំនួន នៅទីបញ្ចប់គឺបានកើតឡើងវិបត្តិសង្គម
អំពើហិង្សា ការបង្ហូរឈាម ដែលប្រជាពលរដ្ឋខ្មែរមិនត្រូវការ ហើយគណបក្សប្រឆាំងទាំងពីរគឺមិនត្រូវការ
និងចង់ជៀសវាងបំផុតនូវអំពើហិង្សា ដែលធ្វើឲ្យប៉ះពាល់ទៅដល់អាយុ
ជីវិតរបស់ប្រជាពលរដ្ឋយើង ។
លោក យឹម សុវណ្ណ បន្តថា ហេតុដូចនេះហើយយើងត្រូវតែដោះស្រាយដោយសន្តិវិធី យើងមិន
ពឹងបរទេសឲ្យជួយយើងឡើយ ហើយអ្វីដែលគណបក្សប្រឆាំង បានជួបជាមួយតំណាងក្រសួងមហាផ្ទៃ
គឺយើងខិតខំបង្កើតនូវវប្បធម៌ជជែកគ្នា ដោះស្រាយបញ្ហារវាងខ្មែរ និងខ្មែរគ្នាឯង
ក៏ប៉ុន្តែប្រសិនបើនៅតែមានការប្រកាន់ជំហ៊របែបនេះដោយពុំមានការយល់ព្រមផ្លាស់ប្តូរសមាសភាព
គ.ជ.ប គឺមិនអាចរកឯកភាពគ្នាបាននោះទេ
តែប្រសិនបើជាមានការឯកភាពគ្នាតាំងពីដើមលោកជឿថា យើងនិងអាចរកដំណោះស្រាយនយោបាយបាន
ហើយវានិងកាត់បន្ថយបាននូវទំនាស់ ដូច្នេះគណបក្សកាន់អំណាចត្រូវតែពិចារណាចំពោះរឿងផ្លាស់ប្តូរសមាសភាព
គ.ជ.ប នេះឡើងវិញ ។
ជាមួយគ្នានោះលោក យឹម សុវណ្ណ ក៏បានធ្វើការបញ្ជាក់នូវគោលជំហ៊ររបស់គណបក្សប្រឆាំងផងដែរថា
យើងខ្ញុំនិងពិចារណានិងមិនចូលរួមនៅក្នុងការបោះឆ្នោតជាតិអាណត្តិទី៥ នៅថ្ងៃទី២៨
ខែកក្កដា ឆ្នាំ២០១៣ខាងមុខ ប្រសិនបើពុំមានការផ្លាស់ប្តូរសមាសភាព គ.ជ.ប ។
ដូចនេះដើម្បីឲ្យការបោះឆ្នោតប្រព្រឹត្តទៅដោយរលូន សេរី ត្រឹមត្រូវ និងយុត្តិធម៌
ក្រសួងមហាផ្ទៃ ក៏ដូចជារដ្ឋាភិបាលត្រូវតែការសម្រួល និងធ្វើការផ្លាស់ប្តូរសមាសភាព គ.ជ.ប ដើម្បីកុំឲ្យមានការ រិះគន់ទាំងជាតិ និងអន្តរជាតិ
ថាការបោះឆ្នោតនៅក្នុងប្រទេសកម្ពុជាពោរពេញទៅដោយភាពមិនប្រក្រតី និងអយុត្តិធម៌
ដែលជាការបោះឆ្នោតរៀបចំឲ្យគណបក្សកាន់អំណាចឈ្នះជារហូតនោះ
ហើយណាមូយរដ្ឋាភិបាលដែលកើតចេញពីការបោះឆ្នោតរបៀបនេះ ក៏មិនមានការទទួលស្គាល់
ជាអន្តរជាតិផងដែរ ដែលជារដ្ឋាភិបាលខុសច្បាប់ ។ ហើយរដ្ឋាភិបាលសព្វថ្ងៃគូរតែក្រលែកមើល
ប្រទេសជិតខាងរបស់ខ្លួនជាពិសេសគឺប្រទេសថៃ ថាតើការបោះឆ្នោតនៅប្រទេសថៃប្រព្រឹត្តទៅ
តាមបែបលទ្ធិប្រជាធិបតេយ្យបែបណា ហើយគេផ្តល់លទ្ធភាពអ្វីខ្លះដល់គណបក្សប្រឆាំង ។
គណបក្សប្រឆាំងនៅក្នុងប្រទេសថៃ គឺរដ្ឋាភិបាលរបស់គេបើកសិទ្ធិគ្រប់គ្រាន់ក្នុងការឲ្យមានប្រ
ព័ន្ធផ្សព្វផ្សាយរបស់ខ្លួនដោយឯករាជ្យ
ជាមួយគ្នានោះសូម្បីតែគណៈកម្មាធិការរៀបចំការបោះ ឆ្នោតរបស់គេ ក៏ជាមនុស្សឯករាជ្យ
ដែលប្រកាន់យកច្បាប់ និងលទ្ធិប្រជាធិបតេយ្យជាធំ ដោយមិនបំរើឲ្យគណបក្សនយោបាយណាមួយ
ដូចជាគណៈកម្មាធិការជាតិរៀបចំការបោះឆ្នោតនៅក្នុងប្រទេសកម្ពុជានោះឡើយ
ដែលជាឧបករណ៏នយោបាយរបស់គណបក្សកាន់អំណាចសព្វ ថ្ងៃ
ហើយធ្វើអ្វីគ្រប់បែបយ៉ាងដើម្បីឲ្យគណបក្សកាន់អំណាចឈ្នះជានិច្ច ឈ្នះតែរហូត និង
ឈ្នះតែឯងនោះ ដោយមិនខ្វល់ពីការរិះគន់ពីគ្រប់មជ្ឈដ្ឋាន
និងអនុសាសន៏របស់អន្តរជាតិនោះ ៕
No comments:
Post a Comment
yes