លោក យឹម សុវណ្ណ អ្នកនាំពាក្យ ចលនាប្រជាធិបតេយ្យសង្គ្រោះជាតិ
ចលនាប្រជាធិបតេយ្យសង្គ្រោះជាតិ
ដែលកើតចេញពីការរួមបញ្ចូលគ្នាជាកម្លាំងតែមួយរវាងគណបក្ស សម រង្ស៊ី និងគណបក្ស
សិទ្ធិមនុស្ស កាលពីថ្ងៃទី១៧ ខែកក្កដា ឆ្នាំ២០១២ នៅប្រទេសហ្វីលី ពីន
ឥឡូវនេះបានក្លាយខ្លួនទៅជាគណបក្ស សង្គ្រោះជាតិ ហើយដែលមានការទទួលស្គាល់យ៉ាង
ត្រឹមត្រូវពីក្រសួងមហាផ្ទៃកាលពីថ្ងៃទី៣០ ខែសីហា ឆ្នាំ២០១២
និងបានបើកសម្ភោធទីស្នាក់ការ របស់គណបក្សជាផ្លូវការផងដែរ នៅថ្ងៃទី១១ ខែកញ្ញា
ឆ្នាំ២០១២ កន្លងទៅថ្មីៗនេះ ។
សូមជំរាបជូនផងដែរថា នៅក្នុងពិធីបើកសម្ភោធទីស្នាក់ការរបស់គណបក្ស សង្គ្រោះជាតិ
គឺមាន ប្រជាពលរដ្ឋដែលជាអ្នកគាំទ្រ រួមជាមួយនិងសមាជិក-សមាជិកការរបស់គណបក្ស
សង្គ្រោះជាតិ ចូលរួមមានចំនួនប្រមាណជាងពីរពាន់នាក់ ដោយបានសម្តែងការអបអរសារទរចំពោះការសម្រេចបានជោគជ័យរបស់អ្នកប្រជាធិបតេយ្យដោយបង្កើតបានគណបក្ស
សង្គ្រោះជាតិ ឡើងដើម្បីចូលរួមប្រគួតប្រជែងក្នុងការបោះឆ្នោតជាតិអាណត្តិទី៥
ជាមួយនិងគណបក្សប្រជាជនកាន់អំណាចសព្វថ្ងៃ ។
ជាមួយគ្នានោះជារៀងរាល់ថ្ងៃថ្នាក់ដឹកនាំរបស់គណបក្ស សម រង្ស៊ី និងគណបក្ស សិទ្ធិមនុស្ស
បានធ្វើដំណើរចុះទៅតាមមូលដ្ឋានក្នុង ចលនាប្រជាធិបតេយ្យសង្គ្រោះជាតិ
ដែលនិងក្លាយទៅជាសមាជិករបស់គណបក្ស សង្គ្រោះជាតិ នៅពេលដ៏ខ្លីខាងមុខនេះផងដែរនោះ
ដើម្បីជួបជាមួយ ប្រជាពលរដ្ឋ ធ្វើការផ្សព្វផ្សាយពីគោលជំហ៊របស់
ចលនាប្រជាធិបតេយ្យសង្គ្រោះជាតិ ក៏ដូចជា គណបក្ស សង្គ្រោះជាតិ ផងដែរ
រួមជាមួយនិងការរួមច្របាច់បញ្ចូលគ្នាជាកម្លាំងតែមួយរវាងគណ បក្ស សម រង្ស៊ី និងគណបក្ស
សិទ្ធិមនុស្ស ។
ប្រជាពលរដ្ឋនៅពេលដែលពួកគាត់បានឃើញនូវវត្តមានរបស់ថ្នាក់ដឹកនាំរបស់គណបក្សប្រជាធិ
បតេយ្យទាំងពីរធ្វើការរួមគ្នាបែបនេះគឺពួកគាត់មានការសប្បាយចិត្តក្រៃលែងឥតឧប្បមា
ព្រោះអ្វីដែលគណបក្ស សម រង្ស៊ី និងគណបក្ស សិទ្ធិមនុស្ស
បានធ្វើនៅពេលនេះក៏ជាឆន្ទះរបស់ពួកគាត់ ដែលជាអ្នកស្នេហាជាតិ ចង់បានជាយូរមកហើយផងដែរ ។
ព្រោះពួកគាត់យល់ឃើញថាប្រសិន
បើគណបក្សទាំងពីរនៅបែកគ្នានិងធ្វើឲ្យសម្លេងកាន់តែបែកច្រើនឡើងៗ ហើយប្រជាពលរដ្ឋខ្លះ
ដោយគាត់ពិបាកសម្រេចចិត្តក្នុងការជ្រើសរើសយកគណបក្សណាមួយក្នុងចំណោមគណបក្ស
ទាំងពីរដែលពួកគាត់ស្រលាញ់ដូចគ្នានោះ
បានធ្វើឲ្យពួកគាត់សម្រេចចិត្តខុសគឺមិនទៅបោះឆ្នោតដែលធ្វើឲ្យសម្លេងកាន់តែបាត់បង់ច្រើនឡើង
។
ជាមួយគ្នានោះប្រជាពលរដ្ឋពួកគាត់ក៏ចង់ឃើញវត្តមានរបស់លោក សម រង្ស៊ី នៅក្នុងប្រទេសកម្ពុជាក្នុងពេលឆាប់ៗខាងមុខនេះផងដែរ
ដើម្បីឲ្យបានមុនពេលឃោសនាបោះឆ្នោត ដោយពួកគាត់ បានលើកឡើងថា
ប្រសិនបើមានវត្តមានរបស់លោក សម រង្ស៊ី ដែលជាប្រធានគណបក្ស សង្គ្រោះជាតិ នៅលើទឹកដីនៃប្រទេសកម្ពុជា
និងកាន់តែធ្វើឲ្យប្រជាប្រិយភាពរបស់គណបក្ស សង្គ្រោះជាតិ កាន់តែទទួលបានការគាំទ្រពីប្រជាពលរដ្ឋខ្មែរច្រើនឡើងថែមទៀតជាក់ជាមិន
ខាននោះឡើយ ព្រោះពួកគាត់មានជំនឿលើលោក សម រង្ស៊ី និងលោក កឹម សុខា ក្នុងការដឹកនាំ គណបក្ស
សង្គ្រោះជាតិ ដើម្បីទទួលបានជ័យជំនះនៅឆ្នាំ២០១៣ ខាងមុខនេះ ។
ថ្លែងទៅកាន់ប្រជាពលរដ្ឋដែលជាអ្នកគាំទ្រគណបក្ស សង្គ្រោះជាតិ លោក យឹម សុវណ្ណ
ដែលជា អ្នកនាំពាក្យឲ្យ ចលនាប្រជាធិបតេយ្យសង្គ្រោះជាតិ លោកបានមានប្រសាសន៏ថា
សូមបងប្អូនប្រ ជាពលរដ្ឋរបស់យើងមានសង្ឃឹម និងសប្បាយរីករាយចុះលោក សម រង្ស៊ី
ដែលជាប្រធានគណ បក្ស សង្គ្រោះជាតិ
និងមានវត្តមាននៅលើទឹកដីនៃប្រទេសកម្ពុជារបស់យើងនៅពេលដ៏ខ្លីឆាប់ៗខាងមុខនេះ ។
ព្រោះឥឡូវរូបលោកកំពុងតែជាប់បំពេញបេសកកម្មការងារជាមួយនិងអន្តរជាតិ
ដើម្បីឲ្យមានអន្តរាគមន៏ឲ្យលោកបានវិលត្រឡប់មកវិញដោយគ្មានបញ្ហាជាមួយនិងរដ្ឋាភិបាលក្រុងភ្នំពេញសព្វថ្ងៃ
ជាមួយគ្នានោះលោក ក៏បាននិងកំពុងតែជាប់មមាញឹកក្នុងការងារជាមួយអង្គ ការអន្តរជាតិ
ដើម្បីឲ្យការបោះឆ្នោតនៅប្រទេសកម្ពុជានៅឆ្នាំ២០១៣ខាងមុខ ប្រព្រឹត្តទៅដោយសេរី
ត្រឹមត្រូវ និងយុត្តិធម៌ផងដែរ រួមជាមួយនិងការផ្លាស់ប្តូរសមាសភាពក្បាលម៉ាស៊ីន គណកម្មាធិការជាតិរៀបចំការបោះឆ្នោតចេញ
ដែលគេដឹងថាលោក អ៊ឹម សួស្តី ជាប្រធានគណកម្មាធិការជាតិរៀបចំការបោះឆ្នោត និងលោក ទេព
នីថា ជាអគ្គលេខាធិការ រួមជាមួយនិងសហការីមួយចំនួនទៀតនៅក្នុងស្ថាប័នគណកម្មាធិការជាតិរៀបចំការបោះឆ្នោត
គឺបានធ្វើអ្វីៗគ្រប់យ៉ាងដើម្បីឲ្យគណបក្សប្រជាជនឈ្នះជារហូត ដោយគេបានហៅស្ថាប័នមួយនេះថាជាឧបការណ៏នយោបាយរបស់គណបក្សប្រជាជនកាន់អំណាចសព្វថ្ងៃ
។
អ្នកនាំពាក្យ ចលនាប្រជាធិបតេយ្យសង្គ្រោះជាតិ លោក យឹម សុវណ្ណ
បានមានប្រសាសន៏ដោយ
ប្រៀបធៀបថា ម្សិញម៉ិញជាសុបិន្ត ហើយថ្ងៃនេះជាសេចក្តីសង្ឃឹម
ចំណែកឯថ្ងៃស្អែកនឹងក្លាយទៅជាការពិត ហើយសមាជិក-សមាជិកការរបស់គណបក្ស សម រង្ស៊ី
និងគណបក្ស សិទ្ធិមនុស្ស និងក្លាយទៅជាសមាជិកនៃគណបក្សតែមួយដើម្បីប្រគួតប្រជែងការបោះឆ្នោតខាងមុខនេះ
ព្រោះ គណបក្ស សម រង្ស៊ី និងគណបក្ស សិទ្ធិមនុស្ស
និងដាក់បញ្ជីឈ្មោះបេក្ខជនតែមួយនៅមុនពេល បោះឆ្នោតឆ្នាំ២០១៣ខាងមុខ ។ លោកបន្តថា
ដូចបងប្អូនបានជ្រាបហើយទឹកដីរបស់យើងបាន បាត់បង់ជារៀងរាល់ថ្ងៃ
គេបោះបង្គោលព្រំដែនរំលោភយក តែគណបក្សកាន់អំណាចមិនមានការ អើពើសូម្បីតែបន្តិចសោះ
ផ្ទុយទៅវិញអ្នកប្រជាធិបតេយ្យ ស្នេហាជាតិ ដែលហ៊ានចេញមុខការពារទឹកដីត្រូវ
បានគេចាប់ដាក់គុក និងផ្តន្ទាទោសដាក់ពន្ធនាគារ រួមទាំងការពិន័យឲ្យបង់ប្រាក់រាប់សិបលានរៀល
ដូចជាលោក ព្រំ ជា និងអ្នកស្រី មាស ស្រី ក៏ដូចជាលោក សម រង្ស៊ី ដែលកាលណោះជាប្រធានគណបក្ស
សម រង្ស៊ី និងឥឡូវបានក្លាយទៅជាប្រធានគណបក្សថ្មីរបស់អ្នកប្រជាធិបតេយ្យ
និងអ្នកស្នេហាជាតិ នោះគឺគណបក្ស សង្គ្រោះជាតិ ដូចអ្វីដែលយើងបានឃើញនៅពេលនេះ ។
លោក យឹម សុវណ្ណ បន្តថា
មួយវិញទៀតជនអន្តោប្រវេសន៏បានហូរចូលមកក្នុងប្រទេសរបស់យើងជារៀងរាល់ថ្ងៃ គណបក្សកាន់អំណាចមិនមានវិធានការអ្វីដើម្បីទប់ស្កាត់នោះឡើយ
ហើយ បានសម្បទានដី ព្រៃឈើ ទៅឲ្យក្រុមហ៊ុនបរទេសជាច្រើនពាន់លានហិចតាដែលមានរយៈពេល
យូររហូតដល់៩៩ឆ្នាំ សម្បត្តិធនធានធម្មជាតិរបស់យើងទាំងលើដី ក្នុងដី និងក្នុងទឹកត្រូវបានវិនាសបាត់បង់ស្ទើតែសូន្យនៅក្រោមការគ្រប់គ្រងរបស់គណបក្សកាន់អំណាចសព្វថ្ងៃ
។ លោកថា ប្រសិនបើបងប្អូនមិនភ្ញាក់រលឹកនៅពេលនេះទេ ប្រទេសជាតិ
មាតុភូមិជាទីស្នេហារបស់យើង និងក្លាយទៅជាកម្ពុជាក្រោមទីពីរជាក់ជាមិនខាននោះឡើយ ។
ដូចនេះសូមបងប្អូនប្រជាពលរដ្ឋខ្មែរយើងទាំងអស់ អញ្ជើញចូលរួមជាមួយនិងគណបក្ស
សង្គ្រោះជាតិ ឲ្យបានច្រើនឡើងជាងនេះបន្ថែមទៀត
ដើម្បីយើងទាំងអស់គ្នាស្រោចស្រង់ប្រទេសជាតិ មាតុភូមិដ៏អភ័ព្វរបស់យើង
ក្រោមការគ្រប់គ្រងដោយគណបក្សប្រជាជនអស់រយៈពេលជាង៣០ឆ្នាំមកនេះ បានធ្វើឲ្យប្រទេសជាតិរបស់យើងដើរទៅដល់មានជ្រោះមរណៈនោះ
៕
No comments:
Post a Comment
yes