ក្រចេះ ៖ សកម្មភាពដឹកឈើរបស់លោក ញា ជាមន្ដ្រីកងរាជអាវុធហត្ថប្រចាំស្រុកសំបូរ គឺជារៀងរាល់ថ្ងៃលោក ញា តែងតែដឹកឈើចេញពីស្រុកសំបូរ ចូលក្នុងទីរួមខេត្ដក្រចេះដើម្បីដាក់តាមសិប្បកម្មកែច្នៃនៅភូមិយួន សង្កាត់ក្រចេះ ក្រុងក្រចេះ ទាំងថ្ងៃទាំងយប់ គ្មានពេលទំនេរហើយក៏គ្មាននរណាហ៊ានប៉ះពាល់ការដឹកជញ្ជូនឈើរបស់គាត់នោះដែរ។
ប្រភពព័ត៌មានពីប្រជាពលរដ្ឋរស់នៅស្រុកសំបូរ បានឲ្យដឹងថា លោក ញា អាងខ្លួនជា មន្ត្រីប៉េអឹមដឹកឈើគ្មានកោតញញើតអ្នកណាទាំងអស់ដោយគាត់បានធ្វើសកម្មភាពលើកឈើដាក់ក្នុងរថយន្ដរបស់គាត់ទាំងកណ្ដាលថ្ងៃនៅកណ្ដាលវាលគ្មានកន្លែងបិទបាំងនេះ ទោះជានៅលើផ្លូវសាធារណៈទូទាំងស្រុកសំបូរ កន្លែងណាក៏ដោយក៏គាត់ហ៊ានលើកឈើដាក់ឡានដែរ ពោលគឺគាត់បានចាត់ទុកថា ក្នុងអាណាចក្រស្រុកសំបូរគ្មាននរណាហ៊ានអុងអាត់ជាមួយគាត់ទេ។
អ្វីដែលលោក ញ៉ា បានប្រព្រេត្តគឺខុសពីឈ្មួញរកស៊ីឈើដទៃទៀត ដែលមិនសូវហ៊ានផ្គើនចំពោះមន្ត្រីជំនាញនោះទេគឺ គេត្រូវរកកន្លែងណាដែលបិទបាំងមិនមែននៅកណ្ដាលវាល ដូចដែលលោក ញា បានធ្វើនោះទេ។ មតិខ្លះបានលើកឡើងថា លោក ញា មិនត្រឹមតែដឹកឈើមិនញញើតនោះទេ គាត់ថែមទាំងផ្គើន ទៅនឹងបទបញ្ជារបស់រដ្ឋាភិបាលថែមទៀត ព្រោះកន្លងមកធ្លាប់មានការព្រមានមិនឲ្យមន្ដ្រីកងកម្លាំងប្រដាប់អាវុធពាក់ព័ន្ធជាមួយបទល្មើសព្រៃឈើនោះទេ គឺត្រូវដកខ្លួនចេញជាបន្ទាន់។
សកម្មភាពរកស៊ីដឹកជញ្ជូនឈើខុសច្បាប់របស់លោក ញា ប្រហែលជាគាត់អាងអំណាចរបស់លោក អ៊ុំ សុគន្ធា មេបញ្ជាការកងរាជអាវុធហត្ថស្រុកសំបូរ ហើយមើលទៅ ទើបគាត់ហ៊ានបែបនេះ។ មេបញ្ជាការប៉េអឹមស្រុកសំបូរ បានប្រាប់ តាមទូរស័ព្ទកាលពីថ្ងៃទី ១៤ ខែកញ្ញា ឆ្នាំ២០១២ តាមទូរស័ព្ទថា លោក ញា ពិតជាប៉េអឹមស្រុកសំបូរមែនហើយភ្នាក់ងារវរជនខ្មែរ បានសួរគាត់បន្ដថា តើលោក ដឹងថាលោក ញា ដឹកឈើដែរ ឬទេ ? គាត់បានឆ្លើយយ៉ាងខ្លីថា គាត់ក៏បានដឹងដែរ ប៉ុន្ដែមិនមែនទ្រង់ទ្រាយធំទេ គឺដឹកត្រឹមកូនក្រឡឹងប៉ុណ្ណោះ៕
No comments:
Post a Comment
yes