កណ្តាល ៖ ក្នុងទិសដៅនៃការប្រមូលពន្ធឲ្យបានច្រើនសម្រាប់ជួយទ្រទ្រង់ការបង្កើនចំណូលក្នុងស្រុករបស់រាជរដ្ឋាភិបាលកម្ពុជា ដែលអគ្គនាយកគយបានណែនាំឲ្យមន្ត្រីថ្នាក់ក្រោមយកចិត្តទុកដាក់អនុវត្តន៍តាមឲ្យមានប្រសិទ្ធភាពគេសង្កេតឃើញមន្ត្រីមួយចំនួននាំគ្នាកាត់បន្ថយភាពអសកម្ម ប៉ុន្តែប្រធានការិយាល័យគយនិងរដ្ឋាករប្រចាំច្រកព្រំដែនទ្វេរភាគីជ្រៃធំលោក មួង ដារ៉ា ដែលទើបឡើងតំណែងជំនួសលោក យឹម ភាង ដែលបានចូលនិវត្តន៍មិនមានឆន្ទៈអនុវត្តតាមគោលការណ៍របស់ថ្នាក់លើនោះទេ គឺលោក មួង ដារ៉ា នៅតែរក្សាទំនាក់ទំនងយ៉ាងស៊ីជម្រៅជាមួយក្រុមឈ្មួញរកស៊ីដឹកជញ្ជូនទំនិញខុសច្បាប់ក៏ដូចជាការគាបជំរិតអ្នករកស៊ីដឹកជញ្ជូនកសិផលចេញទៅប្រទេសវៀតណាមផ្ទុយទៅនឹងអនុសាសន៍របស់រាជរដ្ឋាភិបាលផងដែរ។
ប្រភពព័ត៌មានពីក្រុមឈ្មួញ រកស៊ីដឹកជញ្ជូនទំនិញមួយចំនួនបានឲ្យដឹងថា លោក មួង ដារ៉ា មិនដែលខ្លាចញញើតចំពោះចំណាត់ការរបស់អង្គភាពប្រឆាំងអំពើពុករលួយសូម្បីតែបន្តិច ចាប់តាំងពីពេលដែលគាត់ធ្វើជាអនុប្រធានការិយាល័យគយប្រចាំច្រកជ្រៃធំ ខណៈដែលលោក យឹម ភាង មិនទាន់ចូលនិវត្តន៍មកម្ល៉េះ។ លោក មួង ដារ៉ា នៅតែឃុបឃិតជាមួយឈ្មួញឲ្យទំនិញខុសច្បាប់ហូរចូលតាមផ្លូវទឹកនិងផ្លូវគោកទាំងយប់ទាំងថ្ងៃ ជាពិសេសការឃុបឃិតឲ្យហូរចូលទំនិញគេចពន្ធធ្វើឲ្យខាតបង់ចំណូលជាតិច្រើនសន្ធឹកសន្ធាប់ព្រោះលោក មួង ដារ៉ា ពូកែរកលុយសម្រាប់ទប់តំណែង ទើបគាត់ហ៊ានធ្វើអ្វីៗគ្រប់បែបយ៉ាង និងតាមតែអំពើចិត្តមិនខ្វល់ខ្វាយអនុវត្តតាមអនុសាសន៍របស់ថ្នាក់លើដែលកំពុងរឹតបន្តឹងការប្រមូលចំណូលក្នុងស្រុកនោះទេ។
បើពិនិត្យមើលពីទំហំនៃស្ថានភាពដឹកជញ្ជូនទំនិញមិនប្រក្រតី មកពីប្រទេសវៀតណាម ឬការដឹកជញ្ជូនឈើប្រណីត សត្វព្រៃ និងស្ករស ចុះទៅវៀតណាម យ៉ាងអនាធិបតេយ្យនោះ គេអាចវាយតម្លៃបានថាប្រភពចំណូលរបស់លោក មួង ដារ៉ា មានច្រើនសន្ធឹកសន្ធាប់ក្នុងមួយថ្ងៃៗ។ ជាក់ស្តែងលោក យឹម ភាង ដែលជាអតីតប្រធានការិយាល័យគយនៅទីនោះ ទោះជាដល់អាយុចូលនិវត្ដន៍ក៏ដោយក៏គាត់នៅតែក្រាញននៀលសម្ងំកើបផលប្រយោជន៍ច្រកហោប៉ៅផ្ទាល់ខ្លួន និងបានបែងចែកប្រភពចំណូលខ្លះទៅថ្នាក់លើដើម្បីទប់ទល់កុំឱ្យមានអ្នកថ្មីមកជ្រែតំណែង ។ កាលណោះលោក មួង ដារ៉ា ដែលជាបេក្ខភាពត្រូវឡើងស្នងតំណែងលោក យឹម ភាង មានភាពក្តីក្រហាយយ៉ាងខ្លាំងព្រោះមួយថ្ងៃៗលោក មួង ដារ៉ា ស្រក់ទឹកមាត់ចង់បានតំណែងប្រធានការិយាល័យគយនៅជ្រៃធំហើយបន់ស្រន់ឲ្យលោក យឹម ភាង ចូលនិវត្តន៍ឆាប់ៗ។
ដូចការរំពឹងទុកកាលពីព្រឹកថ្ងៃទី១៥ ខែសីហា ឆ្នាំ២០១២ នៅការិយាល័យគយនិងរដ្ឋាករ ជ្រៃធំ មានរៀបចំពិធីប្រកាសប្រគល់ភារកិច្ចជូនលោក មួង ដារ៉ា ឲ្យឡើងធ្វើជាប្រធានស្តីទីជំនួសលោក យឹម ភាងជាប្រធានចាស់ដែលដល់អាយុចូលនិវត្តន៍ ដើម្បីបន្តការងាររកចំណូលជូនជាតិក្រោមអធិបតីភាពរបស់ឯកឧត្តម ឡាយ ឫទ្ធី ជាអគ្គនាយករងគយនិងរដ្ឋាករ ហើយក៏មានការផ្តាំផ្ញើដល់មន្ត្រីគយឲ្យខិតខំលុបបំបាត់អំពើរត់ពន្ធទំនិញ និងប្រមូលពន្ធចូលរដ្ឋឲ្យបានលើសពីការកំណត់។ ចាប់តាំងពីពេលនោះមកលោក មួង ដារ៉ា មានអំណាចពេញដៃហើយគាត់អាចបំពេញមហិច្ឆតារបស់ខ្លួនយ៉ាងរលូនល្អក្នុងការប្រមូលលុយច្រកហោប៉ៅផ្ទាល់ខ្លួនតាមរយៈការឃុបឃិតឲ្យទំនិញខុសច្បាប់ ឬទំនិញគេចពន្ធឆ្លងកាត់ច្រកជ្រៃធំកាន់តែគគ្រឹកគគ្រេង។
សកម្មភាពដឹកជញ្ជូនទំនិញមកពីប្រទេសវៀតណាម ដូចជាគ្រឿងសំណង់របស់មន្ត្រីយោធាធំៗ សម្ភារៈកសិកម្មដែលក្នុងនោះមាន ថ្នាំកំចាត់សត្វល្អិត ជីកសិកម្ម ចំណីសត្វ បន្លែ រាប់ទាំងការដឹកជញ្ជូនជ្រូកនិងត្រីខុសច្បាប់ដែលឆ្លងកាត់ច្រកជ្រៃធំ របស់ក្រុមឈ្មួញទាំងតូចទាំងធំ ទាំងផ្លូវទឹកនិងផ្លូវគោក ទោះជាបង់ពន្ធមិនគ្រប់ឬការក្លែងភេទទំនិញសុទ្ធតែកើតចេញពីការឃុបឃិតរបស់លោក មួង ដារ៉ា ដែលមិនសូវខ្វល់ខ្វាយពីបទបញ្ជារបស់ប្រមុខរដ្ឋាភិបាល អំពីការបង្កើនចំណូលពន្ធឬការលុបបំបាត់អំពើពុករលួយដែលកំពុងកើតមានយ៉ាងរាលដាលនោះទេ ។ បើនិយាយពីការដឹកជញ្ជូនឈើប្រណីត សត្វព្រៃ ផលកសិកម្ម ជាពិសេសស្ករសចុះទៅប្រទេសវៀតណាមដែលមានរូបភាពកាន់តែគគ្រឹកគគ្រេងស្ទើរខូងផ្លូវជាតិទៅហើយនោះ ប្រសិនបើគ្មានការឯកភាពពីលោក មួង ដារ៉ា ទេនោះ មិនអាចធ្វើទៅបានទេ។
ពេលខ្លះឈ្មួញមួយចំនួនបានរអ៊ូរទាំថា លោក មួង ដារ៉ា ក្ដោបចំណូលគ្រប់បែបយ៉ាងពីការនាំចេញទំនិញខុសច្បាប់ចុះទៅប្រទេសវៀតណាម ឬការឡើងទំនិញមកកាន់ប្រទេសកម្ពុជា ដែលសមត្ថកិច្ចនិងជំនាញដទៃទៀតបានត្រឹមតែទទួលរបបឧបត្ថម្ភពីជំនាញគយ ឬប្រធានច្រកព្រំដែនទ្វេភាគីតែប៉ុណ្ណោះ គ្មានសិទ្ធិសម្រេចអ្វីទេ ហើយមន្ដ្រីជំនាញណាម្នាក់ដែលហ៊ានកកូរកកាយឬជំទាស់ជាមួយ នឹងមានបញ្ហា ។ សម្រាប់ទំនិញខុសច្បាប់មួយចំនួនទៀត ដូចជាត្រីឆ្ដោដែលឈ្មួញដឹកជញ្ជូន ឆ្លងកាត់ច្រកព្រំដែនជ្រៃធំពីប្រទេសវៀតណាមស្ទើរផ្ដាច់ មុខទៅហើយនោះ សុទ្ធតែមានទំនាក់ទំនងល្អបំផុតជាមួយលោក មួង ដារ៉ា ព្រោះត្រីឆ្ដោត្រូវបានចាត់ទុកជាទំនិញខុសច្បាប់អាចនាំចូលយ៉ាងអនាធិបតេយ្យដោយ គ្រាន់តែបង់ប្រាក់ ឱ្យជំនាញគយ និងជំនាញជលផល តាមរបៀបពុករលួយ មិនតម្រូវឱ្យចុះក្នុងបញ្ជីបង់ពន្ធទេ គឺជារឿងងាយស្រួលបំផុតដែលក្រុមឈ្មួញ អាចរកស៊ីដឹកជញ្ជូនត្រីខុសច្បាប់មកពីប្រទេសវៀតណាមកាន់តែអនាធិបតេយ្យខ្លាំងឡើង៕
No comments:
Post a Comment
yes