ទិដ្ឋភាពនៅកំពង់ផែស្វយ័តខេត្តព្រះសីហនុ ដែលជាកំពង់ផែអន្តរជាតិ
ដ៏ធំរបស់ប្រទេសកម្ពុជា។ ដោយឡែកគម្រោងកំពុងផែកំពតតម្លៃ$៨០លានត្រូវបានពន្យារ
ភ្នំពេញៈគម្រោងសាងសង់កំពង់ផែ ទឹកជ្រៅនៅខេត្តកំពតត្រូវបានពន្យារពេល ដោយមិនបានកំណត់ថានឹងចាប់ផ្តើមសាងសង់នៅពេលណាទេ ព្រោះក្រុមហ៊ុនត្រូវការពេលវេលាសមស្របក្នុងការរៀបចំ សម្ភារសាងសង់ឲ្យបានរៀបរយ។ នេះបើតាមតំណាងក្រុមហ៊ុន។
គម្រោងកំពង់ផែថ្មីនេះជាការវិនិយោគរបស់ក្រុមហ៊ុនផែកំពត ដែលមានទីតាំងជិតតំបន់សេដ្ឋកិច្ចពិសេសខេត្តកំពត។
លោក វិញ ហួរ ប្រធានក្រុមហ៊ុនផែកំពត បានប្រាប់ភ្នំពេញ ប៉ុស្តិ៍កាលពីថ្ងៃម្សិលមិញថា ផែនការសាងសង់កំពង់ផែនេះត្រូវបានពន្យារពេល ដោយសារតែការធ្លាក់ភ្លៀងច្រើន និងសម្ភារសម្រាប់សាងសង់មិនទាន់រៀបរយនៅឡើយ។ លោកថា «យើងកំពុងរៀបចំឲ្យស្រួលបួលសិន ហើយវាត្រូវការមួយរយៈពេលទៀត។ ខ្ញុំកំពុងនៅខេត្តកំពត និងរៀបចំជើងការណ៍នៅទីនេះឲ្យស្រួលបួល។ ខ្ញុំមិនទាន់ដឹងពេលវេលាចាប់ផ្តើមទេ»។
កាលពីដើមខែឧសភា ឆ្នាំនេះ ប្រធានក្រុមហ៊ុនកំពង់ផែកំពតបានប្រាប់កាសែតភ្នំពេញ ប៉ុស្តិ៍ថា ការសាងសង់កំពង់ផែទឹកជ្រៅនៅខេត្តកំពតនឹងចាប់ផ្តើមនៅខែ កញ្ញា ដែលនឹងចំណាយទឹកប្រាក់៨០លានដុល្លារអាមេរិក។
តាមលោក វិញ ហួរ ការសាងសង់កំពង់ផែនេះនឹងត្រូវប្រើរយៈពេល១៨ខែ។ តំបន់កំពង់ផែកំពតនេះ ត្រូវគេគ្រោងរៀបចំជាតំបន់សេដ្ឋកិច្ចពិសេសដែលរួមមាន រោងចក្រ ស្បែកជើង រោងចក្រកាត់ដេរ និង រោងចក្រដំឡើងរថយន្ត លើផ្ទៃដី១ពាន់ហិកតា ស្ថិតក្នុងឃុំកោះតូច ស្រុកទឹកឈូ ខេត្តកំពត។
បន្ទាប់ពីការស្ថាបនារួច កំពង់ផែនេះនឹងមានជម្រៅទឹក១២ ម៉ែត្រ ហើយកប៉ាល់ដែលចូលចតបានអាចផ្ទុកទម្ងន់រហូតដល់ចំនួន២ម៉ឺនតោន ។
លូ គឹមឈន់ អគ្គនាយកកំពង់ផែស្វយ័តខេត្តព្រះសីហនុ បាននិយាយថា ការដឹកជញ្ជួនទំនិញតាមកំពង់ផែសមុទ្រនៃខេត្តព្រះសីហនុ បច្ចុប្បន្ននៅមិនទាន់មានភាពចង្អៀតនៅឡើយនាពេល ព្រោះទំនិញឆ្លងកាត់ក្នុងមួយឆ្នាំមានចំនួនតែ២,៨លានតោនប៉ុណ្ណោះ ខណៈដែលសមត្ថភាពកំពង់ផែមានរហូតដល់ទៅ៣,៥លានតោនក្នុងមួយឆ្នាំ។
ទោះ ជាយ៉ាងណាក៏ដោយ ការស្ថាបនាកំពង់ផែថ្មីនេះក៏ជាការរួមចំណែកដល់វិស័យសេដ្ឋកិច្ចប្រទេសជាតិដែលប្រកាន់យកទីផ្សារសេរីផងដែរ ហើយវាក៏មិនបណ្តាលឲ្យមានការប្រកួតប្រជែងលើផ្នែកសេវាកម្មទេ តែសំខាន់គឺត្រូវពង្រឹងសេវាកម្មឲ្យបានប្រសើរដល់អតិថិជន។
អភិបាលខេត្តកំពត លោក ខូយ ឃុនហ៊ួរ បានឲ្យដឹងថា ខេត្តកំពតជាខេត្តពហុវិស័យទៅថ្ងៃអនាគត ហើយកំពង់ផែនេះនឹងមិនត្រឹមតែបម្រើឲ្យសកម្មភាពសេដ្ឋកិច្ច កម្ពុជានៅខេត្តកំពតតែមួយនោះទេ តែវានឹងបម្រើឲ្យសេដ្ឋកិច្ចប្រទេសកម្ពុជាទាំងមូលផងដែរ។
លោក ឃុនហ៊ួរ បានលើកឡើងថានៅខេត្តកំពតមានឧស្សាហកម្មធុនធ្ងន់ជាច្រើន ដូចជា រោងចក្រស៊ីម៉ងត៍ រោងម៉ាស៊ីនកិនស្រូវ និងជាតំបន់ទេសចរណ៍ដ៏មានសក្តានុពលជាដើម៕
No comments:
Post a Comment
yes