លោក ហេង ឈាង និងអ្នកស្រី ទេព កុលាប ពេលជួបគ្នានៅតុលាការកំពូល
ភ្នំពេញៈ យ៉ាងហោចមាននិស្សិតសាស្ត្រាចារ្យ ប្រមាណ ២០០០នាក់ នឹងទៅស្វាគមន៍អ្នកស្រី ទេព កុលាប ដែលជាសាកលវិទ្យាធិការសាកលវិទ្យាល័យភ្នំពេញអន្តរជាតិ(PPIU)ដែលនឹងចាកចេញពីមន្ទីរពេទ្យមិត្តភាពខ្មែរ-សូវៀត នៅរសៀលថ្ងៃចន្ទនេះ បន្ទាប់តុលាការកំពូល បានលុបចោលការចោទប្រកាន់អ្នកស្រី និងបញ្ជាឲ្យដោះលែងគាត់ពីពន្ធនាគារជាបន្ទាន់ បន្ទាប់ពីការ ជំនុំជម្រះជាង៥ម៉ោងកាលពីថ្ងៃសុក្រ។
សាច់ញាតិស្និទ្ធនឹងអ្នកស្រី ទេព កុលាប បានប្រាប់ភ្នំពេញ ប៉ុស្តិ៍ថា នៅរសៀលថ្ងៃចន្ទនេះ និស្សិតសាស្ត្រាចារ្យសាកលវិទ្យាល័យភ្នំពេញអន្តរជាតិ យ៉ាងតិចក៏ ២០០០ នាក់ នឹងមកជួបជុំគ្នាក្នុងពិធីស្វាគមន៍អ្នកស្រីនាយិកា ដែលត្រូវបានដោះលែងពីការឃុំឃាំង និងចេញពីមន្ទីរពេទ្យមិត្តភាពខ្មែរ-សូវៀត ដែលអ្នកស្រីស្នាក់ព្យាបាលជំងឺ ក្រោមការយាមការពារពីសំណាក់ឆ្មាំពន្ធនាគារ។
តាមប្រភពដដែលនេះថា៖ «នៅម៉ោង៣រសៀលថ្ងៃចន្ទ នឹងមានពិធីស្វាគមន៍សំណេះ សំណាល ជាមួយ អ្នកស្រីនាយិកា ទេព កុលាប រៀបចំនៅក្នុងមន្ទីរពេទ្យរុស្ស៊ី។ និស្សិត សាស្ត្រាចារ្យ ប្រមាណ២ពាន់នាក់នឹងជួបជុំគ្នានៅទីនោះ ខណៈដែលគាត់ទើបទទួលបានយុត្តិធម៌ពីតុលាការកំពូលពីថ្ងៃសុក្រ»។
លោក ហេង ឈាង វ័យ៤៣ឆ្នាំ អតីតអគ្គនាយករងនៃក្រុមហ៊ុន អានកូ និងភរិយាគឺអ្នកស្រី ទេព កុលាប ត្រូវបានជំនុំជម្រះដោយក្រុមប្រឹក្សាចៅក្រមដែលមានសមាជិក៥រូប ដែលដឹកនាំដោយអនុប្រធានតុលាការកំពូលលោក ឃឹម ប៉ុណ្ណ ដែលជាប្រធានចៅក្រមជំនុំជម្រះ និងលោក ចាន់ ដារ៉ារស្មី ជាតំណាងមហាអយ្យការអមតុលាការកំពូល។
លោក ឃឹម ប៉ុណ្ណ បានថ្លែងថា៖ «ផ្អែកតាមសវនាការ និងអង្គច្បាប់ តុលាការកំពូលយល់ថា ការសម្រេចចិត្តរបស់សាលាដំបូងរាជធានី និងសាលាឧទ្ធរណ៍សម្រាប់ ហេង ឈាង និង ទេព កុលាប គឺមិនត្រឹមត្រូវទេ ព្រោះបានធ្វើឡើងដោយផ្អែកលើរបាយការណ៍សវនកម្មរបស់លោក កាក់ កី ដែលបញ្ជាក់តែប្រតិបត្តិការចំណូលតែភាគីម្ខាង ហើយរបាយការណ៍លោក កាក់ កី ត្រូវបានបដិសេធពីក្រុមប្រឹក្សាជាតិគណនេយ្យ»។
លោកបញ្ជាក់ថា៖ «តុលាការកំពូលពិនិត្យឃើញថា អ្នកស្រី ទេព កុលាប ពុំមានទោសនៅក្នុងរឿងក្តីនេះទេ។ ដូច្នេះ តុលាការសម្រេចលុបការចោទប្រកាន់ទាំងអស់ប្រឆាំងនឹងអ្នកស្រី និងបញ្ជាឲ្យដោះលែងពីពន្ធនាគារជាបន្ទាន់»។ តុលាការយល់ឃើញថា ហេង ឈាង មានតម្រុយនៃពិរុទ្ធភាព ដូច្នេះ តុលាការ សម្រេចបន្តឃុំខ្លួន ហេង ឈាង នៅក្នុងពន្ធនាគារ ដើម្បីធានាពីវត្តមានគាត់ សម្រាប់សវនាការនៅពេលខាងមុខ ហើយរឿងក្តីនេះ ត្រូវបង្វែរទៅឲ្យសាលាឧទ្ធរណ៍ធ្វើការស៊ើបអង្កេតឡើងវិញ និងស្រាវជ្រាវ អំពីចំនួនទឹកប្រាក់លម្អៀងចំនួនប្រាក់ ៦៣៣ ៣៤៥ដុល្លារ នៅក្នុងក្រុមហ៊ុន អានកូ»។
តុលាការ កំពូល ក៏បានបិទផ្លូវតវ៉ាប្រាក់របស់(ឧកញ៉ា កុក អាន) ជាដើមបណ្តឹងពីលោក ហេង ឈាង និងអ្នកស្រី ទេព កុលាប ព្រោះលោក កុក អាន បានដកបណ្តឹងរដ្ឋប្បវេណីរបស់គាត់តាំងពីឆ្នាំ២០១១ មក។
លោក អ៊ន ហ៊ីង មេធាវីចុងចោទរបស់លោក ហេង ឈាង និងអ្នកស្រី ទេព កុលាប បានសាទរជាមួយនឹងសេចក្តីសម្រេចរបស់តុលាការកំពូល ហើយថា សេចក្តីសម្រេចនេះ មានយុត្តិធម៌ និងបានធ្វើឡើងស្របតាមច្បាប់។
លោកប្រាប់ក្រុមអ្នកកាសែតថា៖«ខ្ញុំ គិតថា សេចក្តីសម្រេចរបស់តុលាការនេះ នឹងជួយពង្រឹងការជឿទុកចិត្តរបស់ក្រុមវិនិយោគិន ឲ្យមានទំនុកចិត្តនៅកម្ពុជា»។
អ្នកស្រី ទេព កុលាប បានប្រាប់ក្រុមអ្នកយកព័ត៌មាន បន្ទាប់ពីការប្រកាសសាលក្រមរបស់តុលាការកំពូលថា អ្នកស្រីរីករាយណាស់ ចំពោះការដោះលែងឲ្យមានសេរីភាពវិញនេះ។ អ្នកស្រីបន្តថា សេចក្តីសម្រេចរបស់តុលាការកំពូល គឺមានយុត្តិធម៌សម្រាប់អ្នកស្រីនិងគ្រួសារ។
អ្នកស្រីបន្តថា ៖ «យ៉ាងណា ខ្ញុំ មានការខកចិត្តជាខ្លាំង ព្រោះខ្ញុំ ជាមនុស្សស្លូតត្រង់ ប៉ុន្តែខ្ញុំ ត្រូវបានចាប់ខ្លួននិងដាក់គុកជាងមួយឆ្នាំយ៉ាងអយុត្តិធម៌»។ អ្នកស្រី ឲ្យដឹងថា៖ «ស្វាមីខ្ញុំ មិនបានប្រព្រឹត្តអ្វីខុស ដូចគេចោទទេ។ គាត់ ក៏ជាមនុស្សស្លូតក្នុងរឿងក្តីនេះ។ ខ្ញុំសង្ឃឹមថាគាត់ នឹងត្រូវដោះលែងឆាប់ៗនេះ បន្ទាប់ពីបញ្ចប់ការស៊ើបអង្កេតរបសសាលាឧទ្ធរណ៍»។
សាច់ញាតិអ្នកស្រី ទេព កុលាប ម្នាក់និយាយថា អ្នកស្រី នឹងត្រូវគេដោះលែងពីមន្ទីរឃុំឃាំងនិងចេញពីមន្ទីរពេទ្យនៅ ថ្ងៃចន្ទនេះ។ បន្ទាប់មកលោកស្រី នឹងឡើងយន្តហោះទៅប្រទេសសិង្ហបុរីដើម្បីពិនិត្យសុខភាពនៅទីនោះ ១សប្តាហ៍។
លោក ឡុង ដារ៉ា មេធាវីការពារក្តីលោកឧកញ៉ា កុក អាន បានថ្លែងថា សេចក្តីសម្រេចរបស់តុលាការកំពូលមិនយុត្តិធម៌ទេ សម្រាប់កូនក្តីរបស់លោក ពីព្រោះវាមិនបានធ្វើឡើងទៅតាមច្បាប់។
លោកប្រាប់ភ្នំពេញ ប៉ុស្តិ៍ថា៖ «ខ្ញុំមិនអាចទទួលយកសេចក្តីសម្រេចរបស់តុលាការកំពូលនេះបានទេ។ ឥឡូវនេះខ្ញុំកំពុងពិចារណាលើសេចក្តីសម្រេចរបស់តុលាការកំពូល ដើម្បីចាត់វិធានការផ្លូវច្បាប់ប្រឆាំងនឹងសេចក្តីសម្រេចនេះ»។
លោក ហេង ឈាង និងអ្នកស្រី ទេព កុលាប ត្រូវចាប់ខ្លួននៅថ្ងៃទី១៨ ខែមិថុនា ឆ្នាំ២០១០ ក្រោមបណ្តឹងចោទពីបទរំលោភលើសេចក្តីទុកចិត្តពីលោកឧកញ៉ា កុក អាន។ នៅថ្ងៃទី១២ មីនា ឆ្នាំ២០១២ តុលាការឧទ្ធរណ៍បានកាត់ទោសលោក ហេង ឈាង និងអ្នកស្រី ទេព កុលាប ឲ្យជាប់ពន្ធនាគារ៣ឆ្នាំម្នាក់ៗ ហើយបញ្ជាឲ្យប្រគល់ ប្រាក់សរុបចំនួន ៥៨ ៩៧៣ ២៦៥,២៨ ដុល្លារនិងប្រាក់សំណងជំងឺចំនួន ៥ម៉ឺនដុល្លារអាមេរិក ទៅឧកញ៉ា កុក អាន ជាដើមបណ្តឹង៕
No comments:
Post a Comment
yes