លោកនាយករដ្ឋមន្ត្រី ហ៊ុន សែន បានសម្រេចលុបចោលលិខិតបទដ្ឋាននានា ដែលបានចេញកន្លងទៅ ដើម្បីទារពន្ធប្រាក់កម្រៃបន្ថែមពីប្រជាពលរដ្ឋ។
មន្ត្រីអង្គការសង្គមស៊ីវិល ហៅការសម្រេចនេះថា ជាសញ្ញាមួយថ្មី ដើម្បីបំពេញសេចក្ដីត្រូវការជូនពលរដ្ឋ។ ប៉ុន្តែ ពួកគេស្នើឲ្យរដ្ឋាភិបាលកម្ចាត់អំពើពុករលួយឲ្យបានឆាប់បំផុត ទើបពលរដ្ឋមានសេចក្ដីសុខពិតប្រាកដ។
មន្ត្រីអង្គការសង្គមស៊ីវិលយល់ថា ការសម្រេចរបស់រដ្ឋាភិបាល អាចធ្វើរាំងស្ទះ ប្រសិទ្ធភាពការងាររបស់មន្ត្រី និងអាចបង្កឲ្យមានអំពើពុករលួយថែមទៀត។
នៅក្នុងសេចក្ដីប្រកាសព័ត៌មានស្ដីពីលទ្ធផល នៃកិច្ចប្រជុំគណៈរដ្ឋមន្ត្រី កាលពីថ្ងៃទី ២៦ ខែតុលា ឲ្យដឹងថា លោកនាយករដ្ឋមន្ត្រី ហ៊ុន សែន បានដាក់កំហិតឲ្យក្រសួងសេដ្ឋកិច្ច និងហិរញ្ញវត្ថុ អង្គភាពប្រឆាំងអំពើពុករលួយ ក្រសួងកសិកម្ម រុក្ខា ប្រមាញ់ និងនេសាទ និងក្រសួង-ស្ថាប័នពាក់ព័ន្ធផ្សេងៗ ទៀត កែសម្រួល ឬលុបចោលនូវលិខិតបទដ្ឋាន ដែលក្រសួង និងស្ថាប័នទាំងនោះ បានចេញកាលពីពេលកន្លងទៅ ស្ដីពីការយកកម្រៃមិនចាំបាច់នានា ដែលអាចបង្កផលប៉ះពាល់ដល់ជីវភាពរបស់ប្រជាពលរដ្ឋ។
ការដាក់កំហិតនេះ គឺយ៉ាងយូរបំផុតត្រឹមថ្ងៃទី ៣១ ខែធ្នូ ឆ្នាំ ២០១២។ ប៉ុន្តែ មិនមានមន្ត្រីណាម្នាក់បញ្ជាក់ឲ្យបានច្បាស់លាស់ពីលិខិតបទដ្ឋាន ដែលលោកនាយករដ្ឋមន្ត្រី ហ៊ុន សែន លើកឡើងនោះទេ។
ការដាក់កំហិតនេះ គឺយ៉ាងយូរបំផុតត្រឹមថ្ងៃទី ៣១ ខែធ្នូ ឆ្នាំ ២០១២។ ប៉ុន្តែ មិនមានមន្ត្រីណាម្នាក់បញ្ជាក់ឲ្យបានច្បាស់លាស់ពីលិខិតបទដ្ឋាន ដែលលោកនាយករដ្ឋមន្ត្រី ហ៊ុន សែន លើកឡើងនោះទេ។
ទោះជាយ៉ាងណាក៏ដោយ មន្ត្រីសម្របសម្រួលបណ្តាញរួបរួម ដើម្បីគណនេយ្យភាពសង្គម អាស៊ីបូព៌ា និងអាស៊ីប៉ាស៊ីហ្វិច ប្រចាំនៅកម្ពុជា លោក សន ជ័យ មានប្រសាសន៍ថា លោកសូមអបអរសាទរ ចំពោះការលើកឡើងរបស់លោកនាយករដ្ឋមន្ត្រី។ ប៉ុន្តែ ការសម្រេចទាំងឡាយ ដែលរារាំងដល់ការយកកម្រៃផ្សេងៗ ពីពលរដ្ឋ អាចជាកាំបិតមុខពីរសម្រាប់បំបាក់ទឹកចិត្តមន្ត្រីរាជការ ដែលប្រាក់បៀវត្សទាប និងបង្កភាពស្មុគស្មាញដល់ពលរដ្ឋក្នុងការស្វែងរកសេវាសាធារណៈ នាំឲ្យពលរដ្ឋបង្ខំចិត្តសូកប៉ាន់មន្ត្រី ដើម្បីបានទទួលសេវាសាធារណៈថែមទៀត។
លោកបន្តថា ដំណោះស្រាយល្អបំផុត គឺជាការគ្រប់គ្រងចំណូលពន្ធឲ្យមានប្រសិទ្ធភាព ដើម្បីយកប្រាក់លើកទឹកចិត្តមន្ត្រី និងផ្ដល់សេវាជូនពលរដ្ឋឲ្យបានប្រសើរ។ លោក សន ជ័យ បញ្ជាក់ថា ជម្រើសល្អបំផុត រដ្ឋាភិបាលត្រូវតែរៀបចំតារាងតម្លៃសេវាសាធារណៈរបស់រដ្ឋ ឲ្យបានគ្រប់ក្រសួងមន្ទីរនៅទូទាំងប្រទេសឲ្យបានឆាប់បំផុត ទើបអាចទប់ស្កាត់អំពើពុករលួយ និងបង្កើនកម្រិតជីវភាពរបស់ពលរដ្ឋបាន។
លោក សន ជ័យ៖ «អត់មានជារូបមន្តអត់មានច្បាប់ទម្លាប់អីទេ។ អ្នកមានទារច្រើនអ្នកក្រអត់ទទួលបានសេវាអ៊ីចឹងទៅ។ និយាយរួមទៅ ការលុបបំបាត់ការយកកម្រៃរបស់ពលរដ្ឋ ដែលទទួលសេវាហ្នឹង អាចប៉ះពាល់ខ្លះដែរ»។
លោក សន ជ័យ បន្តថា ការបញ្ជារបស់លោកនាយករដ្ឋមន្ត្រី ជារឿងល្អមួយ។ ប៉ុន្តែ អ្វីដែលមហាជនប្រាថ្នាចង់បាននោះ គឺប្រសិទ្ធភាពនៃបទបញ្ជា ដែលផ្ដល់ប្រយោជន៍ជូនពលរដ្ឋ៕
No comments:
Post a Comment
yes