នៅគ្រាដែលពលរដ្ឋខ្មែរគ្រប់មជ្ឈដ្ឋាននៅក្នុង និងក្រៅប្រទេសកម្ពុជា កំពុងតែសម្ដែងការសោកស្ដាយ និងក្រៀមក្រំ ចំពោះការសោយទិវង្គតរបស់ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ មេដឹកនាំនៃប្រទេសមហាអំណាចមួយចំនួន និងប្រទេសខ្លះនៅតំបន់អាស៊ី ក៏ចូលរួមមរណទុក្ខដែរ។
១-មេសា-២០១២៖ ប្រធានាធិបតីចិន លោក ហ៊ូ ជិនតាវ (Hu Jintao) នៅអាកាសយានដ្ឋានអន្តរជាតិខេត្តសៀមរាប។
អ្នកនាំពាក្យក្រសួងការបរទេសសហរដ្ឋអាមេរិក អ្នកស្រី វីកថូរៀ ណូឡែន (Victoria Nuland) បានចេញសេចក្ដីថ្លែងការណ៍ជាបន្ទាន់មួយ នៅថ្ងៃទី១៥ ខែតុលា ថា សហរដ្ឋអាមេរិកសំដែងការក្រៀមក្រំចំពោះការចូលទិវង្គតរបស់ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ នៃប្រទេសកម្ពុជា។
អ្នកស្រីបានបន្តថា យើងសូមរំលែកទុក្ខក្រៀមក្រំ ថ្វាយចំពោះព្រះករុណា ព្រះបាទសម្ដេចព្រះបរមនាថ នរោត្តម សីហមុនី និងព្រះរាជអគ្គមហេសី នរោត្តម មុនីនាថ សីហនុ ព្រមទាំងព្រះរាជវង្សានុវង្សទាំងអស់ និងប្រជាពលរដ្ឋខ្មែរនានា ដែលកាន់មរណទុក្ខក្រៀមក្រំនេះ។
ចំណែកឯរដ្ឋាភិបាលប្រទេសសិង្ហបុរី បានចេញសេចក្ដីថ្លែងការណ៍ជាបន្ទាន់មួយដែរថា ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ គឺជាវីរក្សត្រដែលបានធ្វើពលីកម្មក្នុងឆាកជីវិតសម្រាប់ភាពប្រសើរឡើងនៃប្រទេសកម្ពុជា និងប្រជារាស្ត្រខ្មែរ។
សេចក្ដីថ្លែងការណ៍បន្តថា ព្រះមហាវីរក្សត្រខ្មែរនឹងត្រូវបានចងចាំ និងគោរពទាំងនៅកម្ពុជា និងអន្តរជាតិចំពោះការដឹកនាំដោយគ្មានការនឿយហត់ ដើម្បីឲ្យប្រទេសកម្ពុជា ឆ្ពោះទៅកាន់ការផ្សះផ្សាជាតិ និងភាពរុងរឿង។ ព្រះរាជកិច្ចដឹកនាំរបស់ព្រះមហាវីរក្សត្រកន្លងមក បានចាក់គ្រឹះសំរាប់មិត្តភាពជិតស្និទ្ធ និងយូរអង្វែងរវាងកម្ពុជា និងប្រទេសសិង្ហបុរី។
មួយវិញទៀត មន្ត្រីជាន់ខ្ពស់នៃទីស្ដីការគណៈរដ្ឋមន្ត្រី និងក្រសួងព័ត៌មាន បានបង្ហើបឲ្យដឹងថា ប្រធានាធិបតីចិន លោក ហ៊ូ ជិនតាវ (Hu Jintao) បានចេញសេចក្ដីថ្លែងការណ៍ជាបន្ទាន់មួយ ដើម្បីរំលែកទុក្ខក្រៀមក្រំចំពោះការចូលទិវង្គតរបស់ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ ថ្មីៗនេះ។
ចំណែកសមាជិកទាំងអស់នៃគណៈកម្មការអចិន្ត្រៃយ៍គណបក្សកុម្មុយនិស្តចិន ក៏បានមកសម្ដែងការគោរពដល់ព្រះវិញ្ញាណក្ខន្ធនៅទីក្រុងប៉េកាំង ប្រទេសចិន។
អគ្គលេខាធិការនៃអង្គការសហប្រជាជាតិ លោក បាន គីមូន (Ban Ki-moon) បានមានប្រសាសន៍ថា លោកទទួលស្គាល់ថា ព្រះរាជកិច្ចដឹកនាំ និងពលីកម្មយូរអង្វែងកន្លងមកចំពោះប្រទេសជាតិ និងមរតកនៃការបង្រួបបង្រួមជាតិ បាននាំមកនូវការគោរពពីប្រជារាស្ត្រខ្មែរ និងអន្តរជាតិ។ លោកបានសង្ឃឹមថា មរតកទាំងនេះនាំឲ្យកម្ពុជា ឆ្ពោះទៅកាន់ការផ្សះផ្សាជាតិ និងការឈានឆ្ពោះទៅរកយុត្តិធម៌ដែរ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ បានមានប្រសាសន៍ថា កាលពីសម័យក្រោមការដឹកនាំរបស់ព្រះមហាវីរក្សត្រនោះ កេរ្តិ៍ឈ្មោះកម្ពុជា និងកេរ្តិ៍ឈ្មោះរបស់ព្រះអង្គត្រូវបានអន្តរជាតិទទួលស្គាល់សុះសាយទាំងនៅតំបន់អាស៊ី និងពិភពលោក៖ «ឥឡូវយើងបាត់បង់អ៊ីចឹងទៅ តើអ្នកដឹកនាំក្រោយៗ គួរថែរក្សា ហើយនិងធ្វើតាម ឬយកតាមស្មារតីសាមគ្គីជាតិ ផ្សះផ្សាជាតិ ឯកភាពជាតិ ហើយជាពិសេសនៅក្នុងបរិបទនយោបាយ ជាពិសេសនៅតំបន់អាស៊ីនេះ ដែលមានភាពតានតឹង»។
ចំពោះការចូលទិវង្គតរបស់ព្រះមហាវីរក្សត្រនេះ រដ្ឋាភិបាលកម្ពុជា កំពុងយកចិត្តទុកដាក់រៀបចំការចូលរួមគោរពព្រះវិញ្ញាណក្ខន្ធព្រះបរមសព៕
No comments:
Post a Comment
yes