ភ្នំពេញៈ តារាចម្រៀង ពៅ បញ្ញាពេជ្រ ដែលធ្លាក់ខ្លួនពិការអស់រយៈពេល៧ឆ្នាំ ក្រោយទទួលរងការបាញ់ប្រហារពីខ្មាន់កាំភ្លើងមិនស្គាល់អត្តសញ្ញាណ ហើយកំពុងជួលផ្ទះសម្រាកព្យាបាលនៅប្រទេសថៃនោះ នឹងវិលមកកាន់ប្រទេសកំណើតក្នុងពេលឆាប់ៗនេះ ដោយសារតែរូបនាង និងក្រុមគ្រួសារគ្មានលទ្ធភាពបន្តសម្រាកព្យាបាល ហើយជំនួយពីសប្បុរសជនក៏ត្រូវកាត់ផ្តាច់។
គួរបញ្ជាក់ថា ខណៈពេលដែលកំពុងតែទទួលបានភាពល្បីល្បាញជាច្រើនឆ្នាំជាប់ៗគ្នា លើវិថីតារា និងកំពុងលេចចេញនូវសម្រស់កាន់តែក្មេងខ្ចី តារាចម្រៀង ពៅ បញ្ញាពេជ្រ ត្រូវបានខ្មាន់កាំភ្លើងមិនស្គាល់អត្តសញ្ញាណលួចបាញ់ប្រហារមកលើ រូបនាងយ៉ាងសាហាវកាលពីថ្ងៃទី២៣ ខែកុម្ភៈ ឆ្នាំ២០០៧ នៅវេលាម៉ោង៦ និង២០នាទីព្រឹកនៅមុខសាលាភាសាអង់គ្លេសមួយក្បែររបងក្រសួង ឧស្សាហកម្មរ៉ែ និងថាមពល បានបណ្តាលឲ្យតារារូបនេះទទួលរងរបួសយ៉ាងធ្ងន់ធ្ងរ។
តារាចម្រៀងសំឡេងរៃកណ្តឹង ក្មួយស្រីកវីជើងចាស់ ពៅ ស៊ីផូ នាងពៅ បញ្ញាពេជ្រ បន្ទាប់ពីទទួលរងការបាញ់ប្រហារត្រូវបានក្រុមគ្រួសារបញ្ជូនទៅ ព្យាបាលនៅប្រទេសវៀតណាម ហើយក្រោយមកក៏បានបញ្ជូននាងបន្តចេញទៅព្យាបាលនៅប្រទេសថៃ យ៉ាងតក់ក្រហល់បំផុត ខណៈដែលស្រមោលឃាតកនៅតែតាមយាយីនាងដល់ទីនោះ។
ក្រោយធ្លាក់ ខ្លួនក្លាយជាជនពិការ ក្តីសង្ឃឹមដែលអាចជួយសង្គ្រោះតារាចម្រៀងសំឡេងស្រួយស្រែសនាង ពៅ បញ្ញាពេជ្រ ឲ្យរួចផុតពីការអង្គុយលើរទេះ នឹងបានវិលមកច្រៀងបម្រើអារម្មណ៍ទស្សនិកជនបាននោះត្រូវបានក្រុម គ្រួសារដាក់ការសង្ឃឹមតែមួយគត់នោះគឺ «សូមឲ្យសប្បុរសជនជួយ»។ ប៉ុន្តែការដង្ហោយរកសប្បុរសជនជួយជ្រោមជ្រែងឲ្យនាងអាចមានលទ្ធភាពដើរឡើងវិញនេះ ហាក់មិនទទួលបានការចាប់អារម្មណ៍ឡើយ ខណៈដែលបងស្រីនាងសម្តែងភាពអស់សង្ឃឹមថា៖«មកទល់ពេលនេះពុំ មានសប្បុរសជន ឬអង្គការណាមួយចាប់អារម្មណ៍ និងចង់ជួយឧបត្ថម្ភដល់ការទទូចសុំការសង្គ្រោះនាំប្អូន ស្រីខ្ញុំទៅព្យាបាលនៅប្រទេសចិននោះទេ»។
បងស្រីបង្កើតតារាចម្រៀង ពៅ បញ្ញាពេជ្រ គឺអ្នកស្រី សុធារី បានលើកឡើងថា៖ «គ្រាកន្លងមក បញ្ញាពេជ្រ នាងបានបញ្ចេញខ្សែអាត់វីដេអូ ទៅដល់សហរដ្ឋអាមេរិក ក្នុងបំណងអំពាវនាវ ស្វែងរកជំនួយមកព្យាបាលនាងដែរ នៅតែមិនមានគេចាប់អារម្មណ៍»។
ដោយសារតែជំនួយដែលធ្លាប់មានត្រូវកាត់ផ្តាច់ ពេលនេះ ក្រុមគ្រួសារ នាងពៅ បញ្ញាពេជ្រ បានសម្តែងការអស់សង្ឃឹមយ៉ាងខ្លាំងថា ពេលនេះបើមិនមានសប្បុរសជន ឬសមាគមណាជួយទេនោះ ពៅ បញ្ញាពេជ្រ នឹងមិនមានថ្ងៃអាចជាសះស្បើយ រួចផុតពីអង្គុយលើរទេះរុញនោះឡើយ។
ជាមួយ ភាពអស់សង្ឃឹមនេះ អ្នកស្រីសុធារី ក៏បានបញ្ជាក់ថា៖ «បញ្ញាពេជ្រប្អូនស្រីខ្ញុំ ប្រហែលមិនយូរទេ នាងនឹងត្រូវវិលត្រឡប់មករស់នៅ និងព្យាបាលនៅក្នុងស្រុកខ្មែរវិញ នាពេលខាងមុខឆាប់ៗជាមិនខាន ព្រោះថវិកាដែលបងប្អូនក្រុមគ្រួសារបានចំណាយ គឺចង់អស់លទ្ធភាពទៅហើយ»។ ប៉ុន្តែពាក់ព័ន្ធនឹងពេលវេលាកំណត់ឲ្យច្បាស់ថានឹងមកនៅពេលណា អ្នកស្រីមិនបានបញ្ជាក់ឡើយ។ ដោយឡែកទាក់ទិនសុវត្ថិភាពអ្នកស្រីក៏សម្តែងក្តីបារម្ភដែរ តែគ្មានជម្រើសអ្វីល្អជាងនេះ។
សំណុំរឿងរបស់តារាចម្រៀង ពៅ បញ្ញាពេជ្រ ត្រូវបានគេមើលឃើញថា មកទល់នឹងពេលនេះនៅមិនទាន់ស្វែងរកមុខឃាតកឃើញនៅឡើយ មិនខុសពីសំណុំរឿងតារាចម្រៀង ទូច ស៊ុននិច តារាសម្តែង ពិសិដ្ឋ ពិលីកា នោះទេ។ បញ្ហានេះជាក្តីកង្វល់យ៉ាងធ្ងន់ធ្ងរសម្រាប់ជនរងគ្រោះ និងក្រុមគ្រួសារ។
ជុំវិញក្តីកង្វល់នេះ ភ្នំពេញ ប៉ុស្តិ៍ មិនអាចសុំការបំភ្លឺពីលោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ និងលោក ខៀវ សុភ័គ អ្នកនាំពាក្យក្រសួងមហាផ្ទៃ បានទេកាលពីម្សិលមិញ។
លោក ប៉ុល ភិធេយ្យ អតីតស្នងការរងរាជធានីភ្នំពេញដែលទើបទទួលតំណែងជាប្រធាននាយកដ្ឋាន ប្រឆាំងការជួញដូរមនុស្ស និងការពារអនីតិជន ហើយដែលធ្លាប់កាន់សំណុំរឿងនេះ បានមានប្រសាសន៍ថា៖ «ឥឡូវនេះ ខ្ញុំអត់មានកាន់សំណុំរឿងនោះទៀតទេ ខ្ញុំត្រូវបានផ្លាស់ទៅនាយកដ្ឋានក្រសួងមហាផ្ទៃហើយ»។
ដោយឡែក លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងថា ខាងលោកមិនធ្លាប់ធ្វើការលើរឿងនេះទេ តែលោកនឹងពិនិត្យបន្ថែម។
មុននេះ បងស្រីបង្កើតរបស់នាង អ្នកស្រី ពៅ ច័ន្ទសុធារី បានប្រាប់បណ្តាញព័ត៌មានក្នុងស្រុកថា គាត់បានដឹងព័ត៌មានដ៏គួរឲ្យភ្ញាក់ផ្អើលពីប្រទេសចិនថា មានមន្ទីរពេទ្យមួយ អាចព្យាបាលជំងឺខួរឆ្អឹងបញ្ញាពេជ្រ បាន។ បន្ថែមលើភាពភ្ញាក់ផ្អើលនោះអ្នកស្រី សុធារី ក៏បានបង្ហាញនូវក្តីសង្ឃឹមយ៉ាងមុតមាំថា ដំណឹងនោះវាជាក្តីសង្ឃឹមមួយគត់ ដែលអាចព្យាបាលជំងឺ បញ្ញាពេជ្រ ឲ្យសះជា រួចផុតពីស្ថានភាព អង្គុយលើរទេះនោះ។
ប៉ុន្តែក្តី សង្ឃឹមនេះ បែរជាបន្ថែមបន្ទុកនៃក្តីកង្វល់ ដល់ក្រុមគ្រួសារយ៉ាងធ្ងន់ មួយទៀត ខណៈដែលជីវភាពក្រុមគ្រួសារទាំងមូលក៏ខ្សត់ខ្សោយនោះ។ អ្នកស្រី ពៅ ច័ន្ទសុធារី បានឲ្យដឹងថា ក្រុមគ្រួសារពេលនេះមិនមានលទ្ធភាពណា អាចនាំយកប្អូនបញ្ញាពេជ្រ ទៅព្យាបាលបាននៅប្រទេសចិននោះបានទេ ព្រោះថាការព្យាបាលនោះ ត្រូវការលុយច្រើន លើសពីថ្លៃព្យាបាលរាល់ថ្ងៃដល់ទៅ២០ទៅ៣០ដងឯណោះ។
អ្នកស្រី បានបញ្ជាក់ឲ្យដឹងថា៖«ការព្យាបាលនោះ ត្រូវចំណាយប្រាក់ច្រើនមែនទែន ខណៈដែលថ្នាំត្រូវព្យាបាល ប្អូនស្រី បញ្ញាពេជ្រ មួយម្ជុលមានតម្លៃថ្លៃដល់ទៅ ៣៥ ០០០ដុល្លារអាមេរិកឯណោះ។ ការព្យាបាលនោះទៀតសោធ មិនដឹងថាត្រូវចាក់ប៉ុន្មានម្ជុលនោះដែរ»។
ភាពស្ងាត់ស្ងៀមមិនមាន សប្បុរសជនឬសមាគមចាប់អារម្មណ៍ នឹងការអំពាវនាវរបស់តារាចម្រៀង ដែលរងគ្រោះ ព្រោះខ្មាន់កាំភ្លើងបាញ់ប្រហារក្នុងគោលដៅផ្តាច់ជីវិតនោះ ត្រូវបានអ្នកស្រីសុធារី និយាយថា ពៅ បញ្ញាពេជ្រ នាងបានឃ្លាតឆ្ងាយពីឆាកសិល្បៈយូរហើយ គេភ្លេចមុខនាងហើយ រហូតមានអ្នកខ្លះមិនដឹងថាពៅ បញ្ញាពេជ្រ ជានរណា គាត់ជាអ្វីពីមុនមក។
យ៉ាងណាមិញ អ្នកស្រី សុធារី បានថ្លែងថា កាលពីដំបូងៗនាងទទួលបានការជួយជ្រោមជ្រែង និង ក្តីអាណិតអាសូរពីសប្បុរសជនគ្រប់ទិសទី ចូលរួមជួយឧបត្ថម្ភនាងច្រើនមែន តែពេលនោះយើងមិនទាន់បានដឹងថា ពេទ្យនៅប្រទេសណាពូកែ ហើយមានថ្នាំព្យាបាលជំងឺនាងនោះទេ។ ប៉ុន្តែពេលនេះ ខណៈដំណឹងថា នៅប្រទេសចិនមានថ្នាំអាចជួយសង្គ្រោះនាងបាន តែបែរជាមិនមានលទ្ធភាព ក្នុងការនាំនាងទៅទទួលការព្យាបាល ចំណែកឯសប្បុរសជនក៏លែងមានអ្នកចាប់អារម្មណ៍ដែរ។
ពៅ បញ្ញាពេជ្រ នៅពេលថ្មីៗនេះ ក្រៅពីសរសេរសូមអរគុណដល់បងប្អូនទាំងអស់គ្នាទាំងនៅទីជិត ទីឆ្ងាយ នាងក៏បានត្អូញត្អែរ ប្រាប់មិត្តភក្ដិតាមបណ្តាញហ្វេសប៊ុកឲ្យដឹងពីសុខភាពនាងផងដែរ ដោយនាងប្រាប់ថា៖«នាងខ្ញុំសុខសប្បាយទេ តែសុខភាពមិនសូវទៀងទាត់ ហើយក៏មិនទាន់ដើរបានដែរ។ ដូច្នេះការជូនពររបស់អ្នករាល់គ្នា គឺជាកម្លាំងចិត្តដ៏សំខាន់ជួយជំរុញឲ្យនាងខ្ញុំមានការតស៊ូតទៅ ទៀត»៕
No comments:
Post a Comment
yes