អគារហ្គោលថើវើ ៤២ជាន់ បានផ្អាកដំណើរការសាងសង់ បន្ទាប់ពីពិភពលោក
ជួបវិបត្តិសេដ្ឋកិច្ច កាលពីឆ្នាំ២០០៨
ភ្នំពេញៈ គម្រោងវិនិយោគលើវិស័យសំណង់នៅក្នុងប្រទេសកម្ពុជាដែលគ្មានភាពប្រាកដប្រជានឹងធ្វើឲ្យមានការបាត់បង់ការទុកចិត្តពីអតិថិជន នេះបើតាមការអះអាងរបស់មន្ត្រីរាជរដ្ឋាភិបាលនិងអ្នកជំនាញវិស័យអចលនទ្រព្យនៅកម្ពុជា។
លោកឌឹតចណ្ណាអគ្គនាយកក្រុមហ៊ុនអចលនទ្រព្យវីអឹមស៊ីមានប្រសាសន៍ថាបើក្រឡេកមើលស្ថានភាពវិស័យសំណង់នៅប្រទេសកម្ពុជាយើងឃើញថាមានការរីកចម្រើនច្រើនពីមួយឆ្នាំទៅមួយឆ្នាំជាក់ស្តែងអគារខ្ពស់ៗជាច្រើនបានកើតជាបន្តបន្ទាប់នៅរាជធានីភ្នំពេញហើយគម្រោងអភិវឌ្ឍន៍លំនៅដ្ឋានផ្សេងៗទៀតក៏កើតមានច្រើនដែរនៅតាមបណ្តាខេត្ត ដែលការរីកចម្រើនទាំងនេះក៏បានបង្កើតឱកាសការងារយ៉ាងច្រើនដល់ប្រជាពលរដ្ឋខ្មែរ។ តែទោះជាយ៉ាងណាគម្រោងខ្លះបានបញ្ចប់តាមផែនការ និងខ្លះទៀតត្រូវជាប់គាំងមិនដំណើរការរីឯគម្រោងខ្លះទៀតគ្រាន់តែឮឈ្មោះបានមួយរយៈពេលខ្លីក៏បានបាត់ឈ្មោះទៅវិញដែលធ្វើឲ្យអតិថិជនបាត់សេចក្តីទុកចិត្តសម្រាប់ការវិនិយោគនៅថ្ងៃអនាគត។
ទាក់ទងទៅនឹងបញ្ហានេះលោកអូស្មាន់ ហាស្សាន់រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានលើកយកគម្រោងធំៗចំនួនបីមកធ្វើជាឧទាហរណ៍បញ្ជាក់។គម្រោងវិនិយោគRiver Star ចាប់ផ្តើមដំបូងមានការផ្សព្វផ្សាយយ៉ាងខ្លាំងទាំងនៅក្នុងនិងក្រៅប្រទេសប៉ុន្តែនៅចុងបញ្ចប់គម្រោងនេះត្រូវបានលុបចោលទៅវិញ។ មុនដំបូងលោកមិនជឿថាគម្រោងនេះបរាជ័យទេព្រោះជាក្រុមហ៊ុនធំឈ្មោះថាPoscoលំដាប់ទី២នៅឯប្រទេសកូរ៉េខាងត្បូង។ ទី២ក្រុមហ៊ុនGSដែលជាក្រុមហ៊ុនធំជាងគេនៅប្រទេសកូរ៉េគ្រាន់តែចាប់ផ្តើមបើកការដ្ឋានសាងសង់មិនបានប៉ុន្មានផងក៏ត្រូវបានបិទទ្វាររួចលក់ដីទៅឲ្យអ្នកផ្សេងវិញ។លោកបញ្ជាក់ថា៖«មានករណីច្រើនដែលគម្រោងបើកហើយត្រូវបានបិទវិញតួយ៉ាងគម្រោងវិនិយោគអគារហ្គោលថើរវើ៤២ជាន់សង់បានចំនួន៣០ជាន់ត្រូវជាប់គាំងដែរ»។
តែទោះជាយ៉ាងណាលោក ឌឹតចណ្ណាបានប្រាប់ឲ្យដឹងទៀតថា គម្រោងដែលជាប់គាំងមិនដំណើរការមានចំនួនតិចតួចតែប៉ុណ្ណោះលោកបានលើកឡើងថា ជាក់ស្តែងគម្រោងដែលចាប់ផ្តើមកាលពីអំឡុងឆ្នាំ២០០៧បញ្ចប់ច្រើនជាងគម្រោងដែលមិនបានបញ្ចប់។
លោកចេងខេងអគ្គនាយកក្រុមហ៊ុនអចលនទ្រព្យស៊ីភីអិលបានថ្លែងថាជាធម្មតាគម្រោងវិនិយោគនីមួយៗតែងមានភាពច្បាស់លាស់ទើបអាចដំណើរការលក់បានប៉ុន្តែប្រសិនបើមានគម្រោងណាមួយមិនច្បាស់លាស់ទំនុកចិត្តរបស់អតិថិជនក៏បាត់បង់ទៅតាមនោះដែរ។
លោកលើកឡើងថារាល់គម្រោងទាំងអស់គ្រាន់តែចេញគម្រោងភ្លាមអតិថិជនបានសម្រុកមកទិញដោយមិនសូវបានពិចារណានោះទេ ពីព្រោះពួកគាត់គិតថាគម្រោងមួយៗម្ចាស់គម្រោងមានទុនគ្រប់គ្រាន់ប៉ុន្តែគម្រោងមួយចំនួនបន្ទាប់ពីអនុវត្តគម្រោងបានបន្តិចនិងក្រោយពីបានទទួលប្រាក់ពីអ្នកទិញហើយ ពួកគេបែរជាបញ្ឈប់គម្រោងនោះទៅវិញបញ្ហានេះហើយដែលធ្វើឲ្យអតិថិជនមានភាពខ្លាចរអានិងបាត់ទំនុកចិត្ត។ ការធ្វើបែបនេះមិនត្រឹមតែធ្វើឲ្យប៉ះពាល់ដល់គម្រោងវិនិយោគរបស់ខ្លួនតែប៉ុណ្ណោះទេ តែវាថែមទាំងធ្វើឲ្យប៉ះពាល់ដល់សេដ្ឋកិច្ចប្រទេសទាំងមូលទៀតផង។ប៉ុន្តែទោះបីជាយ៉ាងណាក៏រាជរដ្ឋាភិបាលកម្ពុជាមានវិធានការដើម្បីការពារនូវរាល់បញ្ហាទាំងអស់នេះដែរពោលគឺរាល់អ្នកវិនិយោគទាំងឡាយណាមុននឹងចង់អភិវឌ្ឍគម្រោងអី្វមួយយ៉ាងហោចណាស់ក៏ត្រូវមានប្រាក់តម្កល់នៅក្នុងធនាគារ២ភាគរយទៅលើគម្រោងទាំងមូលដែរ។
លោកចេងខេងបានបន្ថែមទៀតថាដើម្បីឲ្យការទិញដូរកាន់តែមានទំនុកចិត្តអតិថិជនគួរតែឆ្លងកាត់ជាមួយក្រុមហ៊ុនអចលនទ្រព្យដែលបម្រើសេវាកម្មនេះផ្ទាល់ព្រោះពួកគេមានសមាគម និងមានជំនាញច្បាស់លាស់ហើយអាចដឹងថាគម្រោងណាដំណើរការល្អនិងគម្រោងណាមួយមិនដំណើរការល្អ។
លោកអ៊ូចពិសាលជំនួយការក្រុមហ៊ុនអភិវឌ្ឍន៍អចលនទ្រព្យបុរីវិមានភ្នំពេញបាននិយាយថាក្រុមហ៊ុនអភិវឌ្ឍន៍លំនៅដ្ឋានរបស់លោកបានធ្វើកិច្ចសន្យាកំណត់ការវិនិយោគជាមួយអតិថិជនយ៉ាងច្បាស់លាស់។ជាទូទៅអតិថិជនដែលមកទិញលំនៅដ្ឋានក្នុងបុរីវិមានភ្នំពេញតែទទួលបានការបញ្ជាក់ពីក្រុមហ៊ុនលើការងារសាងសង់។លោកបន្ថែមថានៅក្នុងកិច្ចសន្យាបញ្ចប់សំណង់គឺមិនឲ្យលើសរយៈពេល១៨ខែគិតចាប់ពីថ្ងៃចុះកិច្ចសន្យាទិញ-លក់យើងធ្វើដូច្នេះគឺដើម្បីឲ្យអតិថិជនមានទំនុកចិត្តហើយមកទិញលំនៅដ្ឋានយើងកាន់ច្រើនថែមទៀត។
លោកប្រាប់ទៀតថា គម្រោងវិនិយោគនីមួយៗមិនថាតែគម្រោងវិនិយោគរបស់យើងទេគឺគ្រប់គម្រោងទាំងអស់ត្រូវមានប្រាក់តម្កល់ក្នុងធនាគារចំនួន២ភាគរយតាមការកំណត់របស់ក្រសួងសេដ្ឋកិច្ច និងហិរញ្ញវត្ថុដើម្បីធានានូវហានិភ័យផ្សេងៗចំពោះការជាប់គាំង។ លោកបានបញ្ជាក់ថាគ្រប់អតិថិជនមុននឹងសម្រេចចិត្តទិញលំនៅដ្ឋានគួរតែពិនិត្យមើលកិច្ចសន្យាទិញ-លក់ឲ្យបានច្បាស់ថាតើក្រុមហ៊ុនឬម្ចាស់គម្រោងមានកំណត់រយៈពេលនៃការសាងសង់ដែរឬទេបើគ្មានត្រូវសុំឲ្យម្ចាស់គម្រោងធ្វើឲ្យជាដាច់ខាត៕
No comments:
Post a Comment
yes