ប្រទេសជប៉ុន មានតួនាទីសំខាន់ក្នុងការស្វែងរកដំណោះស្រាយនយោបាយ និងស្ថិរភាពនយោបាយសម្រាប់ការអភិ​វឌ្ឍន៍ប្រទេសកម្ពុជា

នៅរសៀលថ្ងៃទី១០ ខែវិច្ឆិកានេះ លោកប្រធាន សម រង្សីុ និងលោកអនុប្រធាន កឹម សុខា បានជួបជាមួយនឹងសម្ព័ន្ធមិត្តភាពសភាជប៉ុន-កម្ពុជា( Japan-Cambodia Friendship MPs League) ដែលមានសមា​ជិក​ព្រឹទ្ធសភា និងរដ្ឋសភា នៃគណបក្សកាន់អំណាច គឺគណបក្សប្រជាធិបតេយ្យសេរី(LDP) និងគណបក្សប្រឆាំងគឺគណបក្សប្រជាធិបតេយ្យជប៉ុន(DJP) នៅវិមានព្រឹទ្ធសភាជប៉ុន ក្នុងទីក្រុងតូក្យូ។

ក្នុងជំនួបនោះលោកប្រធាន សម រង្ស៊ី និងលោកអនុប្រធាន កឹម សុខា បានលើកឡើងអំពី តួនាទីសំខាន់របស់ប្រទេសជប៉ុន ក្នុងការស្វែងរកដំណោះស្រាយនយោបាយ និងស្ថិរភាពនយោបាយសម្រាប់ការអភិ​វឌ្ឍន៍ប្រទេសកម្ពុជា។

តំណាងរាស្រ្ត និងសមាជិកព្រឹទ្ធសភា របស់ប្រទេសជប៉ុន ចង់ឃើញប្រទេសកម្ពុជាមានស្ថិរភាពនយោបាយ ដើម្បីធានាដំណើរការលទ្ធិប្រជាធិបតេយ្យ សេរីភាពជាមូលដ្ឋាន ការអភិវឌ្ឍន៍ និងវិនិយោគទុនបរទេស។ ពួកគាត់បានសង្កត់ថា “ជំនួយរបស់ប្រទេសជប៉ុន ផ្តល់ដល់កម្ពុជា គឺសម្រាប់ពលរដ្ឋខ្មែរទាំងអស់ មិនមែនសម្រាប់គណបក្សនយោបាយណាមួយឡើយ” ៕