ព្រៃវែង៖ កាលពីថ្ងៃទី២៥ តុលា ២០១២ កន្លងទៅថ្មីៗនេះ បេក្ខជនប្រឡងគ្រូអនុវិទ្យាល័យជាច្រើននាក់ដែលបានមកចូលរួមប្រឡងនៅក្នុងមណ្ឌលទាំង៩ក្នុងក្រុងព្រៃវែង បានបង្ហាញនូវការខកចិត្តនិងអស់សង្ឃឹមជាខ្លាំង ដោយសារតែពួកគេបានឮល្បីតៗគ្នាថា មានអំពើពុករលួយកើតឡើងនៅក្នុងស្ថាប័នអ្នករៀបចំការប្រឡងនេះ ដោយកូនអ្នកធំមួយចំនួន ដាក់តែលុយមិនបាច់មកប្រឡងក៏មានឈ្មោះជាប់ដែរ ហើយកាន់តែធ្វើឲ្យពួកគេបាក់កម្លាំងចិត្តទៅទៀតនោះ គឺនៅក្នុងពេលប្រឡងនោះ នៅក្នុងមណ្ឌលមួយចំនួនដូចជាមណ្ឌលវិទ្យាល័យ ហ៊ុន សែន និងមណ្ឌលវិទ្យាល័យព្រះអង្គឌួងជាដើម ត្រូវមន្ត្រីអនុរក្សចាប់បានបេក្ខជនប្រឡងកៀបរហូតដល់ទៅ៧នាក់ ហើយគេជឿជាក់ថាចំនួនពិតប្រាកដអាចមានច្រើនលើសពី៧នាក់ តែគេចាប់មិនទាន់បាន។ យុវជន និង យុវនារី ២នាក់ដែលសុំមិនបញ្ចេញឈ្មោះ បានប្រាប់អ្នកយកព័ត៌មាននៅវេលាម៉ោង៦ល្ងាចថ្ងៃទី២៥តុលា ក្រោយពីបានបញ្ចប់ការប្រឡងថា ពួកគេបានឃើញហេតុការណ៍មន្ត្រីអនុរក្សចាប់បានបេក្ខជនប្រឡងកៀបនោះដោយផ្ទាល់គឺ នៅខណៈពេលដែលពួកគេកំពុងតែប្រឡង នៅក្នុងបន្ទប់ប្រឡងរបស់ខ្លួន ដែលស្ថិតនៅក្នុងមណ្ឌលវិទ្យាល័យព្រះអង្គឌួង មន្ត្រីអនុរក្សក្នុងបន្ទប់បានឃើញបេក្ខជនម្នាក់ឈ្មោះ កែន សាវុធ មកពីខេត្តស្វាយរៀងកំពុងតែខំធ្វើវិញ្ញាសាររបស់ខ្លួន ប៉ុន្តែបែរជាមិនដាក់ឈ្មោះរបស់ខ្លួននៅលើក្រដាស់វិញ្ញាសារនោះទេ ធ្វើឲ្យមន្ត្រីអនុរក្សមានការសង្ស័យក៏សួរនាំ ទើបបែកធ្លាយការពិតហើយបេក្ខជនរូបនោះក៏រត់គេចខ្លួនចេញពី មណ្ឌលប្រឡងបាត់នៅខណៈពេលដែលមន្ត្រីអនុរក្សហៅទៅនិយាយគ្នានៅការិយាល័យប្រធានមណ្ឌល។
ចំណែកខាងសមត្ថកិច្ចដែល ឈរជើងការពារនៅក្នុងមណ្ឌលប្រឡងវិទ្យាល័យ ហ៊ុន សែន វិញក៏បានឲ្យដឹងដែរថា នៅក្នុងពេលប្រឡងថ្ងៃទី២៥តុលានេះ មន្ត្រីអនុរក្សក្នុងមណ្ឌលចាប់បានបេក្ខជនប្រឡងកៀបចំនួន៦នាក់ ហើយកម្លាំងសមត្ថកិច្ចបំរុងនឹងនាំខ្លួនមកសាកសួរនៅប៉ូស្តិ៍ប៉ូលិសដែរ ប៉ុន្តែត្រូវប្រធានមណ្ឌលសំណូមពរសុំយកទៅអប់រំណែនាំវិញ និងចុងក្រោយបានបណ្តេញលែងឲ្យចូលប្រឡងទៀត តែពុំបានដាក់ទោសទណ្ឌអ្វីទេ។ មន្ត្រីអនុរក្សមួយរូបសុំមិនបញ្ចេញឈ្មោះបានប្រាប់ឲ្យដឹងដែរថា រឿងកូនអ្នកធំមិនបាច់មកប្រឡងក៏មានឈ្មោះជាប់ដែរនោះ សុំមិននិយាយទេព្រោះមិនបានដឹង ដោយឡែករឿងប្រឡងកៀបនេះវាមិនមែនទើបតែកើតមាន ក្នុងការប្រឡងលើកនេះនោះទេ គឺវាកើតមានរាល់ៗឆ្នាំរហូតក្លាយទៅជាវប្បធម៌មួយដែលគេដឹងឮគ្រប់ៗគ្នា និងគ្រប់ទីកន្លែងទៅហើយនោះគឺ ( វប្បធម៌ប្រឡងកៀប ) ហើយថា្នក់ដឹកនាំក្រសួងអប់រំ ក៏បានខ្នះខ្នែងយ៉ាងខ្លាំងផងដែរ ក្នុងការលុបបំបាត់វប្បធម៌ដ៏អាក្រក់មួយនេះ ប៉ុន្តែវានៅតែកើតមានដដែលជាដដែល នេះទំនងជាអេះមិនទាន់ចំកន្លែងដែលរមាស់ហើយមើលទៅ។
ដោយឡែកលោក ហ៊ឹម សុផល ប្រធានមន្ទីរអប់រំយុវជន និងកីឡាខេត្តព្រៃវែងមិនអាចទំនាក់ទំនងសុំការបំភ្លឺបានទេនៅព្រឹកថ្ងៃទី២៦តុលានេះ ដោយលោកប្រាប់ថាកំពុងជាប់ប្រជុំ លុះដល់រសៀលម៉ោង៤ថ្ងៃដដែលភ្នាក់ងារយកព័ត៌មាន ក៏បានព្យាយាមទំនាក់ទំនងសុំការបំភ្លឺម្តងទៀត ប៉ុន្តែទូរសព្ទ័របស់លោកគ្មានអ្នកទទួល ទំនងជាស្គាល់លេខហើយទើបលែងទទួលតែម្តង។
No comments:
Post a Comment
yes