ជនល្មើសក្នុងសំណុំរឿងមនុស្សឃាតទៅលើ លោកឈុត វុទ្ធី ត្រូវផ្តន្ទាទោសរយៈ ពេល២ឆ្នាំ
កោះកុង៖ កាលពីថ្ងៃទី២៣ ខែតុលា ឆ្នាំ២០១២ ម្សិលមិញនេះ សាលាដំបូងខេត្តបានប្រកាសសាលក្រម បទល្មើសមនុស្សឃាតដោយអចេតនារវាងមន្ត្រីកងរាជ អាវុធហត្ថដែលជាសន្តិសុខក្រុមហ៊ុនធីបប៊ឺហ្គ្រីន រ៉ាន់ បូរ័ត្ន និងអ៊ិន រតនា ដែលជាប់ពាក់ព័ន្ធទៅនឹងការបាញ់សម្លាប់សកម្មជនបរិស្ថានដ៏ល្បី ល្បាញ ដោយផ្តន្ទាទោស២ ឆ្នាំ ប៉ុន្ដែតម្រូវឲ្យអនុវត្តទោសរយៈពេល៦ខែនៅក្នុងពន្ធនាគារ ចំណែកឯ១ឆ្នាំ៦ខែទៀតត្រូវព្យួរទោសសាកល្បងក្រៅឃុំ។
មន្ត្រីសម្របសម្រួលសមាគមអាដហុក លោក នាង បូរ៉ាទីណូ ប្រចាំខេត្តកោះកុងដែលបានចូល ស្តាប់ការប្រកាសសាលក្រមបានថ្លែងឲ្យដឹងថា នៅក្នុងបន្ទប់សវនាការ គឺមានតែជនល្មើសរ៉ាន់ បូរ័ត្ន និងសាច់ញាតិរបស់គេចំនួន៣នាក់តែប៉ុណ្ណោះ ហើយលោកចៅក្រម ខាំ សុផារី បានប្រកាសសាលក្រមដោយយល់ឃើញថា រ៉ាន់ បូរ័ត្ន បានព្យាយាមរារាំងដើម្បីកុំឲ្យមានការបាញ់បន្តខ្លាចប៉ះដល់ អ្នកកាសែតពីរនាក់ទៀត ហើយតុលាការបានចោទប្រកាន់ពីបទមនុស្សឃាតដោយអចេតនា គឺជារឿងត្រឹមត្រូវ។
កាលពីថ្ងៃទី៤ ខែតុលា ២០១២ នៅក្នុងអង្គសវនាការ លោក រ៉ាន់ បូរ័ត្ន បាននិយាយថា ខ្លួនបានស្ទុះទៅទាញកាំភ្លើងចេញពីអ៊ិន រតនា ដើម្បីកុំឲ្យរតនាបាញ់ទៀតពីព្រោះមានស្ត្រីអ្នកកាសែតពីរនាក់នៅ ក្នុងឡាន ហើយការប្រទាញប្រទង់គ្នានោះធ្វើឲ្យដៃរបស់គាត់ប៉ះចំកៃកាំំ ភ្លើងផ្ទុះពីរគ្រាប់ត្រូវរតនាតែម្តង គេគ្មានចេតនាសម្លាប់មនុស្សទេ។ នៅក្នុងរឿងក្តីនេះតុលាការពុំ បានចាត់ការសំណុំរឿងលោកឈុត វុទ្ធី អតីតប្រធានអង្គការការពារធនធានធម្មជាតិទេ ដោយសារលោកឈុត វុទ្ធី និងឃាតកអ៊ិន រតនាបានស្លាប់ទាំងពីរនាក់ដូច្នេះបណ្តឹងអាជ្ញាក៏រលត់ដែរ។
មន្ត្រីស៊ើបអង្កេតជាន់ខ្ពស់អង្គការសិទ្ធិមនុស្សលីកាដូ លោកអំ សំអាត បានថ្លែងឲ្យដឹងថា លោកពុំមានការភ្ញាក់ផ្អើលនោះទេទាក់ទិនទៅនឹងការប្រកាសសាលក្រម នេះដោយលោកបានគិតទុកជាមុនថានឹងត្រូវតែទទួលបានលទ្ធផលបែបនេះ ហើយអ្វីដែលលោកសោកស្តាយនោះគឺការបាត់បង់សកម្មជនព្រៃឈើដ៏ល្បី ល្បាញម្នាក់ដោយពុំទទួលបានយុត្តិធម៌អ្វីទាំងអស់។ លោកបានឲ្យដឹងទៀតថា លោកនៅតែទទួលយកមិនបានទេចំពោះលទ្ធផលស៊ើបអង្កេតទាំងពីរនោះ ពីព្រោះការស៊ើបអង្កេតនេះគឺធ្វើឡើងដើម្បីធ្វើឲ្យរលត់បណ្ដឹង អាជ្ញាពីព្រោះជនល្មើសនិងជនរងគ្រោះស្លាប់ទាំងពីរ។ គឺមានតែរ៉ាន់ បូរ័ត្នប៉ុណ្ណោះដែលជាអ្នកទទួលខុសត្រូវលើករណីអ៊ិន រតនា។
ប្រធានផ្នែកដីធ្លីសមាគមសិទ្ធិមនុស្សអាដហុកបានថ្លែងឲ្យដឹងថា ការប្រកាសសាលក្រមនេះ គឺជាឆាកល្ខោន។ លោក បានបន្ដថា តុលាការគួរតែធ្វើការស្រាវជ្រាវឲ្យបានច្បាស់នៅកន្លែងកើតហេតុ ហើយបើតាមរយៈភស្តុតាងដែលសង្គមស៊ីវិលរកឃើញនោះ គឺអ៊ិន រតនាពុំមែនជាអ្នកបាញ់សម្លាប់លោកឈុត វុទ្ធីទេ ហើយលោករ៉ាន់ បូរ័ត្នក៏ពុំមានពាក់ព័ន្ធនៅក្នុងរឿងនេះដែរគឺមានជនមិនស្គាល់ អត្តសញ្ញាណម្នាក់ដែលមានពាក់ម៉ាសហើយឈរនៅខាងឆ្វេងរថយន្តប្រមាណជា ១ម៉ែត្រជាអ្នកដែលបាញ់សម្លាប់លោកវុទ្ធី។ លោកបានថ្លែងឲ្យដឹងទៀតថា លោកមានការខកចិត្តចំពោះការប្រកាសសាលក្រមរបស់សាលាដំបូង ខេត្តកោះកុងដែលពុំព្រមស្រាវជ្រាវរកអ្នកដែលប្រព្រឹត្តពិត ប្រាកដមកផ្តន្ទាទោស។ មិនគួរណាយកការសម្លាប់លោកឈុត វុទ្ធីដើម្បីជាការបំបាក់ស្មារតីអ្នកដទៃនោះទេ៕
No comments:
Post a Comment
yes