លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅក្នុងសន្និសីទកាលពីពេលកន្លងមក
ភ្នំពេញៈ មួយសប្តាហ៍ បន្ទាប់ពីមេដឹកនាំគណបក្សប្រឆាំង លោក សម រង្ស៊ី បានអំពាវនាវឲ្យប្រធានាធិបតីអាមេរិក លោក បារ៉ាក់ អូបាម៉ា ធ្វើពហិការ ចំពោះកិច្ចប្រជុំកំពូលអាស៊ាន ដោយសារបញ្ហាសិទ្ធិមនុស្សដែលមានលក្ខណៈធ្លាក់ចុះដុនដាបនៅ កម្ពុជា លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានថ្លែងថា កិច្ចខិតខំប្រឹងប្រែងរបស់លោក សម រង្ស៊ី គ្មានបានការនោះទេ។
ថ្លែងនៅក្រៅវគ្គបណ្តុះបណ្តាលផ្នែកប្រព័ន្ធផ្សព្វផ្សាយ លោក ខៀវ កាញារីទ្ធ បានហៅការអំពាវនាវជាសាធារណៈរបស់លោក សម រង្ស៊ី ថា ជាការគិតខុសឆ្គងយ៉ាងធំ។ លោក កាញារីទ្ធ បានប្រាប់អ្នកកាសែតថា៖ « វាមិនអាចទៅរួចទេសម្រាប់លោក សម រង្ស៊ី ស្នើសុំលោក អូបាម៉ា ប្រើឥទ្ធិពលរបស់ខ្លួន ដាក់សម្ពាធមកលើរដ្ឋាភិបាលកម្ពុជា ដើម្បីឲ្យមានការវិលត្រឡប់មកវិញរបស់គាត់នោះ»។ លោកបន្តថា៖ «ប្រហែលជាគាត់គិតថា លោក អូបាម៉ា ជាមេរបស់សម្តេច ហ៊ុន សែន»។
លោក បានបន្តថា៖ «គាត់អាចធ្វើអ្វីដែលគាត់ចង់ ... ប៉ុន្តែខ្ញុំសូមបញ្ជាក់ថា រដ្ឋាភិបាល មិនដែលដាក់ការហាមប្រាម ចំពោះការវិលត្រឡប់របស់គាត់ មកប្រទេសកម្ពុជាវិញទេ»។
លោក សម រង្ស៊ី ដែលជាប្រធានគណបក្សសង្គ្រោះជាតិកម្ពុជា ដែលទើបបង្កើតឡើងកាលពីពេលថ្មីៗនេះ កំពុងរស់នៅនិរទេសដោយខ្លួនឯង នៅទីក្រុងប៉ារីសប្រទេសបារាំង ហើយប្រឈមមុខនឹងការដាក់ពន្ធនាគារចំនួន ១២ ឆ្នាំ ប្រសិនបើគាត់វិលត្រឡប់មកវិញ។
ក្រុមគាំទ្រលោក សម រង្ស៊ី បានអះអាងថា ការកាត់ទោសនេះ គឺជាហេតុផលនយោបាយ ហើយបានខិតខំប្រឹងប្រែងស្វែងរកកិច្ចអន្តរាគមន៍ ពីសហគមន៍អន្តរជាតិ ដើម្បីឲ្យលោកសម រង្ស៊ី បានវិលត្រឡប់ ចូលក្នុងប្រទេសវិញ នៅមុនការបោះឆ្នោតជាតិ ខែកក្កដា ឆ្នាំ២០១៣ ខាងមុខ។
ថ្លែងតាមទូរស័ព្ទពីសហរដ្ឋអាមេរិក កាលពីថ្ងៃអង្គារ លោក សម រង្ស៊ី បានឲ្យដឹងថា កាលពីថ្មីៗនេះលោកបានជួបជាមួយលោក Kurt Campbell ដែលជាឧបការីរដ្ឋមន្រ្តីការបរទេសអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក។ លោកបានបន្តទៀតថា លោកមានទំនុកចិត្តថា ពិតណាស់មេដឹកនាំអាមេរិក អាចនឹងដាក់សម្ពាធកម្ពុជាលើបញ្ហាសំខាន់ៗស្តីពីសិទ្ធិមនុស្ស៕
No comments:
Post a Comment
yes