លោក បារ៉ាក់ អូបាម៉ា អបអរនឹងជ័យជម្នះជាមួយគ្រួសារ និងលោក ចូ បៃដិន
ក្រុងវ៉ាស៊ីនតោនៈ លោក បារ៉ាក់ អូបាម៉ា កាលពីថ្ងៃពុធ បានឈ្នះការបោះឆ្នោតជាថ្មី តែប្រធានាធិបតីរូបនេះនឹងប្រឈមបញ្ហាថ្មីមួយ គឺច្បាប់ fiscal cliff ដែលការរួមផ្សំគ្នារវាងការដំឡើងពន្ធ និងការកាត់បន្ថយចំណាយ។
ការដំឡើងពន្ធ និងការកាត់បន្ថយចំណាយនឹងត្រូវដកយកថវិកាចំនួន៦០០ពាន់លានដុល្លារចេញពីសេដ្ឋកិច្ចរបស់ប្រទេសនេះ ដែលកំពុងត្រូវជជែកដេញដោលនៅសភារបស់អាមេរិក។
ស្ថិតក្នុងស្ថានភាពនេះ មានបញ្ហាពីរផ្សេងគ្នាគឺ ការកាត់បន្ថយពន្ធចំណូលបុគ្គលដែលនឹងអស់សុពលភាពនៅចុងឆ្នាំនេះ និងការកាត់បន្ថយចំណាយរបស់រដ្ឋាភិបាលសហព័ន្ធគ្រប់ជាន់ថ្នាក់ចំនួនរាប់ពាន់លានដុល្លារ ដែលនឹងត្រូវចាប់ផ្តើមបន្ទាប់ពីថ្ងៃបុណ្យចូលឆ្នាំ។
ការបរាជ័យក្នុងការលុបបំបាត់វិបត្តិសារពើពន្ធនេះ អាចធ្វើឲ្យទីផ្សារអាមេរិករង្គោះរង្គើ និងជំរុញឲ្យសេដ្ឋកិច្ចរបស់អាមេរិកធ្លាក់ចូលក្នុងវិបត្តិ ដែលអាចបង្កឲ្យមានភាពស្មុគស្មាញដល់សេដ្ឋកិច្ចពិភពលោក។ តើលោកអូបាម៉ា នឹងដោះស្រាយបញ្ហាប្រឈមទាំងនេះដោយរបៀបណានៅក្នុងអាណត្តិទីពីររបស់លោក ជាពិសេសរដ្ឋសភា ដែលភាគច្រើនគ្រប់គ្រងដោយសមាជិករបស់គណបក្សសាធារណរដ្ឋ។
លោក អូបាម៉ា ដែលបានយកជ័យជម្នះលើគូប្រជែងរបស់ខ្លួន គឺលោក ម៉ីត រ៉ុមនី មកពីគណបក្សសាធារណរដ្ឋ ដោយផ្អែកលើការព្យាករតាមទូរទស្សន៍ មានបំណងតវ៉ាជាមួយនឹងសមាជិកសភានៅទីក្រុងវ៉ាស៊ីនតោនដើម្បីសម្រេចកិច្ចព្រមព្រៀងមួយ មុនថ្ងៃទី៣១ ខែធ្នូខាងមុខនេះ បើមិនដូច្នេះទេនឹងប្រឈមវិបត្តិមួយនៅឆមាសទីមួយក្នុងឆ្នាំ២០១៣ខាងមុខនេះ។ នេះបើយោងតាមអ្នកជំនាញផ្នែកថវិកា និងទីប្រឹក្សារបស់គណបក្សប្រជាធិបតេយ្យ។
អ្នកគាំទ្រលោក អូបាម៉ា បានឲ្យដឹងថា ជ័យជម្នះរបស់លោកក្នុងការបោះឆ្នោតលើកនេះ នឹងផ្តល់ពេលវេលាដល់លោកមួយអាណត្តិដើម្បីដោះស្រាយបញ្ហាដ៏ធំ និងលំបាកមួយដែលលោកបានព្យាយាមធ្វើនៅក្នុងអាណត្តិទីមួយរបស់លោក។ កិច្ចព្រមព្រៀងបែបនេះ នឹងបង្កើតប្រាក់ចំណូលថ្មី ធ្វើការផ្លាស់ប្តូរឆ្ពោះទៅរកកម្មវិធីដែលមានប្រជាប្រិយភាពមួយចំនួន ដូចជា កម្មវិធីថែទាំសុខភាព Medicare សម្រាប់មនុស្សចាស់ និងកាត់បន្ថយឱនភាពរបស់រដ្ឋសហព័ន្ធ។
លោក Steve Elmendorf អតីតអ្នកផ្តល់ប្រឹក្សាជាន់ខ្ពស់របស់គណបក្សប្រជាធិបតេយ្យហើយបច្ចុប្បន្នជាអ្នកបញ្ចុះបញ្ចូលមួយរូបបានឲ្យដឹងថា៖ «ពួកគេបានបង្ហាញជាសញ្ញាថា ពួកគេចង់ឲ្យមានការសម្រេចកិច្ចព្រមព្រៀងធំមួយ ហើយខ្ញុំយល់ថា លោកអូបាម៉ា នឹងមានចិត្តអន្ទះសាក្នុងការសម្រេចកិច្ចព្រមព្រៀងនេះ»។
លោក អូបាម៉ា និងសមាជិកគណបក្សប្រជាធិបតេយ្យភាគច្រើន កំពុងប៉ះទង្គិចគ្នាជាមួយនឹងសមាជិកគណបក្សសាធារណរដ្ឋនៅសភាជុំវិញបញ្ហាដ៏ពុះកញ្ជ្រោលនេះ ថាតើត្រូវបន្តការកាត់បន្ថយពន្ធក្នុងអត្រាទាបចំពោះប្រជាពលរដ្ឋអាមេរិកដែលមានទ្រព្យសម្បត្តិច្រើនឬយ៉ាងណា ដែលច្បាប់នេះនឹងត្រូវផុតកំណត់នៅថ្ងៃទី៣១ ខែធ្នូខាងមុខនេះ។
លោកប្រធានាធិបតីអូបាម៉ា និងសមាជិកគណបក្សប្រជាធិបតេយ្យភាគច្រើន ចង់ដំឡើងពន្ធលើប្រាក់ចំណូលបុគ្គល ដែលរកចំណូលបានលើសពី ២៥ម៉ឺនដុល្លារ រីឯសមាជិកគណបក្សសាធារណរដ្ឋវិញ មានបំណងបន្តអនុវត្តអត្រាពន្ធទាបនាពេលបច្ចុប្បន្ន សម្រាប់ប្រាក់ចំណូលគ្រប់កម្រិតទាំងអស់៕
No comments:
Post a Comment
yes