អវត្តមានលោក សម រង្ស៊ី នៅកម្ពុជាធ្វើឲ្យបក្ស សម រង្ស៊ី នៅតែខ្លាំងដដែល ហើយ នៅឆ្នាំ០១៣ខាងមុខអ្នកប្រជាធិបតេយ្យកាន់តែខ្លាំងនិងជោគជ័យជាងនេះទៅទៀត

បើទោះបីជាអវត្តមានលោក សម រង្ស៊ី នៅក្នុងប្រទេសកម្ពុជាមួយរយៈពេលក្នុងអំឡុងលោក នៅធ្វើជាប្រធានគណបក្ស សម រង្ស៊ី ក៏ដោយ ប៉ុន្តែគណបក្ស​ សម រង្ស៊ី នៅតែខ្លាំង និងរឹងមាំ ដដែល ដែលអាចធ្វើការប្រគួតប្រជែងជាមួយនិងគណបក្សកាន់អំនាចបានយ៉ាងសាកសម្យ ។

គណបក្ស សម រង្ស៊ី បានចាក់ឬស្សកែវចូលយ៉ាងជ្រៅទៅក្នុងដួងចិត្តរបស់ប្រជាពលរដ្ឋ ព្រោះ​គណបក្សមួយនេះ ជានិច្ចជាកាលតែងតែចេញមុខក្នុងការការពារផលប្រយោជន៏របស់ប្រជា ពលរដ្ឋ ដែលទួលរងនូវការរំលោភបំពានពីសំណាក់អ្នកមានលុយ មានអំណាច និងឈ្មួញទុច្ច រឹតខិលខូចមួយចំនួននោះ ។ ជាងនេះទៅទៀតគណបក្ស សម រង្ស៊ី ក៏បានធ្វើការទាមទារយ៉ាង ប្តូរផ្តាច់ផងដែរ ក្នុងបញ្ហាសិទ្ធិសេរីភាពជូនប្រជាពលរដ្ឋខ្មែរ និងការទាមទារឲ្យរដ្ឋាភិបាល គោរ​ពលទ្ធិប្រជាធិបតេយ្យ និងការចេញមុខការពារបូរណៈភាពទឹកដី ទាំងខាងលិច និងខាងកើត​ពីសំណាក់ថ្នាក់ដឹកនាំគណបក្ស សម រង្ស៊ី ។

ការខិតខំប្រឹងប្រែងរបស់គណបក្ស សម រង្ស៊ី និងថ្នាក់ដឹកនាំគណបក្ស សម រង្ស៊ី គឺក្នុងគោល​បំណងតែមួយគត់ដើម្បីផល​ប្រយោជន៏ជាតិ និងប្រជាពលរដ្ឋ ដែលកត្តាទាំងអស់​នេះ​ហើយ​បាន​ធ្វើឲ្យគណបក្ស សម រង្ស៊ី មានឈ្មោះបោះសម្លេងនៅលើឆាកអន្តរជាតិយ៉ាងខ្លាំង ដែល​មេដឹកនាំនៅលើពិភពលោកបានសម្តែងការទទួលស្គាល់ចំពោះស្នាដៃរបស់គណបក្ស សម រង្ស៊ី ដែលធ្វើដើម្បីជាតិ និងប្រជាពលរដ្ឋ ដោយមិនគិតពីប្រយោជន៏ផ្ទាល់ខ្លួន និងបក្ខពួក គ្រួ​សារ ក៏ដូចជាដើម្បីជាប្រយោជន៏របស់គណបក្ស ខ្លួនឯងដោយផ្ទាល់នោះ ។

លោក សម រង្ស៊ី ត្រូវបានគេទទួលស្គាល់ថា ជាមេដឹកនាំមួយរូបដែលមានមនសិការជាតិខ្ពស់ ក្នុងការគិតគូរជាតិ និងប្រជាពលរដ្ឋជាធំ ដោយខិតខំប្រឹងប្រែងធ្វើគ្រប់បែបយ៉ាង​មិនគិតពីទុក្ខ​លំបាករបស់ខ្លួនឡើយ បើទោះបីជាដឹងថា ការទាមទាររបស់លោកត្រូវប្រឈមទៅនិងការព្យា​បាទ​​​ពីសំណាក់គណបក្សកាន់អំណាចយ៉ាងណាក៏ដោយនោះ ។

ដោយមើលឃើញពីភាពអង្គអាចក្លាហានរបស់លោក សម រង្ស៊ី បែបនេះហើយ ប្រជាពល​រដ្ឋ​ខ្មែរទាំងក្នុងស្រុក និងក្រៅស្រុក បានគាំទ្រលោកយ៉ាងខ្លាំង បើទោះបីជា​មួយរយៈ​ពេល​នេះ​ពុំ​មាន​វត្តមាន​លោកនៅក្នុងប្រទេសកម្ពុជាសម្រាប់ធ្វើការដឹកនាំគណបក្ស សម រង្ស៊ី ដោយផ្ទាល់​ក៏ដោយ ក៏គណបក្ស សម រង្ស៊ី នៅតែទទួលបានការគាំទ្រយ៉ាងខ្លាំងពីសំណាក់ប្រជាពលរដ្ឋ ដោយក្នុងនោះសម្រាប់ការបោះឆ្នោតទាំងពីរលើកនៅក្នុងឆ្នាំ២០១២នេះ គណបក្ស សម រង្ស៊ី ទទួលបានជោគជ័យយ៉ាងធំធេងជូនជាតិ និងប្រជាពលរដ្ឋកម្ពុជា ។

ជាមួយគ្នានេះនៅបន្ទាប់ពីរូបលោកបានលាលែងចេញពីប្រធានគណបក្ស សម រង្ស៊ី ទៅធ្វើជា ប្រធានគណបក្ស សង្គ្រោះជាតិ ដែលជាគណបក្សថ្មី កើតចេញពីការរួមបញ្ចូលគ្នាជាសម្លេងតែ មួយរវាងគណបក្ស សម រង្ស៊ី និងគណបក្ស សិទ្ធិមនុស្ស គេក៏កាន់តែមានជឿ និងរំពឹងយ៉ាង មុតមាំផងដែរថា នៅឆ្នាំ២០១៣គណបក្ស សង្គ្រោះជាតិ និងទទួលបានជោគជ័យលើកាបោះ​ឆ្នោតជាក់ជាមិនខានឡើយ ព្រោះគណបក្ស សង្គ្រោះជាតិ មានសសរគ្រឹះយ៉ាងមាំនោះគឺ គណ​បក្ស​ សម រង្ស៊ី និងគណបក្ស សិទ្ធិមនុស្ស ។

ជាមួយគ្នានោះផងដែរ លោក​គង់ គាំ ដែលជាប្រធានគណបក្ស សម រង្ស៊ី សម្រាប់អាណត្តិថ្មី លោកក៏បានធ្វើការប្តេជ្ញាចិត្តផងដែរថា និងដឹកនាំគណបក្ស សម រង្ស៊ី ឲ្យកាន់តែរឹងមាំ​បន្ថែម​ទៀត បន្តពីអ្វីដែលលោក សម រង្ស៊ី បានបន្សុលទុក ដើម្បីជួយជុំរុញឲ្យគណបក្ស សង្គ្រោះជាតិ កាន់តែមានកម្លាំងខ្លាំងឡើងៗ ។ ព្រោះថាប៉ូលនយោបាយនៅក្នុងប្រទេសកម្ពុជាសម្រាប់ឆ្នាំ​២០១៣ខាងមុខ គឺមានតែពីរប៉ុណ្ណោះ នោះគឺប៉ូលគណបក្ស សង្គ្រោះជាតិ ដែលប្រកាន់យក​ស្មារតីថ្ងៃទី២៣ ខែតុលា ឆ្នាំ១៩៩១ និងប៉ូលគណបក្សកាន់អំណាចសព្វថ្ងៃដែលប្រកាន់យក​ស្មារតីថ្ងៃទី៧ ខែមករា ឆ្នាំ១៩៧៩ ដែលទទួលបានអំណាចដោយយួនជាអ្នកលើក​បណ្តុប ។

ចំណែកឯលោកស្រី កែ សុវណ្ណរតន៏ អគ្គលេខាធិការគណបក្ស សម រង្ស៊ី បានមានប្រសាន៏ឲ្យ ដឹងថា បើទោះបីជាមួយរយៈនេះអវត្តមានរបស់លោក សម រង្ស៊ី នៅឆ្ងាយពីយើងក៏ពិតមែន ក៏ ប៉ុន្តែឧត្តមគតិរបស់លោក សម រង្ស៊ី និងទង្វើរបស់លោកដែលបានធ្វើដើម្បីជាប្រយោជន៏របស់ ជាតិ និងប្រជាពលរដ្ឋ បានជំរុញយើងទាំងអស់គ្នាធ្វើឲ្យការខិតខំប្រឹងប្រែងដោយទទួលបាន​ជោគជ័យយ៉ាងធំធេងដូចសព្វថ្ងៃនេះ ។ លោកស្រី កែ សុវណ្ណរតន៏ បានបន្តទៀតថា ក្នុងនោះ​នៅពេលបោះឆ្នោតព្រឹទ្ធសភាយើងទទួលបានចំនួន១១អសនៈដូចអ្វីដែលជាការគ្រោងទុក​របស់​យើង ដែលទាំងអស់នេះគឺកើតចេញមកពីការស្មោះស្ម័គ្ររបស់សមាជិក-សមាជិការ និង ក្រុមប្រឹក្សាឃុំ-សង្កាត់ របស់គណបក្ស សម រង្ស៊ី និងមួយទៀគឺយើងទទួលបានជោគជ័យជាទី​គាប់ប្រសើផងដែរ នោះគឺការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពេលកន្លងមក នេះ​ដែលទទួលបានចំនួន ពីរពាន់មួយរយហាសិបប្រាំនាក់ ដែលជោគជ័យនេះ គឺជាជោគជ័យ ដែលពុះពារក្រោមការគំរាមកំហែង សំឡុត និងបន្លំពីគណបក្សកាន់អំណាចសព្វថ្ងៃ ។

អគ្គលេខាធិការគណបក្ស សម រង្ស៊ី លោកស្រី កែ សុវណ្ណរតន៏ បានមានប្រសាសន៏បន្តទៀត ផងដែរថា អ្វីទាំងអស់នេះលោកស្រី ក៏ដូចជាថ្នាក់ដឹកនាំរបស់គណបក្ស សម រង្ស៊ី ទាំងអស់ សូមអរគុណ សមាជិក-សមាជិកា គណបក្ស សម រង្ស៊ី ទាំងអស់ដែលបានខិតខំពុះពារ ដើម្បី ការពារគណបក្ស​ សម រង្ស៊ី ឲ្យរឹងមាំដើម្បីចូលរួមក្នុងការដោះស្រាយបញ្ហារបស់ប្រជាពលរដ្ឋ ដែលកំពុងតែរងចាំអ្នកប្រជាធិបតេយ្យ និងអ្នកស្នេហាជាតិពិតប្រាកដនៅមូលដ្ឋានជួយដល់ ពួកគាត់ ។ លោកស្រីបានបន្ថែមទៀតថា ក្នុងនោះការងារសង្គម គឺតំណាងរបស់គណបក្ស សម រង្ស៊ី ទាំងអស់បានជួយអន្តរាគមន៏ និងឈឺឆ្អាលក្នុងការដោះស្រាយបញ្ហារបស់ប្រជា ពល​រដ្ឋនៅមូលដ្ឋានដូចជា ដីធ្លី និងការរំលោភសិទ្ធិមនុស្សជាដើម ។ល។ ដោយអស់ពីកម្លាំងកាយ និងកម្លាំងចិត្ត ។

លោកស្រីបានថ្លែងទៀតផងដែរថា ជោគជ័យទាំងអស់នេះហើយ ដែលយើងទាំងអស់គ្នាចង ចាំជានិច្ចដោយសារយើងពុះពារប្រយុទ្ធដើម្បីសេរីភាព ការពារប្រជាពលរដ្ឋដែលទទួលរង​យ៉ាង​អយុត្តិធម៌ពី អំពើការរំលោភបំពានរបស់អ្នកមានលុយ មានអំណាច ឈ្មួញទុច្ចរឹត និង​មន្រ្តីខិលខូចជាដើម ដែលទាំងនេះធ្វើឲ្យគណបក្ស សម រង្ស៊ី កាន់តែរឹងមាំ និងកាន់តែ​ទទួល​បាននូវភាពជោគជ័យ ។ លោកស្រី កែ សុវណ្ណរតន៏ បានមានប្រសាសន៏ឲ្យដឹងបន្តទៀត ផង​ដែរថា លោក​សម រង្ស៊ី លោកបានលាលែងចេញពីប្រធានគណបក្ស សម រង្ស៊ី ទៅហើយក្តី ក៏​លោកនៅតែជាទីប្រឹក្សាជាន់ខ្ពស់របស់គណបក្ស សម រង្ស៊ី ។ មួយវិញទៀតការលាលែងរបស់ លោក សម រង្ស៊ី ចេញពីប្រធានគណបក្ស សម រង្ស៊ី គឺឪកាសដែលឲ្យលោកទៅធ្វើជាប្រធាន គណបក្ស សង្គ្រោះជាតិ ដែលប្រជាពលរដ្ឋកំពុងតែស្រែកដង្ហើយជារៀងរាល់ថ្ងៃ ឲ្យអ្នកប្រជាធិ បតេយ្យ អ្នកស្នេហាជាតិ និងស្រលាញ់ប្រជាពលរដ្ឋយ៉ាងពិតប្រាកដមកជួយសង្គ្រោះពួកគាត់ ចេញពីកណ្តាប់ដៃនៃការគ្រប់គ្រងរបស់គណបក្សប្រជាជនកាន់អំណាចសព្វថ្ងៃ ដែលបាននិង កំពុងតែដឹកនាំប្រទេសជាតិតាមរបៀបផ្តាច់ការនោះ ។

ជាមួយគ្នានោះពួកគាត់មានជំនឿយ៉ាងមុតមាំផងដែរថា នៅឆ្នាំ២០១៣គណបក្ស សង្គ្រោះជាតិ និងទទួលបានជ័យជំនះលើការបោះឆ្នោតនេះយ៉ាងពិតប្រាកដ ព្រោះស្នូលគណបក្ស សង្គ្រោះ ជាតិសព្វថ្ងៃ មិនត្រឹមតែមានគណបក្ស សម រង្ស៊ី និងគណបក្ស សិទ្ធិមនុស្ស ប៉ុណ្ណោះទេ តែ​ក្នុង​នោះគណបក្ស សង្គ្រោះជាតិ ក៏មានឥស្សរជននយោបាយជាច្រើនរូបទៀត ដែលមកពីគ្រប់​គណបក្សនយោបាយ បានមកចូលរួមនៅក្នុងជួរគណបក្ស សង្គ្រោះជាតិ ហើយអ្វីដែលជា​ការ​កត់សំគាល់ជាងនេះទៅទៀតនោះ ក្នុងមួយរយៈចុងក្រោយនេះ ទាំងសមាជិកគណបក្ស កាន់​អំណាច ក៏បានមកចូលរួមជាមួយគណបក្ស សង្គ្រោះជាតិ កាន់តែច្រើនឡើងផងដែរ ហើយ​អន្តរ​ជាតិក៏បានធ្វើការទាមទារឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌ នៅ​កម្ពុ​ជា ក្នុងឆ្នាំ២០១៣ខាងមុននេះ ហើយក្នុងនោះអន្តរជាតិ ក៏បានធ្វើអន្តរាគមន៏មកកាន់​រដ្ឋាភិ​បាល​ខ្មែរសព្វថ្ងៃ ឲ្យបើកផ្លូវដល់លោក សម រង្ស៊ី បានវិលត្រឡប់ចូលមកក្នុងប្រទេសកម្ពុជា​វិញ​ឲ្យបានឆាប់ និងសេរី ដោយគ្មានលក្ខណ្ឌផងដែរ ដើម្បីឲ្យលោក សម រង្ស៊ី បានចូលរួមក្នុង ការបោះឆ្នោតនៅឆ្នាំ២០១៣ខាងមុខនេះ ព្រោះលោក​សម រង្ស៊ី គឺជាបេក្ខភាពនាយករដ្ឋមន្រ្តី សម្រាប់ធ្វើការប្រគួតប្រជែងជាមួយលោក ហ៊ុន​ សែន គណបក្សប្រជាជន កាន់អំណាចស​ព្វ​

ថ្ងៃដែលដឹកនាំប្រទេសតាមរបៀបផ្តាច់ការនោះ ៕