អ្នកស្រុកថៃ ធ្វើបាតុកម្មតវ៉ានឹងប្រទេសឡាវ ពីការសង់ទំនប់វារីអគ្គិសនីសាយ៉ាប៊ូរី
កាលពីម្សិលមិញ
ភ្នំពេញៈ ប្រទេសឡាវបានប្រកាសកាលពីម្សិលមិញថា ខ្លួននឹងចាប់ផ្តើមសាងសង់ទំនប់វារីអគ្គិសនីសាយ៉ាប៊ូរីតម្លៃ ៣,៨ ពាន់លានដុល្លារអាមេរិកដ៏ចម្រូងចម្រាស នៅសប្តាហ៍នេះ ដែលជាការជម្រះទៅនឹងប្រទេសកម្ពុជា វៀតណាម និងអង្គការបរិស្ថាន ដែលបារម្ភពីការប៉ះពាល់ជីវិតមនុស្សរាប់លាននាក់ ដោយសារតែការសង់ទំនប់នេះ។
លោក Viraponh Viravong អនុរដ្ឋមន្រ្តីថាមពលនិងរ៉ែឡាវ បានថ្លែងថា ពិធីបញ្ចុះបឋមសិមានៅថ្ងៃស្អែកជាការកំណត់ការចាប់ផ្តើម គម្រោងជាផ្លូវការ ដែលជាទំនប់ទី១ នៅដងទន្លេមេគង្គ។
លោកបន្តថា៖ «វាត្រូវបានវាយតម្លៃនិងបានពិភាក្សា ២ឆ្នាំចុងក្រោយនេះ។ យើងបានដោះស្រាយក្តីកង្វល់ភាគច្រើន»។
ក្រុមអង្គការបរិស្ថានព្រមានថា ទំនប់កម្លាំង១២៨៥ មេហ្គាវ៉ាត់នេះ នឹងរាំងស្ទះលំហូរដីល្បាប់ ការបម្លាស់ទីរបស់ត្រី ហើយបើកទ្វារសម្រាប់ទំនប់១០ ទៀត ដែលបានស្នើសាងសង់លើទន្លេនេះ ក្នុងនោះ មានទំនប់ ៧ នៅឡាវ ដែលអង្គការបរិស្ថានព្យាករថា អាចមានផលប៉ះពាល់អវិជ្ជមានដល់មនុស្ស ៦០ លាននាក់។
កិច្ចសន្យាទិញទួរប៊ីន ដំណឹងជ្រើសរើសបុគ្គលិក និងការរាយការណ៍ពីការផ្តើមសង់ទំនប់សាយ៉ាប៊ូរី នៅភាគខាងជើងឡាវ បានបង្ហាញចេតនារបស់ឡាវ ក្នុងការសង់ទំនប់នេះ បើទោះពុំមានការឯកភាពពីថ្នាក់តំបន់ក៏ដោយ។
ទោះជាយ៉ាង ណា ការប្រកាសនេះផ្ទុយពីការធានារបស់ឡាវ ចំពោះប្រទេសសមាជិកគណៈកម្មការទន្លេមេគង្គដទៃទៀត គឺកម្ពុជា និងវៀតណាម ដែលថា គម្រោងបានផ្អាក ខណៈដែលការសិក្សាបន្ថែមទៀត ដើម្បីត្រួតពិនិត្យលើផលប៉ះពាល់ដែលអាចមានលើសហគមន៍ខ្សែទឹកខាង ក្រោម។
ប្រទេសសមាជិកគណៈកម្មការទន្លេមេគង្គដទៃទៀតគឺ ថៃ គ្រោងនឹងទទួលបានអគ្គិសនីប្រហែល ៩០ ភាគរយ ពីទំនប់នេះ។
លោក Kirk Herbertson អ្នកសម្របសម្រួលគោលនយោបាយនៅអាស៊ីអាគ្នេយ៍ នៃអង្គការបរិស្ថានទន្លេអន្តរជាតិ នៅសហរដ្ឋអាមេរិក ថ្លែងកាលពីម្សិលមិញថា លោកបានឮពីរបាយការណ៍ដំបូងនៃសេចក្តីប្រកាសនេះ។
លោកបន្តថា ៖ «ប៉ុន្តែវាគ្រាន់តែបង្ហាញពីការសន្យារបស់ឡាវក្នុងការសហការ ជាមួយនឹងប្រទេសជិតខាង មិនមែនជាការសន្យាពិតប្រាកដទេ។ គម្រោងមិនដែលត្រូវបានពន្យារពេល ដូចដែលឡាវបានលើកឡើងនោះទេ»។
លោក Herbertson បានបន្ថែមថា កម្ពុជានិងវៀតណាម បានស្នើសុំឲ្យឡាវសិក្សាលើការពឹងផ្អែករបស់ប្រជាជនលើទន្លេ លើផលនេសាទ និងធ្វើកសិកម្ម ហើយត្រួតពិនិត្យថាតើត្រូវមានដំណើរយ៉ាងដូចម្តេច?»។
«ឡាវមិន ដែលធ្វើកិច្ចការនោះ ទេ។ ចុងបញ្ចប់ គេបានធ្វើការសិក្សាដែលមានព័ត៌មាន ដែលមិនបានសួរនូវសំណួរទាំងនេះឡើយ»។
រដ្ឋាភិបាលប្រទេសហ្វាំង ឡង់បានប្រកាសសប្តាហ៍នេះថា ខ្លួននឹងស៊ើបអង្កេតលើអ្នកនិពន្ធម្នាក់ដែលបានធ្វើរបាយការណ៍ សិក្សាមួយ ក្នុងចំណោមរបាយការណ៍នេះ គឺក្រុមហ៊ុន P'yry ចំពោះតួនាទីក្នុងការធ្វើប្រឹក្សាឲ្យឡាវអំពីទំនប់សាយ៉ាប៊ូរី។
លោក Herbertson លើកឡើងថា៖ «ឡាវបាននិយាយអំពីរបៀបដែលខ្លួនបានជួលក្រុមហ៊ុន P'yry ដើម្បីដោះស្រាយក្តីកង្វល់ដល់ប្រទេសជិតខាង។ ខណៈដែលវាអាចប្រើពាក្យត្រូវ ប៉ុន្តែវាជាការសិក្សាខុស»។ ក្តីមន្ទិលចាប់ផ្តើមកើនឡើង នៅខែមេសា ដែលការងារច្រើនពីដំបូងកំពុងធ្វើនៅទីតាំងនោះ នៅពេលដែលក្រុមហ៊ុនថៃ Ch. Karnchang បានចុះហត្ថលេខាលើកិច្ចសន្យាសាងសង់ជាមួយក្រុមហ៊ុន Xayaburi Power។
លោក Viraponh ថ្លែងពីម្សិលមិញថា ឡាវបានដោះស្រាយបញ្ហាបរិស្ថាន ដោយធ្វើការសិក្សាផ្ទាល់ខ្លួន ទៅលើស្តង់ដារនៃគម្រោងទំនប់នេះ។ «យើងបានយកចិត្តទុកដាក់លើបញ្ហាបរិស្ថាន និងបញ្ហាដទៃទៀត។ គម្រោងដទៃទៀតអាចអនុវត្តតាមស្តង់ដារស្រដៀងគ្នានឹងទំនប់ សាយ៉ាប៊ូរី»។
ប្រទេសឡាវបានថ្លែងថា ខ្លួនប្តេជ្ញាពង្រឹងសេដ្ឋកិច្ចរបស់ខ្លួនតាមការលក់ថាមពលពី គម្រោងវារីអគ្គិសនីរបស់ខ្លួន ជាអ្វីដែលលោក Viraponh អះអាងជាថ្មីម្តងទៀត កាលពីម្សិលមិញ។ លោកបន្តថា៖«វារីអគ្គិសនីជាអត្ថប្រយោជន៍ធម្មជាតិធំសម្រាប់ ឡាវ បើឡាវមិនអាចអភិវឌ្ឍទំនប់សាយ៉ាប៊ូរី តើឡាវមានជម្រើសអ្វី?»
ការប្រកាសនេះធ្វើឡើង ខណៈប្រជាជនថៃ២៥០នាក់តំណាងឲ្យ ២៤០០០ នាក់ ដែលនឹងទទួលរងផលប៉ះពាល់ពីទំនប់នោះ បានធ្វើការតវ៉ាកាលពីម្សិលមិញ។
ខណៈមន្រ្តីកំពុងចូលរួម ក្នុងកិច្ចប្រជុំអាស៊ីអឺរ៉ុបលើកទី ៩ នៅវៀងចន្ទន៍ ប្រទេសឡាវ អ្នកតវ៉ាថៃបានឡើងលើទូកតូចនៅទន្លេខាងប្រទេសថៃ បង្ហាញឆន្ទៈរបស់ខ្លួន។ បាតុកម្មមិនត្រូវបានអនុញ្ញាតទេនៅទីក្រុងវៀងចន្ទន៍។
សេចក្តី ថ្លែងពីអង្គការទន្លេអន្តរជាតិថា៖ «កិច្ចប្រជុំផ្តល់ឱកាសសំខាន់ដល់មេដឹកនាំអាស៊ី និងអឺរ៉ុប ដើម្បីដោះស្រាយបញ្ហាទំនប់សាយ៉ាប៊ូរី ព្រោះកិច្ចប្រឹងប្រែងធានាសន្តិសុខស្បៀង និងការអភិវឌ្ឍប្រកបដោយចីរភាព ទទួលរងផលប៉ះពាល់ពីទំនប់»។
«រដ្ឋាភិបាលអាស៊ី និងអឺរ៉ុបជាច្រើនបានធ្វើជាដៃគូអភិវឌ្ឍន៍ និងអ្នកឧបត្ថម្ភហិរញ្ញវត្ថុដល់គណៈកម្មការទន្លេមេគង្គ ជាស្ថាប័នអន្តររដ្ឋាភិបាលទទួលខុសត្រូវគ្រប់គ្រងនិងការពារ ទន្លេមេគង្គប្រកបដោយចីរភាព»។
ប្រព័ន្ធផ្សព្វផ្សាយក្នុងស្រុក បានរាយការណ៍ពីម្សិលមិញថា លោកនាយករដ្ឋមន្រ្តី ហ៊ុន សែន បានជួបមន្រ្តីជាន់ខ្ពស់ឡាវ ដើម្បីពិភាក្សាពីទំនប់សាយ៉ាប៊ូរីនេះ។
លោក តែ ណាវុធ អគ្គលេខាធិការនៃគណៈកម្មាធិការជាតិទន្លេមេគង្គកម្ពុជា មិនអាចទាក់ទងសុំការអត្ថាធិប្បាយបានទេ ប៉ុន្តែបានប្រាប់ ភ្នំពេញប៉ុស្តិ៍ ពីថ្ងៃអាទិត្យថា កម្ពុជាបានបញ្ជូនប្រតិភូទៅកន្លែងសង់ទំនប់សាយ៉ាប៊ូរី ពីសប្តាហ៍មុន ដើម្បីរាយការណ៍មករដ្ឋាភិបាលអំពីការរកឃើញ។
មន្រ្តីក្រសួងធនធានទឹក ក្រសួងបរិស្ថាន និងគណៈកម្មការទន្លេមេគង្គ មិនអាចទាក់ទងសុំការអត្ថាធិប្បាយបានទេ កាលពីម្សិលមិញ៕
No comments:
Post a Comment
yes