អង្គការលើកលែងទោសអន្តរជាតិកាលពីថ្ងៃម្សិលមិញ បានធ្វើការជំរុញដល់ក្រុមអ្នកភូមិដែលមានបញ្ហាដីធ្លីក្នុងតំបន់បឹងកក់ សហគមន៍បុរីកីឡា និងសហគមន៍មួយចំនួនទៀតក្នុងទីក្រុងភ្នំពេញ ឲ្យអត់ធ្មត់ និងស៊ូទ្រាំក្នុងការធ្វើការតស៊ូមតិ ដើម្បីសិទ្ធិលំនៅដ្ឋាន និងសិទ្ធិមូលដ្ឋានផ្សេងៗទៀត។
ក្រុមសហគមន៍ដែលមានបញ្ហាជម្លោះដីធ្លីក្នុងទីក្រុងភ្នំពេញស្វែងរក អន្តរាគមន៍ពីស្ថានទូតសហរដ្ឋអាមេរិកកន្លងមក (រូប៖RFA)
ក្នុងជំនួបជាមួយក្រុមអ្នកភូមិដែលមានបញ្ហាដីធ្លីក្នុងទីក្រុងភ្នំពេញប្រមាណជាង១០០នាក់ ដែលប្រមូលផ្តុំគ្នានៅខាងមុខស្ថានទូតសហរដ្ឋអាមេរិក លោកស្រី Amanda Howle មន្រ្តីគ្រប់គ្រងផ្នែកជំនួយ របស់អង្គការលើកលែងទោសអន្តរជាតិប្រចាំប្រទេសអូស្រ្តាលីបាននិយាយថា «ចូរកុំអស់សង្ឃឹម ហើយកុំគិតថា បងប្អូននៅឯកោ.. ពួកយើង [សហគមន៍អន្តរជាតិ] បានដឹង និងយល់យ៉ាងច្បាស់ថា បងប្អូនកំពុងទទួលរងនូវការរំលោភបំពានសិទ្ធិសេរីភាពយ៉ាងធ្ងន់ធ្ងរ»។
ចំពោះករណីដែលអាជ្ញាធរបានធ្វើការចាប់ឃុំខ្លួន និងកាត់ទោសសកម្មជនដីធ្លីចំនួនពីររូប គឺអ្នកស្រី យ៉ោម បុប្ឆា មកពីសហគមន៍បឹងកក់ និងអ្នកស្រី ទឹម សាក់មុន្នី មកពីសហគមន៍បុរីកីឡា លោកស្រី Amanda Howle បានថ្លែងថា រឿងរ៉ាវរបស់ពួកគេទាំងពីរនាក់នេះ គឺផ្តើមចេញពីការតវ៉ារឿងទំនាស់ដីធ្លី ដូច្នេះប្រសិនជារកឃើញថា ពួកគេតវ៉ារឿងដីធ្លីពិតប្រាកដនោះ អាជ្ញាធរត្រូវតែដោះលែងពួកគេ។
គួររំលឹកថា អ្នកស្រី យ៉ោម បុប្ឆា សកម្មជនដីធ្លីនៅតំបន់បឹងកក់ ត្រូវបានអាជ្ញាធរធ្វើការចាប់ឃុំខ្លួនកាលពីថ្ងៃទី០៤ ខែតុលា ឆ្នាំ២០១២កន្លងទៅចំពោះបទប្រើអំពើហិង្សាដោយចេតនាមានស្ថានទម្ងន់ទោស។ ចំណែកអ្នកស្រី ទឹម សាក់មុន្នី សកម្មជនដីធ្លីនៅសហគមន៍បុរីកីឡា ក៏ត្រូវអាជ្ញាធរធ្វើការចាប់ឃុំខ្លួនបន្ទាប់គ្នានោះដែរ តាមបណ្តឹងរបស់ក្រុមហ៊ុនផានអ៊ីម៉ិច៕
No comments:
Post a Comment
yes