អគ្គលេខាធិការអាស៊ាន លោក ស៊ូរិន ពិតសូវ៉ាន់ ថ្លែងក្នុងសន្និសីទកាសែត
បន្ទាប់ពីសេចក្ដីប្រកាសសិទ្ធិមនុស្សអាស៊ានត្រូវបានអនុម័ត ក្នុងកិច្ច
ប្រជុំកំពូលអាស៊ាន នារាជធានីភ្នំពេញ នៅថ្ងៃ១៨ វិច្ឆិកា ឆ្នាំ២០១២
សេចក្ដីប្រកាសស្ដីពីសិទ្ធិមនុស្សអាស៊ាន បានអនុម័តជាផ្លូវការហើយនៅក្នុងកិច្ចប្រជុំកំពូលអាស៊ានលើកទី២១ នៅកម្ពុជា។
កន្លងមកអង្គការសង្គមស៊ីវិលជាតិ និងអន្តរជាតិ បានស្នើសុំឲ្យរដ្ឋាភិបាលអាស៊ានទាំងអស់ ផ្អាកអនុម័តជាបណ្ដោះអាសន្ន នូវសេចក្ដីប្រកាសស្ដីពីសិទ្ធិមនុស្សអាស៊ាននោះសិន តែនៅទីបំផុតសេចក្ដីប្រកាសនេះរដ្ឋាភិបាលអាស៊ាននៅតែអនុម័ត។
រដ្ឋាភិបាលប្រទេសក្នុងតំបន់អាស៊ានទាំង ១០ បានចុះហត្ថលេខាអនុម័តលើសេចក្ដីប្រកាសស្ដីពីសិទ្ធិមនុស្សអាស៊ាន នៅថ្ងៃទី១៨ វិច្ឆិកា ទោះបីជាក្រុមអង្គការសិទ្ធិមនុស្សជាតិ និងអន្តរជាតិ មានការព្រួយបារម្ភថា សេចក្ដីប្រកាសនោះមិនគោរពបានតាមនិយាមសិទ្ធិមនុស្សអន្តរជាតិ។
រដ្ឋមន្ត្រីក្រសួងការបរទេសឥណ្ឌូនេស៊ី និងអតីតជាប្រធានអាស៊ាន លោក ម៉ាទី ណាតាឡេហ្គាវ៉ា (Marty Natalegawa) មានប្រសាសន៍ថា សេចក្ដីប្រកាសអាស៊ាននេះ មានសារសំខាន់ណាស់សម្រាប់ប្រទេសក្នុងតំបន់ ពីព្រោះថា សេចក្ដីប្រកាសស្ដីពីសិទ្ធិមនុស្សនេះ គឺស្របទៅនឹងសិទ្ធិមនុស្សអន្តរជាតិ។
លោក ម៉ាទី បានអះអាងថា ការរិះគន់ណាមួយអំពីសេចក្ដីប្រកាសនេះថា មិនល្អនោះ លុះត្រាណាអ្នករិះគន់ទាំងនោះមានសេចក្ដីប្រកាសស្ដីពីសិទ្ធិមនុស្សនៅក្នុងដៃសិន៖ «ខ្ញុំគិតថា បើសិនយើងជាអ្នកអង្កេតមិនលំអៀងលើបញ្ហានេះ យើងនឹងទទួលស្គាល់សេចក្ដីប្រកាសនេះ ព្រោះសេចក្ដីប្រកាសនេះ ស្របទៅនឹងកម្រិតសិទ្ធិមនុស្សអន្តរជាតិ និងសេចក្ដីជាប្រកាសសកលស្ដីពីសិទ្ធិមនុស្សនៅទីក្រុងវីយ៉ែន»។
ឆ្លើយតបទៅនឹងបញ្ហានេះ មន្ត្រីអង្គការសង្គមស៊ីវិលបានលើកឡើងថា សេចក្ដីប្រកាសស្ដីពីសិទ្ធិមនុស្សនេះ មិនត្រូវគេបង្ហាញឲ្យអង្គការសង្គមស៊ីវិលបានឃើញ ឬយកមកពិនិត្យ ដើម្បីផ្ដល់អនុសាសន៍នូវចំណុចណាមួយនោះឡើយ។
ប្រធានក្រុមអ្នកច្បាប់ការពារសិទ្ធិកម្ពុជា លោកបណ្ឌិត សុក សំអឿន បានពន្យល់ថា ប្រទេសក្នុងតំបន់អាស៊ានមានប្រទេសខ្លះ មានការគោរពសិទ្ធិមនុស្សខ្ពស់ និងប្រទេសខ្លះពុំមានការគោរពសិទ្ធិមនុស្ស។ លោកបញ្ជាក់ថា ប្រសិនបើមានករណីរំលោភសិទ្ធិមនុស្សនៅក្នុងប្រទេសមួយ ហើយការដោះស្រាយគេពឹងលើសេចក្ដីប្រកាសនេះ នៅពេលនោះនឹងមានបញ្ហា ពីព្រោះថា គេនឹងមិនយកសេចក្ដីប្រកាសជាសកលស្ដីពីសិទ្ធិមនុស្សរបស់អង្គការសហប្រជាជាតិមកសំអាងជាធំនោះ៖ «ស្រាប់តែអនុម័តអ៊ីចឹងទៅ ឧទាហរណ៍ដូចជាប្រទេសកម្ពុជា យើងធ្វើសត្យានុម័តលើច្បាប់សិទ្ធិមនុស្ស អង្គការសហប្រជាជាតិច្រើន ទន្ទឹមនឹងហ្នឹង រដ្ឋធម្មនុញ្ញយើងក៏មានលក្ខណៈខ្ពស់ជាងសេចក្ដីប្រកាសរបស់សិទ្ធិមនុស្សអាស៊ានដែរ»។
ប្រធានប្ដូរវេននៃគណៈកម្មការអន្តររដ្ឋាភិបាលសិទ្ធិមនុស្សអាស៊ាន និងជាប្រធានគណៈកម្មាធិការសិទ្ធិមនុស្សកម្ពុជា លោកទេសរដ្ឋមន្ត្រី ឱម យ៉ិនទៀង បានឲ្យដឹងថា ថ្ងៃនេះជាថ្ងៃប្រវត្តិសាស្ត្រសម្រាប់ប្រទេសជាសមាជិកអាស៊ាន ដែលបានអនុម័តសេចក្ដីប្រកាសស្ដីពីសិទ្ធិមនុស្សអាស៊ាន ហើយសេចក្ដីប្រកាសនេះ បង្ហាញពីឆន្ទៈ និងការប្ដេជ្ញាចិត្តរបស់អាស៊ាន ក្នុងការលើកកម្ពស់ និងការពារសិទ្ធិមនុស្ស។
ភ្ជាប់ទៅនឹងបញ្ហានេះ អគ្គលេខាធិការអាស៊ាន លោក ស៊ូរិន ពិតស៊ូវ៉ាន់ (Surin Pitsuwan) បានអះអាងដែរថា មេដឹកនាំនៃប្រទេសជាសមាជិកសមាគមអាស៊ាន បានប្ដេជ្ញាថា នឹងខិតខំធ្វើយ៉ាងណាឲ្យសិទ្ធិមនុស្សអាស៊ានល្អប្រសើរ និងជំរុញឲ្យសេចក្ដីប្រកាសនេះមានតម្លៃស្មើនឹងលិខិតុបករណ៍សិទ្ធិមនុស្សអន្តរជាតិ និងសេចក្ដីប្រកាសជាសកលស្ដីពីសិទ្ធិមនុស្សនៅទីក្រុងវីយ៉ែន។
ទោះបីជាយ៉ាងណាក៏ដោយ អ្វីដែលជាក្ដីព្រួយបារម្ភរបស់ក្រុមអង្គការសង្គមស៊ីវិលនោះ គឺប្រទេសទាំង ១០ ដែលជាសមាជិកអាស៊ាននេះ មិនមែនសុទ្ធតែជាប្រទេសប្រកាន់នូវរបបប្រជាធិបតេយ្យនិយមសេរីទាំងអស់នោះទេ។ ប្រទេសខ្លះប្រកាន់នូវរបបកុម្មុយនិស្ត ខ្លះប្រកាន់នូវរបបផ្ដាច់ការ ហើយខ្លះទៀត ប្រកាន់របបយោធានិយមជាដើម។ ដោយសារហេតុផលនេះហើយ ទើបមជ្ឈដ្ឋានជាតិ និងអន្តរជាតិ មានការព្រួយបារម្ភថា សេចក្ដីប្រកាសស្ដីពីសិទ្ធិមនុស្សអាស៊ាន គ្រាន់តែជាយន្តការមួយដើម្បីសម្របសម្រួលអំណាច និងផលប្រយោជន៍នៃក្រុមមេដឹកនាំរបស់ប្រទេសនីមួយៗតែប៉ុណ្ណោះ។
ម្យ៉ាងវិញទៀត នៅមុនពេលកិច្ចប្រជុំកំពូលអាស៊ាន បានមកដល់ ដែលកម្ពុជាជាប្រធានអង្គប្រជុំនេះ ក្រុមអង្គការសិទ្ធិមនុស្សអន្តរជាតិចំនួន ៨ បានផ្ញើលិខិតរួមគ្នា ទទូចឲ្យរដ្ឋាភិបាលក្នុងតំបន់អាស៊ានផ្អាកជាបណ្ដោះអាសន្ន ចំពោះការអនុម័តលើសេចក្ដីប្រកាសស្ដីពីសិទ្ធិមនុស្សអាស៊ាន ពីព្រោះថា សេចក្ដីប្រកាសនេះមិនទាន់ធានាលើការការពារសិទ្ធិមនុស្សឲ្យបានពេញលេញ និងស្របទៅតាមបទដ្ឋានសិទ្ធិមនុស្សអន្តរជាតិនៅឡើយ។ បញ្ហានេះនឹងក្លាយទៅជាភាពប្រថុយប្រថានក្នុងការការពារសិទ្ធិមនុស្សនៅក្នុងតំបន់។
អង្គការសិទ្ធិមនុស្សអន្តរជាតិចំនួន ៨ នោះ រួមមាន Human Rights Watch, Amnesty International, Freedom House និងអង្គការមួយចំនួនទៀត៕
No comments:
Post a Comment
yes