កំពង់ធំៈ មន្ត្រីរដ្ឋបាលព្រៃឈើកំពង់ថ្ម ស្រុកសន្ទុក បានស្ទាក់ចាប់រថយន្តក្រុងដឹកជញ្ជូនអ្នកដំណើរមួយគ្រឿង របស់ក្រុមហ៊ុន រិទ្ធីមុនី ដែលបានលួចលាក់ដឹកឈើប្រណីតប្រភេទគ្រញូងចំនួន ២២ដុំ ស្មើនឹង០,៣០៣ ម៉ែត្រគូប ខណៈដែលរថយន្តដឹកអ្នកដំណើរមួយនេះ ដឹកភ្ញៀវទេសចរជាតិ និងអន្តរជាតិ ចំនួន ២៨ នាក់ ចេញពីខេត្តសៀមរាប ឆ្ពោះទៅកាន់រាជធានីភ្នំពេញ។
លោក សុទ្ធ ម៉ារី នាយផ្នែករដ្ឋបាលព្រៃឈើកំពង់ថ្មបានឲ្យដឹងថា រថយន្តក្រុងដឹកអ្នកដំណើររបស់ក្រុមហ៊ុន រិទី្ធមុនី ពាក់ស្លាក ភ្នំពេញ 3B-0238 ត្រូវបានស្ទាក់ឃាត់ឆែកឆេររកឃើញប្រភេទឈើគ្រញូង ដែលអ្នកបើកបរលួចបង្កប់មក ក្រោយពីទទួលព័ត៌មានពីភ្នាក់ងារសម្ងាត់រាយការណ៍ថា រថយន្តក្រុមហ៊ុនខាងលើបានដឹកឈើគ្រញូងដាក់នៅចំណុចភូមិអូរ ស្ថិតនៅក្នុងស្រុកជីក្រែង ខេត្តសៀមរាប។
លោកបញ្ជាក់ថា៖«កម្លាំងចម្រុះមានអាវុធហត្ថ ប៉ូលិស និងរដ្ឋបាលព្រៃឈើបានស្ទាក់ព័ទ្ធចាប់រថយន្តក្រុងនេះកាលពីម៉ោង ៣ទៀបភ្លឺ ក្រោយពីទទួលបានសេចក្តីរាយការណ៍សម្ងាត់ពីខេត្តសៀមរាប ប៉ុន្តែ អ្នកបើកបរបានលួចរត់គេចខ្លួនបាត់ពេលសមត្ថកិច្ចកំពុងធ្វើការឆែករកឈើគ្រញូង ហើយយើងពិតជារកឃើញឈើគ្រញូងដូចគេរាយការណ៍មកមែន»។
លោកបន្ថែមថា ៖ «យើងបានជូនដំណឹងទៅដល់ក្រុមហ៊ុន រិទ្ធីមុនី អំពីរឿងរ៉ាវនេះ ដើម្បីដោះស្រាយតាមផ្លូវច្បាប់»។
លោក សំ វិចិត្រ ប្រធានរដ្ឋបាល ក្រុមហ៊ុនដឹកអ្នកដំណើរ រិទ្ធីមុនី បានថ្លែងថា ក្រុមហ៊ុនកំពុងរៀបចំសំណុំឯកសារ ដើម្បីចូលខ្លួនទៅដោះស្រាយបញ្ហានេះ។
លោកបញ្ជាក់ថា៖«យើងកំពុងរៀបចំឯកសារធ្វើតាមផ្លូវច្បាប់ ហើយកំពុងស្វែងរកចាប់ខ្លួនអ្នកបើកបររថយន្តរបស់ក្រុមហ៊ុន ដែលបានប្រព្រឹត្តល្មើសនឹងច្បាប់ក្រុមហ៊ុនផងដែរ»។
នៅថ្ងៃដដែលនោះដែរ សមត្ថកិច្ចចម្រុះដដែលក៏បានស្ទាក់ចាប់រថយន្តមួយគ្រឿងទៀត នៅម៉ោង ១០ព្រឹក នៅចំណុចគល់ស្ពានកំពង់ថ្ម ស្ថិតនៅក្នុងភូមិត្រស់ ឃុំ បល្ល័ង្ក ស្រុកបារាយណ៍។ រថយន្តដឹកអ្នកដំណើរប្រភេទកាមរី បានដឹកឈើគ្រញូងសរុបចំនួន ២៣៥ដុំ ស្មើនឹង ១.២០០គីឡូក្រាម ប៉ុន្តែ ម្ចាស់រថយន្ត ដែលបើកបរបានរត់គេចខ្លួនបាត់ដូចគ្នាដែរ។
ទោះយ៉ាងណាមន្ត្រីព្រៃឈើកំពង់ថ្ម លោក សុទ្ធ ម៉ារី បានបញ្ជាក់ដែរថា ៖ «ក្នុងរយៈពេល ៣០ថ្ងៃ បើសិនម្ចាស់រថយន្តទាំងពីរមិនចូលមកដោះស្រាយតាមនីតិវិធីច្បាប់ទេ យើងនឹងបញ្ជូនសំណុំរឿងនិងវត្ថុតាង ទៅកាន់តុលាការ ចាត់ការតាមផ្លូវច្បាប់»៕
No comments:
Post a Comment
yes