ស្ដ្រីជនជាតិខ្មែរម្នាក់បង្ហាញស្នាមរបួសបន្ទាប់ពីទាហានថៃគប់
បន្ទាយមានជ័យៈ ប្រជាពលរដ្ឋខែ្មរចំណាកស្រុក ៦ នាក់ និងជនជាតិថៃម្នាក់ ដែលម្នាក់កំពុងមានផ្ទៃពោះ ៧ ខែ ផងនោះ ត្រូវទាហានថៃគប់ដុំថ្ម និងវាយឲ្យរងរបួស កាលពីព្រឹកម្សិលមិញ នៅខណៈពេលដែលពួកគេ កំពុងនាំគ្នាសម្រុកឆ្លងដែន ចូលទៅធ្វើការនៅប្រទេសថៃ តាមច្រករបៀងព្រៃគប់ ស្ថិតនៅក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត។ អំពើហិង្សានេះ បានធ្វើឲ្យពលរដ្ឋខ្មែរប្រមាណ ៦០០ នាក់ផ្សេងទៀតដែលបម្រុងឆ្លងដែន បានបង្ខំចិត្តវិលមកស្រុកវិញ។
ប្រជា ពលរដ្ឋខ្មែររាប់រយនាក់ នៅតាមព្រំដែន តែងតែចេញ ចូល ព្រឹកល្ងាច ទៅធ្វើការនៅប្រទេសថៃ ដូចជាស្ទូងស្រូវ ច្រូតស្រូវ ឬការងារកសិកម្មផ្សេងៗទៀត ដែលជាញឹកញាប់ តែងតែទទួលរងនូវការប្រមាថ មាក់ងាយ ឬការវាយដំធ្វើបាបពីសំណាក់អាជ្ញាធរថៃ។
លោក ណង សុង មេភូមិព្រៃគប់ បាននិយាយថា ទាហានព្រំដែនថៃពីរនាក់ បានគប់ដុំថ្ម និងប្រើដំបងឈើ វាយមកលើក្រុមប្រជាពលរដ្ឋខ្មែរប្រុសស្រី ចំណាកស្រុក ប្រមាណជា ៦០០ នាក់ បណ្តាលឲ្យស្រ្តីជាជនជាតិខ្មែរចំនួន ៥ នាក់ និងបុរសម្នាក់រងរបួស។ ក្រៅពីនោះ ជនជាតិថៃម្នាក់ ដែលមកទទួលយកកម្មករខ្មែរ នៅតំបន់ព្រំដែន ទៅធ្វើការនៅថៃក៏បានរងរបួសធ្ងន់ធ្ងរបែកក្បាលហូរឈាមផងដែរ។ លោក ណង សុង បានបញ្ជាក់ថា៖ «ពលរដ្ឋយើង បានដណ្តើមគ្នាចូលទៅថៃ ដើម្បីឆាប់បានការងារធ្វើ។ ពេលនោះទាហានថៃ ដេញឲ្យចូលម្តងម្នាក់ៗ តែមិនឈ្នះ ក៏ប្រើហិង្សារើសដុំថ្មគប់ និងយកដំបងឈើ វាយពួកគេ ឲ្យរបួសដៃ ជើង ខ្នងនិងខ្លួនជាដើម»។
លោក បន្តថា ជនជាតិខ្មែរទាំង ៦ នាក់ នោះ រស់នៅក្នុងភូមិទំនប់កប្រាំ និងភូមិព្រៃគប់។ ក្នុងចំណោមពួកគេ មានស្រ្តីម្នាក់ មានផ្ទៃពោះ ៧ ខែ ឈ្មោះសួរ ស្រីលីន អាយុ ២៤ ឆ្នាំ។ នាងត្រូវបានគេដឹកយកទៅពិនិត្យផ្ទៃពោះ ថាតើវាមានប៉ះពាល់ដល់កូននៅក្នុងផ្ទៃដែរឬយ៉ាងណា?
លោកណង សុង បានថ្លែងថា៖ «ទាហានថៃ ហាក់ដូចជាមើលងាយពលរដ្ឋខ្មែរណាស់។ រាល់ពេលចេញចូល គេមិនប្រើដៃរាប់ទេ។ គេសុទ្ធតែយកដំបងឈើ មកគោះក្បាលរាប់»។ លោកបានបន្តថា អាជ្ញាធរខ្មែរ-ថៃ បានជួបប្រជុំគ្នាបន្ទាន់ បន្ទាប់ពីមានហេតុការណ៍នោះដើម្បីដោះស្រាយ និងបង្ការកុំឲ្យមានបញ្ហាបែបនេះកើតឡើងបន្តទៀត នៅថ្ងៃក្រោយ។
លោក សៅ វាសនា ប្រធានក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកអន្តរជាតិប៉ោយប៉ែត បានឲ្យដឹងថា នៅក្នុងហេតុការណ៍នោះ ទាហានការពារព្រំដែនថៃ បានបាញ់ ៥គ្រាប់ ទៅលើមេឃ ដើម្បីគំរាមប្រជាពលរដ្ឋខ្មែរ កុំឲ្យតវ៉ា ឬប្រើអំពើហិង្សាទៅលើពួកគេ។
លោកសៅ វាសនា បានបញ្ជាក់ថា៖«ភ្លាមៗនោះ នគរបាលប៉ុស្តិ៍យើង ដែលនៅជិតនោះបានទៅអន្តរាគមន៍ ដើម្បីកុំឲ្យមានអំពើហិង្សាបន្ថែមទៀត។ មានតែពលរដ្ឋប្រហែលជា ៣០នាក់ប៉ុណ្ណោះ បានចូលទៅធ្វើការនៅថៃ។ ចំណែករាប់រយនាក់ផ្សេងទៀត បានត្រឡប់មកផ្ទះវិញ»។ លោកសៅ វាសនា បានឲ្យដឹងថា ក្នុងមួយខែៗ មានប្រជាពលរដ្ឋខ្មែរ ប្រមាណជា ៧ ពាន់នាក់ត្រូវបានអាជ្ញាធរថៃ ដឹកបញ្ជូនត្រឡប់មកវិញ បន្ទាប់ពីពួកគេ ឆ្លងដែនខុសច្បាប់ទៅរកការងារធ្វើនៅក្នុងប្រទេសថៃ។
យោងតាម របាយការណ៍ ៦ ខែ ដើមឆ្នាំ ២០១២ របស់ការិយាល័យទំនាក់ទំនងព្រំដែនកម្ពុជា-ថៃ បានឲ្យដឹងថា ទាហានថៃ បានបាញ់សម្លាប់ប្រជាពលរដ្ឋខ្មែរ ដែលឆ្លងដែនចូលកាប់ឈើខុសច្បាប់ចំនួន ៣៨ នាក់ របួស ១០ នាក់ បាត់ខ្លួន ០១ នាក់ និងចាប់ដាក់ពន្ធនាគារចំនួន១៩៤ នាក់។ លើសពីនេះ ប្រជាពលរដ្ឋខ្មែរ ដែលឆ្លងដែនខុសច្បាប់ ចំនួន៦៨៦៥៩ នាក់ ត្រូវបានចាប់បញ្ជូនមកស្រុកខ្មែរវិញ៕
No comments:
Post a Comment
yes