ពិធីចុះហត្ថលេខារួម របស់មេដឹកនាំកំពូលអាស៊ាន ត្រូវបានធ្វើឡើង កាលពីម៉ោង ១២ និង ៣០ នាទី ថ្ងៃត្រង់ ថ្ងៃទី១៨ ខែវិច្ឆិកា ឆ្នាំ២០១២។
សេចក្តីថ្លែងការណ៍ភ្នំពេញ អំពីការអនុម័តសេចក្តីថ្លែងការណ៍ សិទ្ធិមនុស្ស អាស៊ាន ត្រូវបានលោក ហោ ណាំហុង ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា បានថ្លែងកាលពីថ្ងៃទី១៥ ខែវិច្ឆិកា ឆ្នាំ២០១២ ថា សេចក្តីថ្លែងការណ៍ ស្តីពី សិទ្ធិមនុស្ស អាស៊ាន ដែលប្រមុខរដ្ឋ ប្រមុខរដ្ឋាភិបាលអាស៊ាន អនុម័តនោះ រៀបចំដោយគណៈកម្មការអន្តររដ្ឋាភិបាលរបស់អាស៊ាន អំពីសិទ្ធិមនុស្ស។
លោក ហោ ណាំហុង បានគូសបញ្ជាក់ថា "ចំណុចនេះ មានការអត្ថាធិប្បាយជាច្រើន ពិសេសពីអង្គការសង្គមស៊ីវិលខ្លះ អំពីបញ្ហាសិទ្ធិមនុស្សនេះ។ តែខ្ញុំសូមបញ្ជាក់ថា មុននឹងរដ្ឋមន្ត្រីការបរទេសឯកភាព មុននឹងដាក់ជូនប្រមុខរដ្ឋ ប្រមុខរដ្ឋាភិបាលអាស៊ាន អនុម័ត និងចុះហត្តលេខាលើសេចក្តីថ្លែងការណ៍នេះ គឺគណៈកម្មការអន្តររដ្ឋាភិបាលអាស៊ាន បានពិភាក្សាជាមួយសង្គមស៊ីវិលរបស់អាស៊ាន ចំនួនច្រើនលើកទៅហើយ នៅប្រ៊ុយណេក៏មាន នៅហ្វីលីពីនក៏មាន មុននឹងសំរេចបានសេចក្តីថ្លែងការណ៍នេះ។ មិនមែនជាការអត្តនោម័តរបស់គណៈកម្មការអន្តររដ្ឋាភិបាលអាស៊ាន ស្តីពី សិទ្ធិមនុស្ស"។
យ៉ាងណាក៏ដោយ លោកឧបនាយករដ្ឋមន្ត្រី ហោ ណាំហុង បានបន្ថែមថា "ពិតហើយ សេចក្តីថ្លែងការណ៍ស្តីពីសិទ្ធិមនុស្សអាស៊ាននេះ មិនបំពេញចិត្តទាំងស្រុងរបស់NGO ខ្លះ សង្គមស៊ីវិលខ្លះ។ ហើយខ្ញុំសូមបញ្ជាក់ សេចក្តីថ្លែងការណ៍ ស្តីពីសិទ្ធិមនុស្សនេះ មិនមែនជាសេចក្តីថ្លែងការណ៍របស់ NGO ឬរបស់សង្គមស៊ីវិលទេ។ គឺជាសេចក្តីថ្លែងការណ៍របស់អាស៊ាន អំពីសិទ្ធិមនុស្ស ដើម្បីឈានទៅរកការពារ ឲ្យកាន់តែមានប្រសិទ្ធិភាព ឈានទៅរកការជំរុញ ឲ្យមានការគោរពសិទ្ធិមនុស្ស ឲ្យបានកាន់តែខ្លាំងក្លាថែមទៀត។ នេះជាជំហ៊ាន និងលើកទី១ ដែលអាស៊ាន មានសេចក្តីថ្លែងការណ៍នេះ"។
លោក ហោ ណាំហុង បានបន្ថែមថា "ខ្ញុំយល់ថា ជាការល្អណាស់ហើយ ដែលអាស៊ានមានឯកសារជាផ្លូវការ ឯកសារចុះហត្ថលេខា និងអនុម័តដោយថ្នាក់ដឹកនាំកំពូលរបស់អាស៊ាន នៅពេលនេះ។ ហើយនេះក៏ជាជំហ៊ានទី១ ទៅមុខទៀត។ ក្នុងករណីទៅថ្ងៃមុខ ពុំមានការចាំបាច់ ក្នុងករណីមានការចាំបាច់ គណៈកម្មការអន្តររដ្ឋាភិបាល ស្តីពី សិទ្ធិមនុស្ស អាចនឹងពិភាក្សាគ្នាទៀត អាចប្រជុំគ្នា អាចពិគ្រោះយោបល់ជាមួយសង្គមស៊ីវិល ដើម្បីកែលម្អរអត្តបទនេះ តទៅទៀត"៕
No comments:
Post a Comment
yes