គំនរឈើហុបដែលក្រុមហ៊ុនវៀតណាមបានកាប់ នៅក្នុងតំបន់ព្រៃសហគមន៍
ជនជាតិភាគតិចនៅភូមិឡំ ឃុំប៉ក់ញ៉ែ
រតនគិរីៈ ជនជាតិភាគតិចចារ៉ាយប្រមាណ ២០០ គ្រួសារ នៅក្នុងស្រុកអូរយ៉ាដាវ បានទទួលរងការគំរាមកំហែងពីសំណាក់អាជ្ញាធរមូលដ្ឋាន ឲ្យចុះឈ្មោះធ្វើប័ណ្ណដីជាកម្មសិទ្ធិឯកជន នៅខណៈដែលក្រុមហ៊ុនវៀតណាម ចំនួន ២ កំពុងឈូសឆាយដីព្រៃចម្ការវិលជុំ និងកាប់យកឈើប្រណីតៗដឹកចេញទៅប្រទេសវៀតណាម ដោយគ្មានការទប់ស្កាត់។
លោក រម៉ាស់ ឆ្វាង អាយុ ៤៧ ឆ្នាំជាតំណាងសហគមន៍នៅក្នុងភូមិឡំឃុំប៉ក់ញ៉ែ ស្រុកអូរយ៉ាដាវ ដែលមានទីតាំងជាប់នឹងព្រំដែនវៀតណាម បាននិយាយកាលពីម្សិលមិញថា ចាប់តាំងពីថ្ងៃទី ១១ ខែវិច្ឆិកាមក អាជ្ញាធរ បានបង្ខំឲ្យប្រជាពលរដ្ឋ ជនជាតិដើមភាគតិចចារ៉ាយ ប្រមាណ ២០០ គ្រួសារ ចុះឈ្មោះ ដើម្បីទទួលបានការវាស់វែងដីព្រៃសមូហភាពធ្វើប័ណ្ណជាកម្មសិទ្ធិ ឯកជនវិញ។ លោកបញ្ជាក់ថា៖«មានតែពលរដ្ឋ១០២ គ្រួសារ ប៉ុណ្ណោះ ព្រមចុះឈ្មោះបន្ទាប់ពីអាជ្ញាធរឃុំ និងស្រុកបានគំរាមថា បើមិនចុះឈ្មោះទេ អាជ្ញាធរ មិនជួយទេ ពេលក្រុមហ៊ុនឈូសឆាយប៉ះពាល់ដីព្រៃពួកគាត់។ មួយគ្រួសារគេសន្យាវាស់ឲ្យ ៥ ហិកតា»។
លោកបន្តថា ក្រៅពី១០២ គ្រួសារ ប្រជាពលរដ្ឋ បាននាំគ្នាតវ៉ា មិនព្រមចុះឈ្មោះនោះទេ ព្រោះថា ពួកគាត់ចង់រក្សារស់នៅដោយអាស្រ័យផល ពីព្រៃចម្ការវិលជុំជាលក្ខណៈសមូហភាព និងខ្លាចបាត់បង់ដីទំនៀមទម្លាប់និងដីព្រៃសម្រាប់កប់ខ្លោចដូន តា។
ក្រៅពីការបង្ខំឲ្យចុះឈ្មោះវាស់វែងដីព្រៃចែកគ្នានោះ ប្រជាពលរដ្ឋជនជាតិភាគតិចចារ៉ាយក៏បាននិងកំពុងរងការប៉ះពាល់ ពីការឈូសឆាយដីព្រៃ និងកាប់ឈើប្រណីតៗពីសំណាក់ក្រុមហ៊ុនពីរ ដែលបានទទួលដីសសម្បទានសេដ្ឋកិច្ច ពីរដ្ឋាភិបាលផងដែរ។
លោក ឆាយ ធី មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តរតនគិរី ដែលកំពុងចុះធ្វើការអង្កេត នៅនឹងកន្លែងកើតហេតុ ជាមួយនឹងប្រជាសហគមន៍ប្រមាណជាង១០នាក់អស់រយៈពេលពីរថ្ងៃមកហើយនោះបានឲ្យដឹងថា មានក្រុមហ៊ុនវៀតណាម ចំនួនពីរ គឺក្រុមហ៊ុន៧២ និងក្រុមហ៊ុនដាយដុងយឿង បានធ្វើសកម្មភាពឈូសឆាយដីព្រៃនិងកាប់យកឈើប្រណីតៗ។ លោកបន្តថា៖«ព្រៃសហគមន៍ ដែលមានទទឹង ១០០ ម៉ែត្រ និងបណ្តោយ ៣ ពាន់ម៉ែត្រ ត្រូវបានក្រុមហ៊ុនវៀតណាមឈូសឆាយ។ យើងឃើញមានគំនរឈើហុប ផ្ចិកនិងត្បែងជាដើម ទំហំមុខកាត់ពី០,៥ម៉ែត្រឡើងទៅ។ ឈើភាគច្រើន គេកាប់និងដឹកភ្លាមៗ ចេញទៅវៀតណាម តាមច្រកប៉ុស្តិ៍អូរថ្ម»។ លោកឆាយ ធីបានញ្ជាក់ថា ការឈូសឆាយដីព្រៃសហគមន៍នោះបានផ្អាក បន្ទាប់ពីមានការទប់ស្កាត់ពីពលរដ្ឋ។ ប៉ុន្តែវាអាចចាប់ផ្តើមធ្វើសកម្មភាពឡើងវិញនៅថ្ងៃណាមួយ។ លោកនឹងចងក្រងព័ត៌មានទាំងនេះ ដាក់ទៅខាងរដ្ឋបាលព្រៃឈើ និងស្ថាប័នដែលពាក់ព័ន្ធផ្សេងៗ ដើម្បីរកដំណោះស្រាយ ជូនពលរដ្ឋជនជាតិភាគតិចដែលកំពុងព្រួយបារម្ភពីការវិនាសបាត់បង់ដីព្រៃសហគមន៍របស់ដូនតាពួកគេ។
លោក ដក ស អភិបាលស្រុកអូរយ៉ាដាវ មានប្រសាសន៍ថា ការដែលអាជ្ញាធរឲ្យប្រជាពលរដ្ឋចុះឈ្មោះ វាស់វែងដីនោះគឺដើម្បីទប់ស្កាត់កុំឲ្យក្រុមហ៊ុនឯកជនឈូសឆាយដីរបស់ពួកគាត់។ លោកបញ្ជាក់ថា៖ «នៅពេលដែលប្រជាពលរដ្ឋមានប្លង់ដីច្បាស់លាស់អស់ហើយ នោះ ក្រុមហ៊ុនគេមិនមកឈូសឆាយដីបងប្អូនទៀតនោះទេ ព្រោះកន្លងមកពិតជាមានការឈូសឆាយប៉ះពាល់ដល់ដីព្រៃរបស់ពួកគាត់មែន»។ លោក ដក ស ក៏បានឲ្យដឹងផងដែរថា ក្រុមហ៊ុន ៧២ និងក្រុមហ៊ុនដាយដុងយឿងសុទ្ធតែបានទទួលដីសម្បទានសេដ្ឋកិច្ច ពីរដ្ឋាភិបាលយ៉ាងត្រឹមត្រូវតាមច្បាប់ទាំងអស់។ ក្រុមហ៊ុន៧២បានទទួលដីប្រមាណ៦ពាន់ហិកតា ហើយបានកំពុងដាំដំណាំកៅស៊ូបានប្រហែលជា១ ពាន់ហិកតាហើយ។ ចំណែកក្រុមហ៊ុនដាយដុងយឿង បានទទួលដីសម្បទានសេដ្ឋកិច្ចប្រមាណ៤ពាន់ហិកតានិងបានដាំកៅស៊ូ បានប្រហែលជា៧០០ហិកតាហើយផងដែរ។
លោក ប៉ែន ប៊ុណ្ណារ៍ មន្ត្រីជាន់ខ្ពស់ អង្គការការពារសិទ្ធិមនុស្សអាដហុក មានការព្រួយបារម្ភពីការបាត់បង់ដីព្រៃ និងផលប៉ះពាល់ដល់ប្រជាពលរដ្ឋ ជនជាតិភាគតិចទាំងនោះ។ លោកមានប្រសាសន៍ថា៖«វាខ្វះតម្លាភាព នៅក្នុងការអនុវត្ត។
ប្រជាពលរដ្ឋមូលដ្ឋាន មិនបានទទួលព័ត៌មានឲ្យបានគ្រប់គ្រាន់ទេ ព្រោះវាមានរឿងលាក់ការណ៍មួយចំនួន ដល់ពេលមានការឈូសឆាយ ទើបពួកគាត់ដឹង ហើយក៏ធ្វើការតវ៉ាតែម្តង»៕
No comments:
Post a Comment
yes