ក្នុងលិខិតដែលចុះហត្ថលេខារួមគ្នា របស់តំណាងរាស្រ្តគណបក្សសមរង្ស៊ី ចំនួន៩រូប នៅថ្ងៃចន្ទនេះ តាមរយៈប្រធានរដ្ឋសភា លោក ហេង សំរិន បានស្នើឲ្យក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ ក្រសួងរៀបចំដែនដី នគររូបនីយកម្មនិងសំណង់ និងអង្គភាពប្រឆាំងអំពើពុករលួយចុះស៊ើបអង្កេត ចំពោះអាជ្ញាធរខេត្តកំពត។ ក្នុងលិខិតដាច់ដោយឡែកពីគ្នានោះ សរសេរថា អាជ្ញាធរខេត្ត បានដោះដូរពហុកីឡាដ្ឋាន រោងកុន៧មករា និងព្រលានយន្តហោះខេត្តកំពត ដែលជាទ្រព្យសម្បត្តិរបស់រដ្ឋ ទៅឲ្យឈ្មួញជាអ្នកគ្រប់គ្រង ហើយថា ថវិកាដែលទទួលបានពីការដោះដូរនេះ មិនបានយកមកអនុម័ត ក្នុងកញ្ចប់ថវិកាជាតិឆ្នាំ២០១៣ទេ។
តំណាងរាស្រ្តមួយរូបដែលបានស្នើនោះ លោក ជា ប៉ូច មានប្រសាន៍ថា លោកចង់ឲ្យស្ថាប័នជាតិទាំង៤នេះ ចុះស្រាវជ្រាវអំពីញ្ហានេះ ឲ្យបានច្បាស់លាស់ និងផ្តន្ទាទោសជនប្រព្រឹត្តទៅតាមច្បាប់ ៖ "នៅខេត្តកំពត គឺអាជ្ញាធរដែនដី បានលក់សម្បត្តិរដ្ឋ ហើយបានពុះចែកដីគ្នាដើម្បីទៅជាសម្បត្តិផ្ទាល់ខ្លួន របស់មន្ត្រីជាន់ខ្ពស់នីមួយៗ ហើយការលក់ ការដោះដូរនេះ គឺនៅឆ្នាំ២០១៣នេះ គឺអត់មានឃើញនៅក្នុងថវិកាជាតិ"។
អភិបាលខេត្តកំពត លោក ខូយ ឃុនហ៊ួរ បដិសេធអធិប្បាយ ដោយលោកបង្វែសំណួរនេះទៅគណបក្សប្រឆាំងនិងរដ្ឋសភាវិញ ៖ "ហើយលោកស្រី មិនទៅសួរអ្នកនោះទៅ ហើយសួរខាងសភាចុះ គេអ្នកចោទហ្នឹងទៅសួរគេហ្នឹងទៅ"។
មិនអាចសុំការអធិប្បាយពី មន្រ្តីខុទ្ទកាល័យលោក ហេង សំរិន គឺលោក គាំ កុសល្យ បានទេ ដោយទូរស័ព្ទមិនមានអ្នកទទួល។ តែលោក ជា ប៉ូច អះអាងថា រដ្ឋសភាបានទទួលលិខិតរបស់តំណាងរាស្ត្រគណបក្សសមរង្ស៊ី រួចហើយ៕
No comments:
Post a Comment
yes