លោកស្រី កែ សុវណ្ណរតន៏ សមាជិកព្រឹទ្ធសភាដឹកនាំក្រុមការងារចលនាប្រជាធិ បតេយ្យសង្គ្រោះជាតិខេត្តសៀមរាបចុះជួបសំណេះសំណាល ជាមួយប្រជាពលរដ្ឋចំនួន៣ឃុំក្នុងស្រុងជីក្រែង

លោកស្រី កែ សុវណ្ណរតន៏ ក្នុងពិធីលើស្លាកគណបក្ស សង្គ្រោះជាតិ 

កាលពីពេលកន្លងទៅថ្មីៗនេះ

ចលនាប្រជាធិបតេយ្យសង្គ្រោះជាតិដែលដឹកនាំដោយលោកប្រធាន សម រង្ស៊ី ជាប្រធាន និង លោកប្រធាន កឹម សុខា ជាអនុប្រធាន បាននិងកំពុងតែទទួលការគាំទ្រពីសំណាក់ប្រជាពល​រដ្ឋយ៉ាងច្រើន ដែលមិនធ្លាប់មានទេតាំងពីមុនមក ។

ជាមួយគ្នានោះ ក្រុមការងារចលនាប្រជាធិបតេយ្យសង្គ្រោះជាតិ នៅគ្រប់បណ្តាខេត្ត​ក្រុងទូ​ទាំង​ប្រទេស ក៏បាននិងកំពុងតែចុះធ្វើសកម្មភាពរបស់ខ្លួនយ៉ាងផុសផុលផងដែរ ដើម្បីជួប​ជា​មួយប្រជាពលរដ្ឋ ធ្វើការផ្សព្វផ្សាយពីគោលនយោបាយរបស់គណបក្ស​សង្គ្រោះជាតិ ព្រមទាំង​ជំរាបជូនដល់ពលរដ្ឋឲ្យពួកគាត់បានជ្រាបពីសារសំខាន់នៃការចូលរួមការបោះឆ្នោត ។

ព្រមជាមួយគ្នានោះផងដែរ កាលពីថ្ងៃទី២៧ ខែមករា ឆ្នាំ២០១៣ លោកស្រី កែ សុវណ្ណរតន៏ សមាជិកព្រឹទ្ធសភា ក៏បានដឹកនាំក្រុមការងារចលនាប្រជាធិបតេយ្យ​សង្គ្រោះជាតិខេត្ត​សៀម​រាប ចុះ​ជួបជាមួយប្រជាពលរដ្ឋពេលព្រឹកនៅឃុំគោកធ្លកក្រោម ស្រុកជីក្រែង និងនៅ​ពេល​រសៀល​នៅឃុំគោកធ្លកលើ ព្រមទាំងឃុំល្វែងឬស្សី ស្ថិតនៅក្នុងស្រុកជីក្រែងផងដែរ ។

សូមជំរាបថា នៅក្នុងពីធីចុះជួបសំណេះសំណាលជាមួយប្រជាពលរដ្ឋនៅឃុំទាំងបីនៃស្រុក ជីក្រែងលោកស្រី កែ សុវណ្ណរតន៏ បានលើកឡើងពីសារនយោបាយរបស់គណបក្ស សង្គ្រោះ​ជាតិ ជំរាបជូនទៅដល់ប្រជាពលរដ្ឋឲ្យពួកគាត់បានដឹងដែលមានជាច្រើនចំណុច ដោយ​ក្នុង​នោះសំខាន់ជាងគេលោកស្រី កែ សុវណ្ណរតន៏ បានលើកឡើងពីគោលនយោបាយចំនួន​៥ចំ​ណុច​របស់គណបក្សដែលជាអទិភាព ដែលនិងត្រូវដោះស្រាយភ្លាមៗនៅពេល ដែលគ​ណ​បក្ស សង្គ្រោះជាតិ ឈ្នះលើការបោះឆ្នោតសម្រាប់អាណត្តិទី៥នេះ ។

គោលនយោបាយ៥ចំណុចរបស់គណបក្ស សង្គ្រោះជាតិ សំខាន់ៗនោះរួមមាន ការ​ផ្តល់​ប្រាក់​ឧបត្ថមដល់ចាស់ៗចាប់ពីអាយុ៦៥ឆ្នាំឡើងទៅក្នុងម្នាក់ទទួលបានចំនួន៤ម៉ឺនរៀលជារៀង​រាល់​ខែ តំឡើងប្រាក់ខែដល់មន្រ្តីរាជការឲ្យបានយ៉ាងតិចចំនួន១លានរៀល តំឡើង​ប្រាក់ខែ​ដល់​កម្មករ-កម្មការីនី ឲ្យបានយ៉ាងតិចចំនួន៦០ម៉ឺនរៀលក្នុងមួយខែ ព្យាលបាលជំងឺជូន​ប្រជា​ពល​រដ្ឋដោយមិនយកប្រាក់នៅគ្រប់មន្ទីរពេទ្យរដ្ឋ និងការលប់បំបាត់អំពើពុករលួយ លើស្ទួយ​ពង្រឹង​វិស័យអប់រំ និងរកការងារឲ្យប្រជាពលរដ្ឋបានធ្វើគ្រប់ៗគ្នា ជាពិសេសគឺយុវជន ។

ជាមួយគ្នានោះលោកស្រី កែ សុវណ្ណរតន៏ ក៏បានលើកឡើងជំរាបជូនដល់ប្រជាពលរដ្ឋនូវ​គោល​ជំហ៊ររបស់គណបក្ស សង្គ្រោះជាតិផងដែរថា​ អ្វីដែលជាគោលនយោបាយរបស់គណ​បក្ស សង្គ្រោះជាតិបានដាក់ចេញ នៅពេលគណបក្ស សង្គ្រោះជាតិ ឈ្នះឆ្នោតហើយធ្វើមិន​បាន​ ថ្នាក់ដឹកនាំគណបក្ស សង្គ្រោះជាតិ និងចុះចេញពីតំណែងភ្លាម ដោយមិនចាំបាច់​ឲ្យ​ប្រ​ជា​ពលរដ្ឋធ្វើបាតុកម្មបណ្តេញចេញឡើយ ដែលនេះជាទំនួលខុសត្រូវមួយ​ខ្ពស់បំផុត​របស់​គណ​បក្ស សង្គ្រោះជាតិ មិនដូចជាអ្នកដឹកនាំសព្វថ្ងៃ ខ្លួនធ្វើមិនកើតហើយ នៅតែប្រឹងត្រដរ ក្លាញ់​និងអំណាចទៀត ដែលធ្វើឲ្យមានការរិះគន់ពីគ្រប់មជ្ឈដ្ឋាន ៕