ក្រុមអ្នកភូមិបឹងកក់ កាន់បដាតវ៉ានៅមុខសាលារាជធានីភ្នំពេញ
កាលពីព្រឹកថ្ងៃទី២១ មករា ឆ្នាំ២០១៣
សហគមន៍ចំនួន ៤ នៅរាជធានីភ្នំពេញ ដែលមានបញ្ហារឿងទំនាស់ដីធ្លី តវ៉ាជាថ្មីម្ដងទៀតនៅថ្ងៃទី២១ ខែមករា ដោយមានខ្លះដាក់លិខិតស្នើសុំទៅក្រសួងមហាផ្ទៃ ស្ថាប័នព្រឹទ្ធសភា និងទីស្នាក់ការគណបក្សប្រជាជនកម្ពុជា ដើម្បីឲ្យស្ថាប័នទាំងនោះជួយអន្តរាគមន៍រឿងទំនាស់ដីរបស់ពួកគេ។
ពលរដ្ឋសហគមន៍ដែលមានទំនាស់ដីធ្លី នៅតែមិនទាន់បានទទួលការឆ្លើយតបណាមួយចំពោះសំណើសុំរបស់ពួកគាត់ក្នុងការទាមទារឲ្យអាជ្ញាធរ និងស្ថាប័នពាក់ព័ន្ធ អន្តរាគមន៍ជួយដោះស្រាយរឿងទំនាស់ដីធ្លីជាមួយក្រុមហ៊ុនឯកជន និងបញ្ឈប់ការបណ្ដេញចេញដោយបង្ខំ។
សហគមន៍បុរីកីឡា និងសហគមន៍ផ្លូវលេខ ៣៤៧ ក្នុងសង្កាត់បឹងកក់ទី១ ខណ្ឌទួលគោក ប្រមាណ ៥០នាក់ បានឈរលើកបដាទាមទារនៅខាងមុខក្រសួងមហាផ្ទៃ ព្រឹទ្ធសភា និងមុខទីស្នាក់ការគណបក្សប្រជាជនកម្ពុជា នៅថ្ងៃទី២១ ខែមករា។ គោលបំណងដែលសហគមន៍តវ៉ានោះ គឺដើម្បីដាក់លិខិតស្នើសុំឲ្យថ្នាក់ដឹកនាំស្ថាប័នទាំងនោះ រួមមានលោក ស ខេង រដ្ឋមន្ត្រីក្រសួងមហាផ្ទៃ លោក ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភា ជំរុញឲ្យក្រុមហ៊ុនផានអ៊ីម៉ិច គោរពនូវកិច្ចសន្យាសាងសង់ឲ្យគ្រប់ចំនួន ១០អាគារ ដល់សហគមន៍បុរីកីឡា និងស្នើសុំឲ្យអាជ្ញាធរមូលដ្ឋានជំរុញឲ្យមានការដោះស្រាយដ៏ឆាប់រហ័ស ដើម្បីឲ្យសហគមន៍ផ្លូវ ៣៤៧ ទទួលបានប័ណ្ណកម្មសិទ្ធិដីធ្លីស្របច្បាប់។
តំណាងសហគមន៍បុរីកីឡា អ្នកស្រី ឆាយ គឹមហ៊ន ឲ្យដឹងថា តំណាងសហគមន៍ ៤នាក់ ត្រូវបានអនុញ្ញាតឲ្យចូលដាក់លិខិតទៅដល់ស្ថាប័នទាំងនោះ ប៉ុន្តែមិនទាន់បានទទួលចម្លើយនៅឡើយទេ៖ «ជាជម្រើសចុងក្រោយរបស់ពួកខ្ញុំ ព្រោះអ្វីដែលពួកខ្ញុំដាក់ពីឆ្នាំមុនមក គឺអត់មានដំណោះស្រាយរបស់សហគមន៍ទេ។ អ៊ីចឹងអ្វីដែលខ្ញុំដាក់នេះ គឺចង់ឲ្យជួយជំរុញឲ្យបានឆាប់បំផុតពីរដ្ឋាភិបាល ពីក្រុមហ៊ុន ឲ្យដោះស្រាយពីបញ្ហាបុរីកីឡា និងក្រុមហ៊ុនផានអ៊ីម៉ិច ឲ្យគោរពសន្យាសាងសង់ ១០អាគារ ឲ្យខាងពួកខ្ញុំ»។
ប្រធាននាយកដ្ឋានកិច្ចការរដ្ឋបាលនៃក្រសួងមហាផ្ទៃ លោក ប៊ុន រិទ្ធ ដែលទទួលលិខិតស្នើសុំពីសហគមន៍បុរីកីឡា និងសហគមន៍ផ្លូវលេខ ៣៤៧ ឲ្យដឹងថា លោកនឹងរៀបចំឯកសារតាមបែបបទរដ្ឋបាលដាក់ទៅឲ្យរដ្ឋមន្ត្រីជាអ្នកសម្រេច ប៉ុន្តែការឆ្លើយតបយ៉ាងណានោះ មិនទាន់អាចដឹងបាននៅឡើយទេ៖ «ខាងខ្ញុំវាអត់មានសិទ្ធិអីសម្រេច គ្រាន់តែថា រៀបចំការងាររដ្ឋបាលតាមឋានានុក្រម សុំទៅថ្នាក់ដឹកនាំក្រសួង ដើម្បីឲ្យគាត់ពិនិត្យសម្រេចពាក់ព័ន្ធនឹងការស្នើសុំហ្នឹង»។
រីឯអ្នកបឹងកក់ និងអ្នកសហគមន៍ព្រលានយន្តហោះពោធិចិនតុង ប្រមាណ ៧០នាក់ ក៏បានឈរបាតុកម្មតវ៉ាព្រមគ្នាទាមទារនៅមុខសាលារាជធានីភ្នំពេញ ដោយព្យាយាមសុំជួបលោក កែប ជុតិមា អភិបាលរាជធានីភ្នំពេញ ដើម្បីបង្ហាញនូវលិខិតស្នាមឯកសារ បញ្ជាក់ថា ពួកគាត់រស់នៅស្របច្បាប់ មានការទទួលស្គាល់ពីអាជ្ញាធរត្រឹមត្រូវ។ តំណាង ៧រូបមកពីសហគមន៍ទាំងពីរ ត្រូវបានអនុញ្ញាតទៅឲ្យជួបមន្ត្រីរដ្ឋបាលសាលារាជធានីភ្នំពេញ។
តំណាងអ្នកបឹងកក់ អ្នកស្រី ហេង មុំ ដែលបានចូលជួបមន្ត្រីសាលាក្រុង ឲ្យដឹងថា ការធ្វើកូដកម្មម្ដងនេះ អ្នកបឹងកក់ និងសហគមន៍ព្រលានយន្តហោះពោធិចិនតុង មិនបានដាក់លិខិតស្នើសុំទៅសាលាក្រុងដូចសព្វមួយដងទេ។ ប៉ុន្តែជាការស្នើសុំជួបដើម្បីបង្ហាញពីឯកសារភស្តុតាងបញ្ជាក់ពីការស្នាក់នៅស្របច្បាប់របស់សហគមន៍ ជាការឆ្លើយតបចំពោះប្រសាសន៍លោក កែប ជុតិមា ដែលបានផ្ដល់បទសម្ភាសន៍ដល់ទូរទស្សន៍បាយ័ន ចោទថា អ្នកភូមិរស់នៅមិនស្របច្បាប់ ហើយការទាមទារនោះពាក់ព័ន្ធនឹងរឿងនយោបាយ។
អ្នកស្រី ហេង មុំ៖ «សូមបញ្ជាក់ប្រាប់គាត់ឲ្យបានច្បាស់ថា ពួកខ្ញុំពិតជាប្រជាពលរដ្ឋក្នុងចំណោម ៧៩៤គ្រួសារ ដែលសាលារាជធានីបានប្រកាសពីឆ្នាំមុន។ ពួកខ្ញុំមានឯកសារច្បាស់លាស់ត្រឹមត្រូវ ដូចដែលប្រជាពលរដ្ឋបានទទួលប្លង់មានប័ណ្ណគ្រួសារ មានអត្តសញ្ញាណប័ណ្ណ មានប័ណ្ណបោះឆ្នោត និងមានកាតគណបក្សប្រជាជនកម្ពុជាតែម្ដង»។
ទោះជាយ៉ាងណា បំណងដែលអ្នកបឹងកក់ និងសហគមន៍ព្រលានយន្តហោះពោធិចិនតុង ចង់ជួបលោក កែប ជុតិមា នោះ មិនបានសម្រេចទេ ដោយឲ្យមន្ត្រីក្រោមឱវាទមកជួប និងសន្យាថា ពាំនាំយកមតិរបស់សហគមន៍ទៅប្រាប់អភិបាលរាជធានី៕
No comments:
Post a Comment
yes