រោងស្នាក់នៅ របស់កម្មករ សំណង់ ក្រុមហ៊ុន បាលី រីសត ជិត១០០បន្ទប់ ត្រូវព្រះអគ្គី លេបត្របាក់ ទាំងស្រុង

ភ្នំពេញ៖ រោងកម្មករសំណង់ ស្នាក់នៅ របស់ក្រុមហ៊ុន បាលីរីសត សម្រាប់ធ្វើការ ដែលថៅកែ ធ្វើឲ្យនោះ ត្រូវបានអគ្គិភ័យឆេះ បំផ្លាញអស់ ជិត១០០បន្ទប់ កាលពីវេលាម៉ោង ៤ទាបភ្លឺ ថ្ងៃទី៣ ខែមីនា ឆ្នាំ២០១៣ នេះ ស្ថិតនៅ ភូមិចំបក់ សង្កាត់កកាប ខណ្ឌពោធិ៍សែនជ័យ ។

សេចក្តីរាយការណ៍ ពីកន្លែងកើតហេតុ បានឲ្យដឹងថា ក្រោយមាន អគ្គិភ័យឆាបឆេះ រោងកម្មករ សំណង់ខាងលើនេះ កម្លាំងពន្លត់អគ្គិភ័យ រាជធានីភ្នំពេញ បានបញ្ជូនរថយន្តពន្លត់អគ្គិភ័យ ជាច្រើនគ្រឿង ទៅជួយអន្តរាគមន៍ បាញ់ពន្លត់ រហូតធ្វើឲ្យ ភ្លើងដែល កំពុងឆេះ បានរលត់ទៅវិញ ប៉ុន្តែបានបំផ្លាញ រោងស្នាក់នៅជិត១០០បន្ទប់។

យ៉ាងណាក៏ដោយ មិនទាន់ដឹង ពីមូលហេតុ ដែលនាំឲ្យមានអគ្គិភ័យនេះ នៅឡើយទេ ខណៈសមត្ថកិច្ច និងអាជ្ញាធរ មូលដ្ឋាន បាននិងកំពុងបាញ់ពន្លត់ ។

ក្នុងករណីនេះ មិនបានបណ្តាលឲ្យ នរណាម្នាក់ រងរបួសឡើយ ។

បើតាមសមត្ថកិច្ច ពន្លត់អគ្គិភ័យ បានឲ្យដឹងថា នេះជាគ្រោះអគ្គិភ័យ លើកទី២ហើយ សម្រាប់ខែមីនា ឆ្នាំ២០១៣នេះ ដែលករណីទីមួយ បានកើតឡើង កាលពីព្រឹកថ្ងៃទី១ ខែមីនា ឆ្នាំ២០១៣ ស្ថិតនៅភូមិដើមគរ សង្កាត់ជ្រោយចង្វារ ខណ្ឌឫស្សីកែវ ខាងជើង ស្ពានជ្រោយចង្វារ ដោយបំផ្លាញ ផ្ទះជនជាតិវៀតណាម បើកហាងលក់កាហ្វេ ចំនួន៤ខ្នង និងរបួសមនុស្ស ចំនួន៤នាក់៕