២០-មីនា-២០១៣៖ ខ្ទមរបស់ពលរដ្ឋសង់លើអតីតដីភូមិរបស់ខ្លួន ដែលបច្ចុប្បន្នដីនោះក្រុមហ៊ុនឈូសឆាយដាំកៅស៊ូ នៅ ភូមិអូរតាម៉េង នៃឃុំអន្លង់វែង ស្រុកអន្លង់វែង ខេត្តឧត្ដរមានជ័យ
ក្រុមហ៊ុនទុមរីង រ៉ាប់ប៊ឺ (Tum Ring Rubber) និងដាតា រ៉ាប់ប៊ឺ (Data Rubber) ដែលទទួលបានដីសម្បទានសេដ្ឋកិច្ចជាង ១ម៉ឺន ៥ពាន់ហិកតារ ដាំកៅស៊ូនៅតំបន់ភូមិអូរតាម៉េង នៃស្រុកអន្លង់វែង ខេត្តឧត្តរមានជ័យ បានចោទប្រកាន់ថា មានមេខ្យល់ខ្លះបានញុះញង់ឱ្យប្រជាពលរដ្ឋចូលទៅសង់ខ្ទមរស់នៅក្នុងដីចម្ការ ធ្វើឱ្យប៉ះពាល់ដំណាំកៅស៊ូរបស់គេផងដែរ។
ក្រុមហ៊ុនកំពុងប្ដឹងបញ្ហានេះទៅអាជ្ញាធរថ្នាក់ស្រុក ខេត្ត ដើម្បីឱ្យជួយដោះស្រាយ។ បញ្ហានេះដែរ អ្នកភូមិបានអះអាងថា កម្លាំងកងរាជអាវុធហត្ថមួយចំនួន បានព្យាយាមនាំពួកគេទៅសាកសួរពាក់ព័ន្ធនឹងរឿងទំនាស់ដីធ្លីជាមួយក្រុមហ៊ុននោះ។
ប្រភពពីអ្នកភូមិអូរតាម៉េង ឃុំអន្លង់វែង បានឱ្យដឹងថា យ៉ាងហោចណាស់អ្នកភូមិចំនួន ៤នាក់ ដែលជាសកម្មជនក្នុងរឿងទាមទារដីធ្លីពីក្រុមហ៊ុន បានរត់គេចចេញពីលំនៅឋាន ដោយសារតែភ័យខ្លាច បន្ទាប់ពីកម្លាំងកងរាជអាវុធហត្ថព្យាយាមហៅពួកគេទៅសាកសួរពីរថ្ងៃជាប់ៗគ្នាមកនេះ។
តំណាងអ្នកភូមិដែលរត់គេចខ្លួននោះ គឺឈ្មោះ សោម សុផាត ហៅ យ៉ាន់ សុផាត ឈ្មោះ ឌី សីម៉ា ឈ្មោះ អ៊ុក គឹមសឿន និងឈ្មោះ វ៉ាន់។
លោក ឌី សីម៉ា គឺជាតំណាងអ្នកភូមិអូរតាម៉េង ម្នាក់ ដែលមានឈ្មោះនៅក្នុងបញ្ជីសមត្ថកិច្ចកោះហៅនោះ លោកបានមានប្រសាសន៍កាលពីរសៀលថ្ងៃសៅរ៍ ទី៣០ ខែមីនា ថា លោក និងអ្នកភូមិមួយចំនួនទៀត ធ្លាប់តវ៉ាពីរឿងដីធ្លីជាមួយក្រុមហ៊ុនទុមរីង រ៉ាប់ប៊ឺ ដែលយកដីពួកគាត់ជាច្រើនហិកតារ ក៏ប៉ុន្តែក្រុមហ៊ុនបានដូរដីថ្មីមកឱ្យវិញទំហំតែកន្លះហិកតារប៉ុណ្ណោះក្នុង១គ្រួសារ។ កាលពីពេលថ្មីៗ ក្រុមអ្នកភូមិប្រមាណជិត ៣០គ្រួសារ បាននាំគ្នាវិលត្រឡប់ទៅសង់ខ្ទមរស់នៅលើដីចាស់របស់គេវិញ ដែលជាចម្ការកៅស៊ូទៅហើយ ដោយសារតែពួកគេមិនមានដីគ្រប់គ្រាន់ធ្វើកសិកម្ម។
លោក ឌី សីម៉ា បានបញ្ជាក់ថា ដោយសារបញ្ហានេះលោកមានឈ្មោះនៅក្នុងបញ្ជីកោះហៅរបស់សមត្ថកិច្ច ហើយលោកកំពុងគេចចេញពីផ្ទះ ដោយសារតែភ័យខ្លាចសមត្ថកិច្ចចាប់ខ្លួន៖ «គេយកកម្លាំងប៉េអិមមកពីម្សិលមិញមួយសារហើយ។ គេចង់កោះហៅឱ្យយើងហ្នឹងផ្ដិតមេដៃ ផ្ដិតអីយ៉ាងម៉េចទេ។ បងប្អូនយើងហ្នឹង អត់ព្រមផ្ដិតមេដៃ ដល់ពេលថ្ងៃនេះ កម្លាំងគេមករឹតតែច្រើនទៀត មកទាំងបង ៩៨ ជុំគ្នាទាំងអស់។ ដល់បងប្អូនឃើញកម្លាំងប៉េអិមមកច្រើនពេក គឺអ្នកដែលមានឈ្មោះ គឺគេចខ្លួនទៅ»។
ចំណែកលោក យ៉ាន់ សុផាត ដែលជាអ្នកមានឈ្មោះក្នុងបញ្ជីកោះហៅរបស់សមត្ថកិច្ចដែរ បានបញ្ជាក់ថា កងរាជអាវុធហត្ថស្រុកអន្លង់វែង បានកោះហៅរូបលោក និងអ្នកភូមិ ៣នាក់ទៀត ឱ្យចូលខ្លួនទៅបំភ្លឺនៅទីបញ្ជាការ ជុំវិញរឿងទំនាស់ដីធ្លីជាមួយក្រុមហ៊ុនទុមរីង រ៉ាប់ប៊ឺ នោះ ក៏ប៉ុន្តែលោកមិនចូលខ្លួនទៅទេ ហើយក៏មិនផ្ដិតមេដៃទទួលដីកានោះដែរ។
ទោះយ៉ាងណា វិទ្យុអាស៊ីសេរី មិនអាចទាក់ទងលោក ងួន ធីឬទ្ធិ ដែលជាមេបញ្ជាការកងរាជអាវុធហត្ថស្រុកអន្លង់វែង ដើម្បីសុំការពន្យល់ជុំវិញរឿងនោះបានទេ។
ចំណែកលោក ទីង វណ្ណៈ ជាតំណាងក្រុមហ៊ុនទុមរីង រ៉ាប់ប៊ឺ និងដាតា រ៉ាប់ប៊ឺ បានមានប្រសាសន៍ថា ក្រុមអ្នកភូមិអូរតាម៉េង ប្រមាណ ៣០គ្រួសារ បានចូលទៅសង់ខ្ទមរស់នៅក្នុងដីក្រុមហ៊ុនចម្ការកៅស៊ូរបស់លោក តាំងតែពីដើមខែមីនា រហូតមកដល់ពេលនេះរយៈពេល ២៦ថ្ងៃហើយ។ ការចូលទៅសង់ខ្ទមនោះ ធ្វើឱ្យខូចខាតដល់កូនកៅស៊ូ ដូចជាកន្លែងខ្លះងាប់ កន្លែងខ្លះទៀតឆេះជាដើម។
តំណាងក្រុមហ៊ុនដដែលបានបញ្ជាក់ថា លោកមិនអាចអត់ទ្រាំនឹងសកម្មភាពរបស់អ្នកភូមិបានតទៅទៀតទេ ទើបប្ដឹងទៅអាជ្ញាធរមួយចំនួននៅថ្នាក់ខេត្ត និងស្រុក ឱ្យជួយដោះស្រាយ៖ «ពីដំបូង យកមនោសញ្ចេតនាទៅនិយាយនឹងពួកគាត់ទេតើ ហើយអ្វីដែលដោះបាននោះ ក៏អាចដោះដែរ។ ដែលគាត់ក្រីក្រពិតប្រាកដនោះ ខាងខ្ញុំជួយរកដីទិញដីឱ្យពួកគាត់ ប៉ុន្តែក្នុងនោះយើងស្រាវជ្រាវទៅវាមានមេខ្យល់ប៉ុន្មាននាក់ ហើយមើលទៅវាដូចជាអនាធិបតេយ្យពេកនៅលើដីចម្ការកៅស៊ូដែលដាំហើយនោះ។ ប៉ុន្តែខ្ញុំចង់យកច្បាប់មកនិយាយ តើគាត់ធ្វើអីចឹងត្រូវឬអត់?»។
លោក យឹម ផាន់ណា ជាអភិបាលស្រុកអន្លង់វែង បានបញ្ជាក់ថា វត្តមានកងរាជអាវុធហត្ថដែលទៅហៅតំណាងអ្នកភូមិខ្លះសាកសួរនោះ មិនបានជូនដំណឹងប្រាប់លោកទេ ហើយប្រជាពលរដ្ឋមួយចំនួននៅភូមិអូរតាម៉េង នោះ ក៏បានជួបជាមួយលោកជុំវិញបញ្ហានោះ។
កាលពីជាង ១សប្ដាហ៍មុន ក្រុមអ្នកភូមិអូរតាម៉េង ដែលចូលទៅសង់ខ្ទមនៅលើដីចាស់របស់ពួកគេវិញ ដោយបច្ចុប្បន្នក្លាយជាចម្ការកៅស៊ូទៅហើយនោះ បានឱ្យដឹងថា ពួកគេកំពុងរស់នៅក្នុងជីវភាពខ្វះស្បៀងអាហារប្រចាំថ្ងៃ ដោយសារតែគ្មានដីធ្វើកសិកម្មជិត ២ឆ្នាំមកនេះ ចាប់តាំងពីក្រុមហ៊ុនយកដីពួកគេធ្វើជាដីសម្បទានសេដ្ឋកិច្ចមក៕
No comments:
Post a Comment
yes