នៅក្នុងសន្និសីទសារព័ត៌មាន កាលពីម្សិលមិញ ដោយវិទ្យាស្ថានជាតិប្រជាធិបតេយ្យ គណៈកម្មាធិការមិនលម្អៀង និងអព្យាក្រឹត ដើម្បីការបោះឆ្នោតដោយសេរី និងយុតិ្តធម៌នៅកម្ពុជា (NICFEC) និងមជ្ឈមណ្ឌលសម្រាប់ការសិក្សាស្រាវជ្រាវជាន់ខ្ពស់ បានពិនិត្យបញ្ជីបោះឆ្នោតឆ្នាំ ២០១២ ហើយបានរកឃើញ ពីចំនួនធ្លាក់ចុះ ក្នុងអត្រាចុះបញ្ជីបោះឆ្នោត តាំងពីឆ្នាំ២០០៨មក។ ផ្អែកលើសវនកម្មបញ្ជីបោះឆ្នោត បានរកឃើញថា ពលរដ្ឋមានសិទិ្ធបោះឆ្នោត៨២,៩ ភាគរយ នៅលើបញ្ជីអ្នកបោះឆ្នោត បានថយចុះ បើធៀបនឹងចំនួន៨៧,៩ភាគរយ មុនការបោះឆ្នោតទូទៅឆ្នាំ២០០៨ និងថា ការរកឃើញនេះ គឺខុសពីស្ថិតិរបស់គណៈកម្មាធិការជាតិរៀបចំការបោះឆ្នោត (គ.ជ.ប)ដែលចំនួនអ្នកចុះឈ្មោះបោះឆ្នោតស្មើនឹង១០១,៧ ភាគរយនៃប្រជាពលរដ្ឋ ដែលមានសិទិ្ធបោះឆ្នោត។
ម្យ៉ាងទៀត របាយការណ៍សវនកម្ម បញ្ជីអ្នកបោះឆ្នោត ក៏បានបង្ហាញផងដែរថា ពលរដ្ឋចំនួន១០,៨ភាគរយ ដែលជឿជាក់ថា ពួកគេបានចុះឈ្មោះបោះឆ្នោតរួចហើយនោះ មិនអាចរកឃើញឈ្មោះលើបញ្ជីឡើយ ហើយនឹងមិនអាចបោះឆ្នោតនៅថ្ងៃបោះឆ្នោតបានទេ។
របាយការណ៍ ក៏បានបង្ហាញផងដែរថា សវនកម្មបញ្ជីអ្នកបោះឆ្នោត បានរកឃើញថា ឈ្មោះក្នុងបញ្ជីអ្នកបោះឆ្នោតតែ៦៣,៦ ភាគរយ អាចផ្ទៀងផ្ទាត់បានដោយផ្ទាល់ នៅកន្លែងរស់នៅបច្ចុប្បន្ន ចំណែកឯ១៧,៩ ភាគរយនៃអ្នកឆ្លើយតបមានឈ្មោះ តែរស់នៅភាគច្រើន នៅទីតាំងផ្សេងទៀត ហើយ១០,៤ ភាគរយពុំមានមនុស្សទេ។
លោកស្រី Laura Thornton នាយកជាន់ខ្ពស់នៃវិទ្យាស្ថានជាតិប្រជាធិបតេយ្យប្រចាំកម្ពុជា បានថ្លែងថា ការរកឃើញទាំងនេះ បង្ហាញពីការខ្វះចន្លោះ ដែលអាចប៉ះពាល់ដល់គុណភាព និងភាពស្របច្បាប់នៃការបោះឆ្នោតនៅកម្ពុជា។
លោកស្រីThornton បានបន្ថែមថា៖«ខ្ញុំព្រួយបារម្ភ ដោយសារពលរដ្ឋមានសិទិ្ធបោះឆ្នោតច្រើននាក់ ដែលនឹងបង្ហាញខ្លួននៅថ្ងៃបោះឆ្នោត ហើយរកឃើញថា ឈ្មោះរបស់ពួកគេពុំមាននៅលើបញ្ជីបោះឆ្នោត ហើយមិនបានបោះឆ្នោត ដោយសារឈ្មោះទាំងនោះត្រូវបានលុបដោយខុសឆ្គង។ ខ្ញុំព្រួយបារម្ភដូចគ្នាផងដែរថា មានឈ្មោះជាច្រើនលើបញ្ជីអ្នកបោះឆ្នោត តែពុំមានមនុស្សពិតប្រាកដទេ»។
លោកស្រី បន្ថែមថា៖ «ខ្ញុំខកចិត្តដែលបញ្ជីនេះ មិនសូវត្រឹមត្រូវជាង៥ ឆ្នាំមុនឡើយ»។
លោក ហង្ស ពុទ្ធា នាយក NICFEC ក៏បានសម្តែងក្តីបារម្ភផងដែរថា៖ «មានអត្រាចុះឈ្មោះបោះឆ្នោត៨២,៩ ភាគរយ ដែលជាការធ្លាក់ចុះតាំងពីឆ្នាំ២០០៨ ប៉ុន្តែចំនួនឈ្មោះលើបញ្ជីអ្នកបោះឆ្នោតបន្តកើនឡើង ដែល គ.ជ.ប បានគណនាមានអត្រា ១០១,៧ ភាគរយនៃចំនួនប្រជាជនមានសិទិ្ធបោះឆ្នោត ដូច្នេះ អាចមានឈ្មោះ តែគ្មានអ្នកបោះឆ្នោត»។
ប៉ុន្តែ លោក ទេព នីថា អគ្គលេខាធិការ គ.ជ.ប បានថ្លែងថា ការធ្វើសវនកម្ម លើការចុះឈ្មោះបោះឆ្នោត របស់អង្គការខាងលើ គឺជាការសង្ស័យ។ អង្គការទាំងនោះ ត្រូវផ្តល់ឈ្មោះអ្នកចុះឈ្មោះបោះឆ្នោតដែលរកឃើញថា ពួក គេមិនបានបោះឆ្នោត ហើយឈ្មោះរបស់ពួកគេ ត្រូវបានលុបចេញពីបញ្ជី។
លោក ទេព នីថា បានបញ្ជាក់ថា៖ «គ.ជ.ប បានស្នើវិទ្យាស្ថានជាតិប្រជាធិបតេយ្យឲ្យផ្តល់ឈ្មោះសម្រាប់ករណី ៣ ទី ១ អ្នកមានសិទិ្ធបោះឆ្នោត តែឈ្មោះបានលុបចេញពីបញ្ជីអ្នកបោះឆ្នោត ទី ២ អ្នកដែលបានចុះឈ្មោះហើយ តែមិនមានឈ្មោះក្នុងបញ្ជី និងទី ៣ អ្នកដែលធ្លាប់បានបោះឆ្នោតក្នុងឆ្នាំ២០០៨- ២០១២ ហើយឥឡូវ បាត់ឈ្មោះពីបញ្ជីអ្នកបោះឆ្នោត»។
លោក កុយ ប៊ុនរឿន តំណាងរាស្រ្តគណបក្ស សម រង្ស៊ី ដែលបានចូលរួមក្នុងសន្និសីទកាលពីម្សិលមិញ បានយល់ស្របនឹងសវនកម្មរបស់អង្គការសង្គមស៊ីវិល ដោយលោកថ្លែងថា គ.ជ.ប បានរៀបចំបញ្ជីឈ្មោះអ្នកបោះឆ្នោត ពុំមានគុណភាពធ្វើឲ្យប្រជាពលរដ្ឋជាច្រើនបាត់ឈ្មោះពីបញ្ជីអ្នក បោះឆ្នោត។ លោកបានបញ្ជាក់ថា៖ «ក្នុងការបោះឆ្នោតនាពេលខាងមុខ នឹងគ្មានយុត្តិធម៌ទេ ព្រោះ គ.ជ.ប ពុំមានតម្លាភាព ក្នុងការចុះបញ្ជីឈ្មោះអ្នកបោះឆ្នោតឡើយ»៕
No comments:
Post a Comment
yes