លោក ម៉ម សូណង់ដូ និងប្រពន្ធរបស់លោក មានទឹកមុខស្រស់ស្រាយពេលដើរចូល
ទៅក្នុងបន្ទប់សវនាការនៅសាលាឧទ្ធរណ៍កាលពីថ្ងៃម្សិលមិញ
ភ្នំពេញៈ ក្រោយពីសាលាឧទ្ធរណ៍ បានបើកសវនាការ រយៈពេល ២ ថ្ងៃ ធ្វើការជំនុំជម្រះ ទៅលើបទចោទដ៏ចម្រូងចម្រាសពីការបង្កើតតំបន់អបគមន៍ ពាក់ព័ន្ធទៅនឹងជម្លោះដីធ្លី នៅក្នុងឃុំកំពង់ដំរី ស្រុកឆ្លូង ខេត្តក្រចេះ ទៅលើប្រធានវិទ្យុសំបុកឃ្មុំដ៏ល្បីល្បាញ នៅទីបំផុត ព្រះរាជអាជ្ញាកាលពីម្សិលមិញ បានស្នើឲ្យតុលាការ ធ្វើការពិចារណា ទម្លាក់ចោលបទចោទនេះ តែប្តូរទៅបទល្មើសព្រៃឈើវិញ។
លោក ហ៊ាន រិទ្ធ ព្រះរាជអាជ្ញា សាលាឧទ្ធរណ៍បានថ្លែងក្នុងសេចក្តីសន្និដ្ឋាន កាល ពីរសៀលម្សិលមិញថា បើតាមការពិនិត្យអង្គហេតុ លោក ម៉ម សូណង់ដូ មិនមានជាប់ពាក់ព័ន្ធ នឹងការផ្តើមគំនិតអ្វី ឲ្យធ្វើកុបកម្ម ប្រឆាំងរដ្ឋាភិបាល ឬឲ្យប្រើអាវុធខុសច្បាប់នោះទេ ហើយការចោទប្រកាន់ របស់សាលាដំបូងរាជធានីភ្នំពេញ មិនសមស្របឡើយ។
លោក ហ៊ាន រិទ្ធ បានថ្លែងថា ៖ «អត់មានអង្គហេតុណាថា លោក ម៉ម សូណង់ដូ ផ្តើមគំនិត ឲ្យពល-រដ្ឋ កាន់កាប់ដីខុសច្បាប់ ឬប្រើអាវុធប្រឆាំងអ្នករាជការឡើយ»។ លោកព្រះរាជអាជ្ញាបានស្នើឲ្យចៅក្រមប្រឹក្សាជំនុំជម្រះ ប្តូរទៅចោទប្រកាន់ លោកសូណង់ដូ លើបទល្មើសព្រៃឈើ តាមមាត្រា៩៧ ចំណុចទី៦ នៃការឆ្ការដីព្រៃ ធ្វើកម្មសិទ្ធិផ្ទាល់ខ្លួនវិញ។
ការ ស្នើរបស់ព្រះរាជអាជ្ញាសាលាឧទ្ធរណ៍នេះ បានធ្វើឲ្យមានការសាទរ ពីលោក ស សូវ៉ាន មេធាវីការពារក្តីលោក សូណង់ដូ។ លោក សូវ៉ាន បានថ្លែងថា ៖ «គេមិនចោទ ដូចសាលាដំបូងទេ ដូច្នេះកូនក្តីខ្ញុំ ជាប់តែពីរករណី គឺមជ្ឈិម តាមមាត្រា ៦០៩ មាត្រា ៥០៤ ដែលចែងឲ្យជាប់ពន្ធនាគារពី ៦ ខែទៅ ១ ឆ្នាំ និងពី ១ ឆ្នាំទៅ ៣ ឆ្នាំ។ ដូច្នេះវាល្អសម្រាប់គាត់»។ លោកគូសបញ្ជាក់ថា៖ «បើគេ លើកបទចោទពីមុនចោល មិនជាប់បទឧក្រិដ្ឋ ដូច្នេះគាត់មិនជាប់គុកដល់ ២០ ឆ្នាំទេ។ សវនាការរយៈពេលពីរថ្ងៃនេះ ខ្ញុំមើលឃើញនូវភាពវិជ្ជមាន ព្រោះថា រកមិនឃើញថា គាត់បញ្ជាប៊ុន រដ្ឋា ឲ្យធ្វើរឿងអបគមន៍អីទេ»។
លោកសំ សុគង់មេធាវីម្នាក់ទៀត របស់លោកសូណង់ដូ បានស្នើឲ្យតុលាការ លើកលែងការចោទប្រកាន់និងដោះលែងកូនក្តីរបស់លោក ចេញពីពន្ធនាគារ។
នៅ ក្នុងសវនាការរយៈពេលពីរថ្ងៃមកនេះ ក្រៅពីលោកម៉ម សូណង់ដូ ក៏មានជនជាប់ចោទពីរនាក់ផ្សេងទៀត ដែលជាអ្នកភូមិប្រមាផងដែរ គឺឈ្មោះ ទូច រាម និង កាន់ សុវណ្ណ។
សម្រែកនៅខាងក្រៅតុលាការ កាលពីម្សិលមិញ របស់ក្រុមអ្នកគាំទ្រលោក សូណង់ដូ ប្រមាណ ១០០ នាក់ នៅតែខ្លាំងកា្ល និងឮចូលដល់បន្ទប់សវនាការ ដោយទាមទារឲ្យសាលាឧទ្ធរណ៍ ដោះលែងលោកម៉ម សូណង់ដូ ជាអ្វីដែលពួកគេបានហៅថា «ជារឿងអយុត្តិធម៌បំផុត ដែលចាប់មនុស្សស្លូតត្រង់ ដូចជាលោកសូណង់ដូ ដាក់ពន្ធនាគារ»។
ដូច ពេលមុនៗដែរ លោក សូណង់ដូ នៅតែសង្ឃឹម នឹងទទួលបានយុត្តិធម៌ពីសាលាឧទ្ធរណ៍ ជាអ្វីដែលលោក បានគូសបញ្ជាក់ម្តងហើយម្តងទៀតថា លោកជាមនុស្សបរិសុទ្ធស្អាតស្អំមិនដែលប្រព្រឹត្តអ្វីខុសច្បាប់ នោះឡើយ។ បុរសវ័យចំណាស់សក់សដែលកាន់សញ្ជាតិបារាំងរូបនេះ បានថ្លែងទាំងទឹកមុខញញឹម នៅពេលត្រូវកម្លាំងនគរបាល បណ្តើរទៅកាន់រថយន្តពន្ធនាគារថា៖ «ខ្ញុំសប្បាយចិត្ត តែមិនទាន់១០០ ភាគរយទេ ពីព្រោះខ្ញុំអត់ខុសអីទាំងអស់។ ពូត្រូវតស៊ូតទៅទៀត នៅពេលដែលយើងធ្វើអ្វីមិនមែនជាកំហុស យើងត្រូវទុកចិត្តតុលាការ»។
លោកអំ សំអាត ទីប្រឹក្សាបច្ចេកទេស អង្គការសិទ្ធិមនុស្សលីកាដូ ថ្លែងថា ការប្តូរបទចោទ ទៅជាបទល្មើសព្រៃឈើ មិនគួរកើតមានទេ ពីព្រោះបទចោទថ្មីនេះ ក៏គ្មានអង្គហេតុអ្វីពាក់ព័ន្ធដែរ ហើយបើតុលាការរកឃើញអាចជាប់ទោសពីរ៥ទៅ១០ ឆ្នាំ នៅតែ«ជាទោសធ្ងន់ធ្ងរសម្រាប់លោកសូណង់ដូ ដែលមិនអាចទទួលយកបាន»។
ចំណែក លោកឡុង លន់ មេធាវីការពារក្តី ជនជាប់ចោទពីររូបទៀត ដែលជាប់ទោស ៣ ឆ្នាំ និង ៥ ឆ្នាំ ក៏បានស្នើឲ្យតុលាការ លើកលែងការចោទប្រកាន់ កូនក្តីទាំងពីររបស់លោកផងដែរបើទោះបីជាព្រះរាជអាជ្ញា នៅតែបន្តរក្សាការចោទប្រកាន់ និងឲ្យតុលាការ ពិចារណាតាមផ្លូវច្បាប់តាមចម្លើយនៃអង្គសវនាការក៏ដោយ។
ដើមបណ្តឹង មិនបានដាក់បន្ទុកលោកម៉ម សូណង់ដូ
ដើមបណ្តឹង ៣ នាក់ដែលមានវត្តមាន លោក ឆេង ឆាត់ សមាជិកក្រុមប្រឹក្សាឃុំ កំពង់ដំរី លោក ជា ជីន មេភូមិប្រមា និងលោក កុល ពន្លឺ នគរបាលប៉ុស្តិ៍ឃុំកំពង់ដំរីត្រូវបានអង្គសវនាការសួរដេញដោលពេញ មួយព្រឹកម្សិលមិញ។ ទាក់ទិននឹងការចោទប្រកាន់លើលោក សូណង់ដូ អាជ្ញាធរទាំងបីនាក់នេះ មិនឆ្លើយចម្លើយណាមួយចោទថា លោក សូណង់ដូ ដឹកនាំបង្កើតតំបន់អបគមន៍ ឬធ្លាប់ឃើញលោកសូណង់ដូ ចុះទៅជួបប្រជាជនផ្ទាល់ឡើយ តែអ្នកទាំងបីសុទ្ធតែឆ្លើយដាក់ឈ្មោះ ប៊ុន រដ្ឋា ដែលរត់គេចខ្លួន នៅក្រៅប្រទេស និងត្រូវកាត់ទោសកំបាំងមុខឲ្យជាប់ពន្ធនាគារចំនួន ៣០ ឆ្នាំ ថាឈ្មោះនេះ ជាអ្នកដឹកនាំកិច្ចប្រជុំជាមួយពលរដ្ឋ ឲ្យពលរដ្ឋ ធ្វើការបះបោរ តវ៉ានឹងក្រុមហ៊ុន ដើម្បីបានដីធ្លីបង្កបង្កើនផល។
លោក ឆេង ឆាត់ ថ្លែងថា៖«ខ្ញុំមិនដែលឃើញលោកម៉ម សូណង់ដូទេ ឮឈ្មោះគាត់តែតាមវិទ្យុហើយគាត់ ក៏មិនដែលមកភូមិប្រមាដែរ។ តែខ្ញុំឮថា មានក្រុមប៊ុន រដ្ឋា ដើរបំផុសឲ្យពលរដ្ឋ ចូលសមាគមអ្នកប្រជាធិបតេយ្យ ទើបបានចែកដីឲ្យទំហំ ២០ ម៉ែត្រ គុណ ៣០ ម៉ែត្រ»។
លោក កុល ពន្លឺ នគរបាលប៉ុស្តិ៍ឃុំកំពង់ដំរី ថ្លែងក្នុងសវនាការថា រាល់លើក មានតែឈ្មោះប៊ុន រដ្ឋា ដែលតាំងខ្លួនជាមេក្លោង មកពីសមាគមអ្នកប្រជាធិបតេយ្យចេញមុខជួបពលរដ្ឋហើយបំផុសបំផុល បញ្ជាពលរដ្ឋ ឲ្យកាន់កាំបិត ពូថៅ ស្នា ធ្វើបាតុកម្មតវ៉ារឿងដីធ្លី។
អ្នកស្រីស្រេង ថូ ភរិយាជនជាប់ចោទ កាន់ សុវណ្ណ ប្រាប់ភ្នំពេញប៉ុស្តិ៍ថា ប្តីរបស់អ្នកស្រី ជាប់ទោសនិងមិនត្រូវបានគេដោះលែង ឬព្យួរទោស ដូចអ្នកជាប់ចោទដទៃទេ ដោយសារតែប្តីរបស់អ្នកស្រី មិនឆ្លើយដាក់លោក សូណង់ដូ ដែលជាមនុស្សមិនដែលជាន់ដីភូមិប្រមា។
សញ្ញាវិជ្ជមានពីសវនាការ
ការ សាលាឧទ្ធរណ៍ បានយល់ព្រម ទទួលយកការវិភាគឯករាជ្យមួយ របស់មជ្ឈមណ្ឌលសិទ្ធិមនុស្សកម្ពុជា ទៅពិចារណា ក្នុងការកាត់ក្តី ហើយត្រូវបានចៅក្រមលោក ឃុន លាងម៉េង អានក្នុងអង្គសវនាការ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានស្វាគមន៍ ចំពោះការទទួលយកការវិភាគរបស់មជ្ឈមណ្ឌលលោកទៅពិចារណា។ លោកថ្លែងថា វាជាការវិភាគតាមផ្លូវច្បាប់ នូវសិទ្ធិសេរីភាព អ្នកសារព័ត៌មាន ដែលមិនគួររំលោភបំពាន លើផ្នែកបញ្ចេញមតិ។ លោករំពឹងថា សាលាដំបូង ២៤ ខេត្តក្រុង នឹងទទួលយកការវិភាគលើបញ្ហាផ្សេងៗ ក្នុងការពិចារណារឿងក្តី។ លោកថ្លែងថា៖ «បើតុលាការវិនិច្ឆ័យត្រឹមត្រូវ លោកសូណង់ដូ គួរដោះលែង»។ នេះជាលើកទី ១ ហើយ ដែលតុលាការទទួលយកការវិភាគឯករាជ្យរបស់អ្នកជំនាញអង្គការសង្គម ស៊ីវិល។ លោក វីរៈ មានប្រសាសន៍ថា៖«នេះជាប្រវត្តិសាស្ត្រ ខ្ញុំសប្បាយចិត្ត ការទទួលបែបនេះ មានភាពវិជ្ជមាន»។
ជនជាប់ ចោទ ប៊ុន រដ្ឋា ដែលត្រូវកាត់ទោសកំបាំងមុខ ដោយសាលាដំបូងរាជធានី ឲ្យជាប់ពន្ធនាគារ ៣០ ឆ្នាំ នៅពេលនេះ កំពុងរស់នៅក្រៅប្រទេស។ ជនជាប់ចោទរូបនេះ ត្រូវបានអង្គសវនាការ សាលាឧទ្ធរណ៍រយៈពេលពីរថ្ងៃមកនេះ បាននិយាយចំឈ្មោះ យ៉ាងច្រើនថា ជាអ្នកលេចមុខនៅភូមិប្រមា ដឹកនាំកិច្ចប្រជុំ ធ្វើការប្រឆាំងរដ្ឋាភិបាល និងដើរវាស់វែងដីជូនពលរដ្ឋ។
នៅពេល ទាក់ទងមកកាសែតភ្នំពេញប៉ុស្តិ៍កាលពីម្សិលមិញ បុរសម្នាក់ ដែលអះអាងថា ខ្លួនឈ្មោះ ប៊ុន រដ្ឋា បានគំរាមធ្វើមហាបាតុកម្ម បើតុលាការកម្ពុជា គ្រប់ជាន់ថ្នាក់ មិនផ្តល់យុត្តិធម៌ឲ្យលោកសូណង់ដូ។ លោកនិយាយថា៖ «ក្នុងប្រព័ន្ធ ច្បាប់កម្ពុជា ខ្ញុំមិនមានជំនឿតាំងតែពីដើមមកហើយ។ ដូចនេះមានតែមួយទេ ពលរដ្ឋដែលស្គាល់ខ្ញុំតាំងពី ២០០៥ ហ្នឹង គេរួមគ្នាថា ប្រសិនបើមិនមានយុត្តិធម៌ណាមួយ ចំពោះលោក ម៉ម សូណង់ដូពីតុលាការសាលាដំបូង ដល់តុលាការកំពូលពួកយើងមានតែជ្រើសរើសជម្រើសចុងក្រោយរបស់ពួក យើង គឺរួមគ្នាធ្វើមហាបាតុកម្ម នៅក្នុងទីក្រុងភ្នំពេញ និងបិទផ្លូវជាតិទាំងអស់ ឲ្យវាកកស្ទះចរាចរណ៍បង្ខំឲ្យតុលាការផ្តល់យុត្តិធម៌»។
សាលដីកាលើសំណុំរឿងដ៏រសើបនេះ នឹងត្រូវប្រកាសនៅថ្ងៃទី១៤ ខែមីនា ឆ្នាំ២០១៣៕
No comments:
Post a Comment
yes