លិខិតចុះថ្ងៃទី ៣ មីនា របស់លោកឧកញ៉ា លឹម ហុងឈាង រស់នៅក្នុងឃុំត្រពាំងផ្លុង ស្រុកពញាក្រែក ខេត្តកំពង់ចាម ជិតព្រំដែនកម្ពុជា‑វៀតណាម បានអំពាវនាវឲ្យលោកនាយករដ្ឋមន្រ្តី ហ៊ុន សែន រដ្ឋមន្រ្តីក្រសួងមហាផ្ទៃ លោក ស ខេង រដ្ឋមន្រ្តីក្រសួងពាណិជ្ជកម្ម លោក ចម ប្រសិទ្ធ និងអភិបាលខេត្តកំពង់ចាម លោក ហ៊ុន ណេង អន្តរាគមន៍ជួយជនជាតិកម្ពុជាដែលត្រូវអាជ្ញាធរវៀតណាមចាប់ឃុំ និងទារយកប្រាក់ពួកគេត្រឡប់មកវិញ ខណៈអ្នកទាំងនោះត្រូវអាជ្ញាធរវៀតណាមចាប់ឃាត់និងរឹបអូសយក ផលិតផល ដែលពួកគាត់ដឹកឆ្លងចូលទៅលក់ក្នុងប្រទេសវៀតណាម។
ឧកញ៉ា លឹម ហុងឈាង បានថ្លែងថា អាជ្ញាធរវៀតណាម តែងតែចាប់ខ្លួនជនជាតិកម្ពុជាដាក់ពន្ធនាគារ និងរឹបអូសយកប្រាក់ពីពួកគេ។ លោកថ្លែងថា គ្រាន់តែ ៦ខែ(មីនា-ខែកញ្ញា) ឆ្នាំ២០១២ នៅច្រកព្រំដែនអន្តរជាតិ ត្រពាំង ផ្លុង សមត្ថកិច្ចវៀតណាមបានចាប់ជនជាតិកម្ពុជាចំនួន៥នាក់ដាក់ពន្ធ នាគារ និង ដកហូតយកប្រាក់ចំនួនជាង ១០ម៉ឺនដុល្លារអាមេរិក ខណៈពួកគេនាំចេញផលិតផលទៅលក់នៅវៀតណាម។
លោកបន្ថែមថា ពលរដ្ឋកម្ពុជាទាំងនោះត្រូវចោទប្រកាន់ពីបទពាក់ព័ន្ធនឹងការរត់ ពន្ធរូបិយប័ណ្ណខុសច្បាប់ ហើយ៣នាក់ ក្នុងចំណោមពួកគេត្រូវបានដោះលែងក្រោមការធានានៅក្រៅឃុំ បន្ទាប់ពីឃុំខ្លួនពី២ទៅ៥ខែ ចំណែក២នាក់ទៀតនៅជាប់ឃុំក្នុងខេត្ត តៃនិញ នៅឡើយ។
ជាងនេះ ទៀត លិខិតក៏បានជម្រាបលោកនាយករដ្ឋមន្រ្តី ហ៊ុន សែន ថា កាលពីថ្ងៃទី២៧ ខែកុម្ភៈ អាជ្ញាធរវៀតណាមបានចាប់ខ្លួនខ្មែរពីរនាក់ម្តាយនិងកូនស្រី នៅប៉ុស្តិ៍ព្រំដែនក្នុងឃុំដា ស្រុកមេមត់ ជាមួយប្រាក់៥៤.៩០០ដុល្លារ បានពីការលក់ស្វាយចន្ទី។ ប៉ុន្តែសំណាងភ្លាមៗនោះ នគរបាលកម្ពុជានៅប៉ុស្តិ៍ព្រំដែនបានអន្តរាគមន៍ជួយទាន់។
ឧកញ៉ា លឹម ហុងឈាង បានប្រាប់ភ្នំពេញ ប៉ុស្តិ៍ពីម្សិលមិញថា វៀតណាមចាប់ខ្លួនជនកម្ពុជាក្រោមការចោទថា ពួកគេរត់ពន្ធរូបិយប័ណ្ណខុសច្បាប់ ពេលទទួលយកប្រាក់លក់ផលិតផលពីខាងវៀតណាមមកវិញ។
លោក លឹម ហុងឈាង ថ្លែងថា៖« បញ្ហានេះគឺធ្ងន់ធ្ងរណាស់។ ខ្ញុំគិតថា យើងទាំងអស់គ្នាត្រូវតែជួយ។ នៅពេលខាងវៀតណាមមកយកប្រាក់[ពីកម្ពុជា] ខ្ញុំមិនដែលឃើញអាជ្ញាធរយើងចាប់ខ្លួនពួកគេទេ។ ប៉ុន្តែពេលយើងទៅយកប្រាក់ពីការលក់ដូរនៅវៀតណាមត្រូវគេ ចាប់ខ្លួនយើង»។
លោកថ្លែងថា៖ «ការនេះ ប្រជាជនមិនខុសទេ ប៉ុន្តែ រដ្ឋាភិបាលខុស ដោយសាររដ្ឋាភិបាលមិនមានធនាគារសម្រាប់ធ្វើការផ្ទេរប្រាក់ ជូនប្រជាជន»។
លោក ហួត គឹមសៀង និងលោក វុធ ថា ជាជនពីរនាក់ ក្នុងចំណោម៥នាក់ ដែលត្រូវចាប់ឃុំជាង៣ខែ ក្នុងខេត្តតៃនិញ និងត្រូវដោះលែងពីខែមិថុនា និងខែកញ្ញា បានប្រាប់ថា ពួកគាត់ត្រូវចាប់ខ្លួនពីបទរត់ពន្ធលុយខុសច្បាប់ បន្ទាប់ពី ទៅទារប្រាក់ជំពាក់ពីការលក់ផលិតផលឲ្យជនវៀតណាម និងត្រូវអាជ្ញាធរវៀតណាមចាប់ខ្លួនដោយចោទថា កាន់ប្រាក់លើសចំនួនកំណត់ច្បាប់វៀតណាម។
គាត់បន្តថា តុលាការវៀតណាមប្រាប់គាត់ថា បើនរណាម្នាក់កាន់ប្រាក់លើស៥ពាន់ដុល្លារអាមេរិក ជននោះនឹងត្រូវចោទប្រកាន់ពីបទរត់ពន្ធរូបិយប័ណ្ណខុស ច្បាប់។
លោក វុធ ថា បានថ្លែងថា៖ «ជនជាតិវៀតណាមមក ទិញគោក្នុងប្រទេសយើងជំពាក់សិន រួច ហើយគេឲ្យយើងទៅយកប្រាក់ក្នុងប្រទេសគេវិញ។ ពេលចូលទៅយកប្រាក់រួចពួកគេប្រាប់នគរបាលឲ្យចាប់យើង»។ លោកអះអាងថាប្រាក់៤៨.០០០ ដុល្លារអាមេរិករបស់គាត់ត្រូវគេរឹបអូសជាទ្រព្យសម្បត្តិរដ្ឋ វៀតណាម។
លោក ហួត គឹមសៀង ដែលត្រូវដោះលែងពីខែមិថុនា បានបន្តថា៖ «វាគឺអយុត្តិធម៌សម្រាប់ជនជាតិខ្មែរយើងលក់ទំនិញ ឲ្យវៀតណាម យើងយកប្រាក់វិញ ត្រូវពួកគេចោទថាយើងខុសច្បាប់។ ជនជាតិវៀតណាមមកយកប្រាក់ពីយើងផងដែរ ប៉ុន្តែខាងយើងមិនដែលចាប់ពួកគេទេ»។ លោកថា ប្រាក់ដែលគេរឹបអូសយកពីគាត់ចំនួន១០.១៥៧ ដុល្លារអាមេរិក ជាប្រាក់លក់ដំឡូងមី ។
លោក ហែម យៀត មេឃុំត្រពាំងផ្លុង ប្រាប់ភ្នំពេញប៉ុស្តិ៍ពីម្សិលមិញថា លោកព្យាយាមទាក់ទងទៅខាងវៀតណាមជាច្រើនលើកសុំឲ្យដោះលែង ជិន ថន និង ឈន ងីម វិញ ប៉ុន្តែភាគីវៀតណាមហាក់មិនខ្វល់រឿងនេះទេ គ្រាន់តែថា ពួកគេកំពុងពិចារណា។
អភិបាលខេត្តកំពង់ចាម លោក ហ៊ុន ណេង បានថ្លែងកាលពីម្សិលមិញថា អាជ្ញាធរវៀតណាមបានធ្វើការចាប់ខ្លួនជនជាតិកម្ពុជាទាំងនោះ គឺត្រឹមត្រូវតាមច្បាប់ ដោយលោកបានអះអាងថា ពួកគេមួយចំនួនកាន់លុយច្រើនដើម្បីចៀសពីការចុះបញ្ជីទិដ្ឋាការនៅតាមប៉ុស្តិ៍ព្រំដែនអន្តរជាតិ។
លោក ហ៊ុន ណេង បានថ្លែងបន្តថា ៖ «ច្បាប់នៅក្នុងប្រទេសរបស់ពួកគេ [វៀតណាម]គឺខុសពីច្បាប់ក្នុងប្រទេសរបស់យើង។
តាមច្បាប់របស់វៀតណាម ពួកគេចាប់ខ្លួន គឺត្រឹមត្រូវ»។ លោកបានថ្លែងបន្តថា៖ «ខ្ញុំបានសរសេរលិខិតទៅអាជ្ញាធរខេត្តតៃនិញ ដើម្បីសុំឲ្យដោះលែងអ្នកទាំងពីរនាក់ ដែលត្រូវបានឃុំខ្លួននោះ ហើយ ប៉ុន្តែពួកគេបាននិយាយថា ពួកគេមិនមានសិទ្ធិទៅដោះលែងអ្នកទាំងនោះទេ ដោយសារវាជារឿងនៅក្នុងដៃរបស់តុលាការ»។
លោក ហ៊ុន ណេង បញ្ជាក់បន្ថែមថា លោកតែងតែធ្វើការណែនាំទៅដល់ប្រជាជនក្នុងខេត្តឲ្យធ្វើ ការផ្ទេរប្រាក់តាមធនាគារវៀតណាម ប៉ុន្តែ ប្រជាជនទាំងនោះតែងតែកាន់សាច់ប្រាក់គេចចេញពីអាជ្ញាធរវៀតណាម។
អ្នកនាំពាក្យស្ថានទូតវៀតណាមប្រចាំកម្ពុជា មិនអាចទាក់ទងបានទេពីម្សិលមិញ៕
No comments:
Post a Comment
yes