លោកចាប ល័ក្ខ មេភូមិជ្រោយបន្ទាយ លោក អ៊ុំ សុខលាង មេភូមិខ្សាច់ទប់ មកពីគណបក្សហ៊្វុនស៊ិនប៉ិច និងអ្នកស្រី អ៊ុង ស៊ីណាន មេភូមិរកាធំ លោក លុយ ឈុនហេង មេភូមិកែង មកពីគណបក្ស សម រង្ស៊ី ត្រូវបានដកចេញពីតំណែងកាលពីថ្ងៃទី ១៨ ខែមីនា ដោយលោក ពេជ្រ ងួនស្រិន មេឃុំជ្រោយបន្ទាយមកពីគណបក្សប្រជាជនកម្ពុជាដែលកាន់អំណាច។
សមាជិកគណបក្ស សម រង្ស៊ី និងគណបក្ស ហ៊្វុនស៊ិនប៉ិចទាំងនោះបានថ្លែងថា ការដកចេញនេះ គឺផ្ទុយនឹងនីតិវិធីរបស់ក្រសួងមហាផ្ទៃ ហើយវាទាក់ទិននឹងបញ្ហានយោបាយ។ លោក ចាប ល័ក្ខ បានថ្លែងថា៖ «ខ្ញុំមិនដឹងទេថា តើមូលហេតុអ្វី បានជាខ្ញុំត្រូវបានដកពីតំណែង ខ្ញុំបានទៅធ្វើការរៀងរាល់ថ្ងៃ។ ការដកនេះ គឺដោយសារគេខឹងនឹងខ្ញុំចូលរួមគណបក្ស សម រង្ស៊ី»។ លោកចាប ល័ក្ខ បានធ្វើជាមេភូមិ តាំងពីការបោះឆ្នោតឃុំ-សង្កាត់អាណតិ្តដំបូង។
លោក អ៊ុំ សុខលាង ក៏បានថ្លែងដែរថា លោកមិនដែលធ្វើអ្វីខុសទេ ក្នុងតំណែងជាមេភូមិតាំងពីឆ្នាំ២០០៦ មក និងថា លោក ពេជ្រ ងួនស្រិន មេឃុំជ្រោយបន្ទាយ ពុំដែលហៅរូបលោក ឲ្យចូលរួមកិច្ចប្រជុំ ឬប្រាប់លោកឲ្យធ្វើកិច្ចការអ្វីទេ ពេលគាត់ជាប់ឆ្នោតជាមេឃុំក្នុងអាណតិ្តថ្មីនេះ។ លោកបន្ថែមថា លោក ប៉ិចងួនស្រីន អញ្ជើញតែមេភូមិរងពីគណបក្សប្រជាជនកម្ពុជា ដើម្បីចូលប្រជុំ ហើយប្រាប់ពួកគេឲ្យធ្វើកិច្ចការជាច្រើន។ លោកថ្លែងថា៖«ការដកនេះគឺទាក់ទងនឹងបញ្ហានយោបាយ ដោយសារខ្ញុំបានចូលរួមជាមួយនឹងគណបក្សសម រង្ស៊ី»។
អ្នកស្រី អ៊ុង ស៊ីណាន មេភូមិរកាធំ មកពីគណបក្សសមរង្ស៊ី ក៏បានថ្លែងផងដែរថា អ្នកស្រីបានបម្រើការងារក្នុងតួនាទីរបស់អ្នកស្រីក្នុងភូមិ ប៉ុន្តែអ្នកស្រី មិនដឹងទេថា តើមូលហេតុអ្វីបានជាអ្នកស្រីត្រូវបានដកពីតំណែងនោះទេ។ ប៉ុន្តែអ្នកស្រីសង្ស័យថា ការដកនេះគឺដោយសារការរើសអើងបក្ខពួក។
លោក កែវ ភីរម្យ ប្រធានគណបក្ស សម រង្ស៊ី ប្រចាំខេត្តក្រចេះ និងអ្នកស្រី ឡាច គីមអ៊ី ជំទប់ទី ២ នៃឃុំជ្រោយបន្ទាយ បានថ្លែងថា ការដកចេញនេះ គឺផ្ទុយនឹងនីតិវិធីរបស់ក្រសួងមហាផ្ទៃ ដោយពួកលោកអះអាងថា ប្រសិនបើមេភូមិណាម្នាក់ធ្វើខុស មេឃុំត្រូវធ្វើការណែនាំឬអប់រំ ប៉ុន្តែពួកគេពុំបានធ្វើអ្វីខុសទេ។
នៅពេលទាក់ទងដោយ ភ្នំពេញ ប៉ុស្តិ៍ កាលពីម្សិលមិញ លោក ពេជ្រ ងួនស្រីន ពុំបានផ្តល់មូលហេតុជាក់លាក់ក្នុងការដកមេភូមិទាំងនោះចេញពី តំណែងទេដោយលោកនិយាយថា វាជាកិច្ចការផ្ទៃក្នុងរបស់ឃុំ ហើយថា ការដកចេញនេះ គឺដោយសារកំហុសពួកគេ។ ទោះជាយ៉ាងណា លោកមិនបានពន្យល់អំពីកំហុសនោះទេ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានបដិសេធមិនផ្តល់អត្ថាធិប្បាយទេ កាលពីម្សិលមិញ នៅពេលភ្នំពេញ ប៉ុស្តិ៍ ស្នើសុំសេចក្តីពន្យល់ អំពីការអនុវត្តផ្ទុយទៅនឹងនីតិវិធីច្បាប់ ក្នុងការដកមេភូមិចេញពីតំណែងនេះ។
លោក គី សារ៉ា ប្រធានគណបក្សហ៊្វុនស៊ិនប៉ិច ប្រចាំខេត្តក្រចេះ និងជាអភិបាលរងខេត្ត បានថ្លែងថា មិនត្រឹមតែមេភូមិគណបក្សហ៊្វុនស៊ិនប៉ិច ក្នុងស្រុកព្រែកប្រសព្វទេ ដែលត្រូវបានដកពីតំណែង តែនៅស្រុកដទៃទៀត ក៏មានការដកពីតំណែងផងដែរ។ លោកបានបន្ថែមថា វាជាសិទិ្ធរបស់មេឃុំថ្មី ក្នុងការសម្រេចបែបនេះ។ លោក សារ៉ា បន្តថា៖ «តាមគោលការណ៍ គេត្រូវដកគ្រប់កន្លែង នេះអាចថា ត្រូវក៏បានខុសក៏បាន។... នេះជាសិទិ្ធរបស់អ្នកឈ្នះ»៕
No comments:
Post a Comment
yes