ខេត្តកំពង់ចាម ៖ បុរសម្នាក់ត្រូវបានកូនប្រុសបង្កើតទាញកាំបិតខ្វែវមកកាប់ប្រហារដោយមិនញញើតដៃ ត្រូវ៣កាំបិត បណ្តាលឱ្យរងរបួសជាទម្ងន់ បន្ទាប់ពីបុរសរូបនេះផឹកស្រវឹងរករឿងប្រពន្ធកូនមិនលស់ថ្ងៃនោះ ។ ហេតុការណ៍ហិង្សាក្នុង គ្រួសារនេះ បានកើតឡើងកាលពីវេលាម៉ោង៥ និង៤០នាទីល្ងាចថ្ងៃទី១២ កក្កដា ២០១២ ស្ថិតក្នុងភូមិឡូត៍ ឃុំកំពាន់ ស្រុកមេមត់ ហើយកូនប្រុសដៃដល់ បានរត់គេចខ្លួនបាត់ស្រមោល ។
តាមលោកវរសេនីយ៍ត្រីឯម កុសល អធិការនគរបាលស្រុកមេមត់បានឱ្យដឹងថា បុរសរងគ្រោះជាឪពុកឈ្មោះខឿន ខា អាយុ៤៨ឆ្នាំ ត្រូវបានកូនប្រុសដែលជាជនដៃដល់ឈ្មោះខឿន កក្កដា អាយុ១៩ឆ្នាំ កាប់ប្រហារ៣កាំបិតខ្វែវរងរបួសធ្ងន់ ។ មុនពេលកើត ហេតុបុរសរងគ្រោះ និងប្រពន្ធបាននាំគ្នាទៅចូលរួមពិធីជប់លៀងក្នុងភូមិរហូតផឹកស្រវឹងទាំងពីរនាក់ ។ លោកអធិការនគរបាលប្រាប់បន្តថា ពេលត្រឡប់មកដល់ផ្ទះវិញ ប្តីប្រពន្ធទាំងពីរនាក់នេះ បែរជាមានការឈ្លោះប្រកែកគ្នាទៅវិញទៅមក តឹងសរសៃកដាក់គ្នារៀងៗខ្លួន ។ ពេលនោះកូនប្រុសឈ្មោះកក្កដាមានការខឹងសម្បារចំពោះឪពុកយ៉ាងខ្លាំង ក៏ស្ទុះទៅយកកាំបិតខ្វែវកាប់មកលើឪពុកត្រូវចំនួន៣កាំបិត បណ្តាលឱ្យឈាមហូរស្រោចពេញខ្លួនរងរបួសជាទម្ងន់ ត្រូវបានក្រុមគ្រួសារដឹកបញ្ជូនទៅសង្ក្រោះនៅមន្ទីរពេទ្យខេត្ត ។
No comments:
Post a Comment
yes