ព្រះអង្គម្ចាស់ធម្មិកោ
អ្នកនយោបាយ និងអ្នកវិភាគនយោបាយ
បានផ្តល់ទស្សនៈផ្សេងៗគ្នាជុំវិញការចូលរួមរបស់ព្រះអង្គម្ចាស់ ស៊ីសុវត្ថិ
ធម្មិកោ ទៅក្នុងគណបក្សសង្គ្រោះជាតិ ដែលជាគណបក្សប្រឆាំងធំជាងគេនៅក្នុងប្រទេសកម្ពុជា។ អ្នកខ្លះបានអត្ថាធិប្បាយថា
ព្រះវត្តមានរបស់ព្រះអង្គក្នុងគណបក្សសង្គ្រោះជាតិគឺគ្រាន់តែជារូបភាព
ប៉ុន្តែគ្មានខ្លឹមសារ។ តែអ្នកខ្លះទៀត បាននិយាយថា
វត្តមានរបស់ព្រះអង្គនឹងធ្វើអោយគណបក្សប្រឆាំងមានទម្ងន់កាន់តែខ្លាំង។
បន្ទាប់ពីគណបក្សសង្រ្គោះជាតិដែលដឹកនាំដោយលោកសម
រង្ស៊ី ពីចំងាយ បានតែងតាំងព្រះអង្គម្ចាស់ ស៊ីសុវត្ថិ ធម្មិកោ
ជាសមាជិកក្រុមប្រឹក្សាជាតិនៃគណបក្សសង្រ្គោះជាតិភ្លាម អ្នកនយោបាយ
និងអ្នកវិភាគនយោបាយនៅក្នុងប្រទេសកម្ពុជា បានផ្តល់ទស្សនៈផ្សេងៗគ្នាជុំវិញព្រះវត្តមានរបស់ព្រះអង្គ
នៅក្នុងគណបក្សប្រឆាំងមួយនេះ។
សម្រាប់លោក កឹម សុខា អនុប្រធានគណបក្សសង្រ្គោះជាតិ
បានអត្ថាធិប្បាយនៅថ្ងៃអាទិត្យនេះថា ក្នុងចំណោមសមាជិករាជវង្ស
ព្រះអង្គម្ចាស់ធម្មិកោគឺជាបុគ្គលដែលមានទស្សនៈវិស័យល្អ
និងមានគំនិតស្នេហាជាតិ។ ដូច្នេះ
វត្តមានរបស់ព្រះអង្គនៅក្នុងចលនាបក្សប្រឆាំង
នឹងផ្តល់ផលប្រយោជន៍បន្ថែមទៀតដល់គណបក្សសង្រ្គោះជាតិ។
ចំពោះលោក កែម ឡី អ្នកវិភាគសង្គមនយោបាយឯករាជ្យនៅក្នុងប្រទេសកម្ពុជាវិញ ការចូលរួមនៃសមាជិករាជវង្សទៅក្នុងគណបក្សប្រឆាំងនៅមុនការបោះឆ្នោតនេះ គឺជាចលនាថ្មី ប៉ុន្តែ វាមិនមានឥទ្ធិពលច្រើនទៅលើការសម្រេចចិត្តនៃអ្នកបោះឆ្នោតទេ។ មូលហេតុគឺដោយសារ នាពេលកន្លងមក គ្រួសាររាជវង្សធ្លាប់បានទទួលតំណែងដឹកនាំប្រទេសរួចហើយ តែបែរជាបង្ករឿងអាស្រូវមួយចំនួនទៅវិញ។ បញ្ហានេះធ្វើអោយប្រជាប្រិយភាពរាជវង្សមានឥទ្ធិពលកាន់តិចតួច ទៅលើអារម្មណ៍អ្នកបោះឆ្នោត។
ងាកមកស្តាប់ការអត្ថាធិប្បាយរបស់លោក ញឹក ប៊ុនឆៃ អគ្គលេខាធិការនៃគណបក្សរាជានិយមហ៊្វុនស៊ិនប៉ិចឯណេះវិញ លោក បានបញ្ជាក់ថា លោកមិនមានការខកចិត្តចំពោះដំណឹងនៃការចូលរួមរបស់ព្រះអង្គម្ចាស់ធម្មិកោ ទៅក្នុងគណបក្សប្រឆាំងសង្រ្គោះជាតិទេ។ លោក ញឹក ប៊ុនឆៃ ពិពណនាព្រះអង្គម្ចាស់ធម្មិកោថា ជាអ្នកនយោបាយរត់ចេញរត់ចូលច្រើន ពីគណបក្សមួយទៅគណបក្សមួយផ្សេងទៀត។ ប៉ុន្តែ ទោះជាយ៉ាងណាក្តី លោក ញឹក ប៊ុនឆៃ គោរពការសម្រេចចិត្តរបស់ព្រះអង្គ។
«ខ្ញុំគោរពការសម្រេចចិត្តរបស់ប្រជាពលរដ្ឋៗម្នាក់ក្នុងការធ្វើនយោបាយ»។ នេះគឺជាការលើកឡើងរបស់លោក ផៃ ស៊ីផាន អ្នកនាំពាក្យនៃទីស្តីការគណបក្សគណៈរដ្ឋមន្ត្រី។ លោក ផៃ ស៊ីផាន បានចោទជាសំណួរថា តើព្រះអង្គចូលប្រឡូកក្នុងឆាកនយោបាយ ក្នុងនាមនរណា?
មន្រ្តីជាន់ខ្ពស់គណបក្សប្រជាជនកម្ពុជារូបនេះបានបន្តបញ្ជាក់ទៀតថា គណបក្សប្រជាជនកម្ពុជាមិនមានការព្រួយបារម្ភអ្វីទាំងអស់ ទាក់ទងទៅនឹងព្រះវត្តមានព្រះអង្គម្ចាស់ធម្មិកោទៅក្នុងគណបក្សប្រឆាំង ពីព្រោះទាំងគណបក្សលោក កឹម សុខា ទាំងគណបក្សលោក សម រង្ស៊ី ធ្លាប់ជាគណបក្សចាញ់ឆ្នោត៕
No comments:
Post a Comment
yes