សពលោក ឈុត វុទ្ធី នៅកន្លែងកើតហេតុ
មន្ត្រីសិទ្ធិមនុស្ស និងគ្រួសារជនរងគ្រោះ ទទូចជាថ្មីទៀតឲ្យរដ្ឋាភិបាលវែកមុខអ្នកនៅពីក្រោយនៃការសម្លាប់សកម្មជនព្រៃឈើ លោក ឈុត វុទ្ធី មកផ្តន្ទាទោស តាមច្បាប់ដើម្បីយុត្តិធម៌ដល់អ្នកដែលចូលរួមការពារព្រៃឈើ។
ការទទូចនេះ ធ្វើឡើងនៅថ្ងៃទី២៦ខែមេសានេះ ដែលជាខួបមួយឆ្នាំ នៃការការបាញ់សម្លាប់សកម្មជនការពារបរិស្ថាន លោក ឈុត វុទ្ធី នៅក្នុងឃុំបាក់ខ្លង ស្រុកមណ្ឌលសីមា ខេត្តកោះកុង នៅគ្រាដែលលោកនាំអ្នកសារព័ត៌មានចុះទៅពិនិត្យស្ថានភាពនៃការបំផ្លាញព្រៃឈើខេត្តភាគខាងលិចប្រទេសកម្ពុជា។
នៅមុនពេលចេញសេចក្តីថ្លែងការណ៏នៅថ្ងៃនេះ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ថ្លែងថា មួយឆ្នាំបន្ទាប់ពីការស្លាប់របស់ លោកឈុត វុទ្ធី រដ្ឋាភិបាលមិនទាន់មានការស៊ើបអង្កេតបានច្បាស់លាស់នៅឡើយ។ លោកថា ការស្លាប់របស់ប៉េអឹមលោក អ៊ិន រតនា គឺជារឿងដែលមិនគួរឲ្យជឿដែរ ៖ "មិនមែនរឿងហ្នឹងចៃដន្យ អ៊ឹន រតនា បាញ់ លោក ឈុត វុទ្ធី ហើយគេបាញ់ លោក អ៊ឹន រតនា ដោយចៃដន្យទេ ដោយរាកៃ ខ្ញុំអត់ជឿទេ ស្ដាប់ទៅសុទ្ធតែរឿងដែលអត់ជឿ ហើយអត់មានការស៊ើបអង្កេតផង រដ្ឋាភិបាលបង្កើតសាច់រឿងហ្នឹងដោយ អត់មានការស៊ើបអង្កេត យើងក៏ចង់ស៊ើបអង្កេតថាអ្នកណាគេ នៅពីក្រោយខ្នង អ្នកដែលបញ្ជាពួកគាត់ហ្នឹង សុទ្ធតែរឿងដែលយើងមិនទាន់បានព័ត៌មាន១ឆ្នាំរួចទៅហើយ មិនទាន់បានព័ត៌មាន មិនទាន់បានអីពិតប្រាកដហ្នឹង អត់មានឆន្ទៈអីពិតប្រាកដ ហើយព្រៃឈឺនៅតែបាត់ទៀតបាទ អាហ្នឹងគឺជារឿងមួយដែលគួរឲ្យសោកស្ដាយមែនទែន" ។
ក្រុមគ្រួសារលោក ឈុត វុទ្ធី បានធ្វើដំណើទៅកាន់តំបន់ដែលឃាតករបាញ់សម្លាប់លោកនោះ នៅថ្ងៃទី២៦ខែមេសានេះ ដើម្បីគោរពវិញ្ញាណខន្ធ ជាមួយនឹងការទទូចម្តងទៀត ឲ្យរដ្ឋាភិបាលផ្តល់យុត្តិធម៌ដល់ជនរងគ្រោះ។
លោក ឆើយ ឧត្តមរស្មី ជាកូនប្រុសលោក ឈុត វុទ្ធី បានអំពាវនាវឲ្យបើកសំណុំរឿងឧក្រិដ្ឋនេះឡើងវិញ ដើម្បីរកអ្នកបញ្ជាពីក្រោយមកផ្តន្ទាទោស ខណៈដែលពួកគេអះអាងថា កំពុងបន្តរស់នៅដោយភាពភ័យខ្លាច។
នៅថ្ងៃនេះ គេសង្កេតឃើញថា តាមរយៈបណ្ដាញសង្គមហ្វេសប៊ុក មួយចំនួន មានដាក់រូប លោក ឈុត វុទ្ធី ហើយសសេរថា ចង់ចាំឈុត វុទ្ធី ការពារធនធានធម្មជាតិ របស់ពួកយើង។
អ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រី លោក ទិត្យ សុធា លើកឡើងថា តុលាការបានបញ្ចប់រឿងក្តីនេះហើយ តែបើសង្គមស៊ីវិលទាមទារឲ្យបើកការស៊ើបអង្កេតឡើងវិញនោះ ត្រូវមានភស្តុតាងបន្ថែម ៖ "អញ្ចឹងនៅតែអន្ទិលសង្ស័យណាមួយ គួរគប្បីអង្គការទាំងនោះផ្ដល់ភស្ដុតាង ជៀសវាងយើងបើកវេទិការគ្រាន់តែ ជាការបញ្ចេងមតិរិះគុណ ដោយមិនផ្អែកទៅលើ អង្គហេតុ នឹងអង្គច្បាប់ ឲ្យបានត្រឹមត្រូវគឺ ជាចេតនាមួយដែលបំពុលបរិយាកាសសង្គមតែប៉ុណ្ណឹងទេបាទ" ។
នៅក្នុងហេតុការណ៏បាញ់សម្លាប់ លោក ឈុត វុទ្ធី នោះ មានស្ត្រីជាអ្នកកាសែត The Cambodia Daily ២នាក់ បានរួមដំណើរជាមួយ ដើម្បីស្វែងរកព័ត៌មាន ពីការកាប់ឈើមួយកន្លែង របស់ក្រុមហ៊ុន Timber Green ដែលគេហៅថា ទទួលបានសិទ្ធិ កាប់ឈើសម្អាតអាងវារីអគ្គិសនី។ ប៉ុន្តែមកដល់ពេលនេះអ្នកកាសែតទាំងពីរនាក់នោះ នៅមិនទាន់ហ៊ានបញ្ចេញពីអាថ៌កំបាំង ដែលពួកគេបានជួបប្រទះនោះទេ ដោយបារម្ភពីសុវត្ថិភាពផ្ទាល់ខ្លួន។
យ៉ាងណាក៏ដោយរដ្ឋាភិបាល បានបង្កើតគណៈកម្មការពិសេសមួយ ដើម្បីស៊ើបអង្កេតករណីនេះ តែក្រុមសិទ្ធិមនុស្សរិះគន់ថា មិនមានអ្វីដែលជួយរកយុត្តិធម៌ពិតដល់ជនរងគ្រោះឡើយ ៕
No comments:
Post a Comment
yes