ប្រភពព័ត៌មានច្បាស់ការណ៍ពីខេត្ដកំពង់ចាមបានឱ្យដឹងថា កាលពីវេលាម៉ោង០២និង៤៥នាទីរសៀល នាថ្ងៃទី០៦ ខែសីហា ឆ្នាំ២០១៣នេះ ក្មេងប្រុសអាយុ៩ឆ្នាំម្នាក់ឈ្មោះ ហាញ សុខគង់ រស់នៅភូមិមេម៉ាយ សង្កាត់បឹងកុក ក្រុងកំពង់ចាម ខេត្ដកំពង់ចាម ត្រូវបានលោកវរសេនីយ៍ឯក ជឹម សេងហុង ស្នងការរងនគរ បាលខេត្ដកំពង់ចាម ថយរថយន្ដខ្វះការប្រុងប្រយ័ត្នកិនពីលើ ខណៈដែលក្មេងប្រុសនេះកំពុងអង្គុយលេង នៅលើចិញ្ចើមផ្លូវ បណ្ដាលឱ្យបែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុតែម្ដង ។
ព័ត៌មានដដែលបានរាយការណ៍ឱ្យដឹងដែរថា ក្រោយពេលមានហេតុការណ៍កិនក្មេងប្រុសនេះស្លាប់ភ្លាមៗ នៅកន្លែងកើតហេតុរួចហើយ លោកស្នងការរង ជឹម សេងហុង មិនបានរក្សាទុករថយន្ដវត្ថុតាងប្រព្រឹត្ដល្មើសដើម្បីទុកឱ្យសមត្ថកិច្ចធ្វើការវាស់វែងនិងដោះស្រាយតាមច្បាប់ឡើយ គឺលោកស្នងការរងរូបនេះបែរ ជាបើករថយន្ដម៉ាកឡិចស៊ីស ពណ៌សម្បកឪឡឹក របស់ខ្លួនធ្វើដំណើរទៅកាន់ការិយាល័យធ្វើការយ៉ាងរំភើយ ដូចជាគ្មានកើតហេតុការណ៍អ្វីទាល់តែសោះ ។
តាមប្រភពព័ត៌មានពីអ្នករស់នៅក្បែរខាងក្រុមគ្រួសារក្មេងប្រុសរងគ្រោះ បានឱ្យដឹងថា លោកស្នងការរង ជឹម សេងហុង កំពុងធ្វើការចរចាជាមួយគ្រួសារជនរងគ្រោះ ដើម្បីសងជាសំណងខ្លះ បញ្ចប់សាច់រឿងនេះតែម្ដង ជៀសវាងបញ្ជូនរឿងទៅសមត្ថកិច្ចតុលាការនាំវែងឆ្ងាយ ។
អនុលោមតាមមាត្រា៨២ វាក្យខណ្ឌទី១នៃច្បាប់ស្ដីពីចរាចរណ៍ផ្លូវគោក បានចែងថា “ជនណាបើកបរ ដោយបង្កឱ្យស្លាប់ដល់អ្នកដទៃដោយអចេតនា ត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ ឬ/និងផ្ដន្ទា ទោសពិន័យជាប្រាក់ពី២លានរៀលទៅ៦លានរៀល ។” ។
ដូច្នេះ ទាក់ទងនឹងករណីលោកស្នងការរងនគរបាលខេត្ដកំពង់ចាមឈ្មោះ ជឹម សេងហុង ដែលជាសមត្ថកិច្ចមន្ដ្រីនគរបាលយុត្ដិធម៌ ហើយបានបង្កបទល្មើសគ្រោះថ្នាក់ចរាចរណ៍ បណ្ដាលឱ្យក្មេងប្រុសម្នាក់ស្លាប់យ៉ាងអាណោចអាធ័មបែបនេះ មជ្ឈដ្ឋាននានាកំពុងតាមដានរង់ចាំមើលថា តើលោកស្នងការរង ជឹម សេងហុង នឹងត្រូវប្រឈមមុខចំពោះផ្លូវច្បាប់ដែរឬទេ ? ឬក៏រឿងរ៉ាវនេះត្រូវតែបញ្ចប់ត្រឹមអ្នកមានអំណាច មានលុយកាក់ដូចលោកវរសេនីយ៍ឯក ជឹម សេងហុង សងសំណងដល់ក្រុមគ្រួសារក្មេងរងគ្រោះជាការស្រេច ដោយបន្សល់ទុកនូវវប្បធម៌និរទណ្ឌភាព ? ៕
No comments:
Post a Comment
yes