ក្រុមហ៊ុនបម្រើសេវាទូរស័ព្ទនិងអ៊ីនធឺណិត មិតហ្វូន របស់ វៀតណាម បានកាត់ផ្តាច់មិនឲ្យប្រើប្រាស់បណ្តាញសង្គម ហ្វេសប៊ុក ដែលកំពុងមានការពេញនិយម អស់រយៈពេលមួយព្រឹក កាលពីម្សិលមិញ ដោយមិនបានបញ្ជាក់ពីមូលហេតុច្បាស់លាស់។
អ្នកបម្រើសេវាម្នាក់ របស់ក្រុមហ៊ុន បាននិយាយថា ក្រុមហ៊ុន កំពុងរៀបចំប្រព័ន្ធរបស់ខ្លួន តែមិនអាចបញ្ជាក់ថា ពេលណាប្រើបានវិញឡើយ។ បុរសបម្រើសេវាលើកទូរស័ព្ទអតិថិជននិយាយថា ៖ «ខ្ញុំអត់ដឹងដែរបង ខាងក្រុមហ៊ុនគ្រាន់តែប្រាប់ថា អាប់ដេត ស៊ីសស្ទែម (ធ្វើបច្ចុប្បន្នភាពលើប្រព័ន្ធ) អ៊ីចឹងប្រើអត់បានទេ ហ្វេសប៊ុក តែវេបផ្សេងប្រើបានធម្មតា ហើយយើងក៏មិនដឹងម៉ោងប៉ុន្មាន ឬប៉ុន្មានថ្ងៃដែរ ដែលគេបិទ»។
ប៉ុន្តែ ក្រោយមក បន្ទាប់ពីម៉ោង ១២ ថ្ងៃត្រង់ ក្រុមហ៊ុនក៏បានឲ្យដឹងជាថ្មីថា ខ្លួនបានបើកឲ្យដំណើរការ ហ្វេសប៊ុក វិញហើយ។
សន្ទុះអ្នកប្រើប្រាស់ ហ្វេសប៊ុក កំពុងមានកំណើនយ៉ាងខ្លាំង ជាពិសេសនៅក្នុងអំឡុងនៃដំណើរការបោះឆ្នោត និងក្រោយការបោះឆ្នោតនេះ ដែលអ្នកប្រើប្រាស់ភាគច្រើនជាយុវជន បានធ្វើការបញ្ចេញមតិ បង្ហោះរូបភាព ចំពោះសភាពការណ៍វិវត្តន៍ពីស្ថានការនយោបាយ ឬបញ្ហាសង្គមផ្សេងៗ ជាពិសេស ភាពអយុត្តិធម៌ ក្នុងសង្គម អំពើពុករលួយ ការរំលោភបំពានដីធ្លីនិងបញ្ហាជាច្រើនទៀត រួមទាំងព្រឹត្តិការណ៍ថ្មីៗ ដែលពួកគេបានជួបប្រទះផងដែរ។
លោក ង៉ែត ម៉ូសេ អ្នកប្រើប្រាស់ ហ្វេសប៊ុក ម្នាក់បានប្រាប់ភ្នំពេញ ប៉ុស្តិ៍ ថា នៅពេលដែលពលរដ្ឋ មិនទទួលបានព័ត៌មានគ្រប់គ្រាន់ និងគ្រប់ជ្រុងជ្រោយ គួរឲ្យជឿទុកចិត្ត ពីបណ្តាញព័ត៌មានក្នុងស្រុក សន្ទុះនៃការប្រើបណ្តាញ ហ្វេសប៊ុក កើនឡើង ហើយយុវជន ក៏នាំគ្នាចែករំលែកនូវព័ត៌មាន គំនិត ឬការយល់ឃើញផ្សេងៗរបស់ខ្លួនពីស្ថានភាពនយោបាយ ឬសង្គម។
លោកនិយាយថា៖ «ធម្មតាពេលមានរឿងពិតកើតឡើង ដែលយើងបានជួបប្រទះ យើងអាចយកមកបង្ហោះក្នុង ហ្វេសប៊ុក ដើម្បីចែករំលែកគ្នាមើល»។
គណៈកម្មាធិការជាតិរៀបចំការបោះឆ្នោត ក៏ដូចជាក្រសួងព័ត៌មាន ធ្លាប់បានណែនាំឲ្យមានការប្រើប្រាស់ ហ្វេសប៊ុក នេះ ប្រកបដោយក្រមសីលធម៌ និងមានការទទួលខុសត្រូវ ដោយចៀសវាងការផ្សាយណាមួយ ដែលមានលក្ខណៈអុជអាល នាំឲ្យកើតមានអំពើហិង្សាគ្រប់រូបភាព។
បើតាមទិន្នន័យពី ក្រសួងប្រៃសណីយ៍ និងទូរគមនាគមន៍បានឲ្យដឹងថា គិតត្រឹមឆ្នាំ ២០១២ ប្រទេសកម្ពុជា មានអ្នកប្រើប្រាស់ទូរស័ព្ទចំនួនជាង ២ លាន ៧ សែននាក់ នៅទូទាំងប្រទេស ហើយកម្ពុជា ជាប្រទេស ទី៩៤ ដែលមានអ្នកប្រើប្រាស់បណ្តាញ ហ្វេសប៊ុក ច្រើនជាងគេ គឺមានចំនួនជាង ៦៣ ម៉ឺននាក់។
មិនអាចទាក់ទងសុំការអធិប្បាយពីមន្ត្រីក្រសួងប្រៃសណីយ៍ និងទូរគមនាគមន៍បានឡើយកាលពីម្សិលមិញ៕
No comments:
Post a Comment
yes