សកម្មជនគណបក្សសង្គ្រោះជាតិជួបជុំគ្នានៅស្នាក់ការធំគណបក្សម្សិលមិញ
គណបក្សសង្គ្រោះ ជាតិ បានធ្វើការបណ្តុះបណ្តាលក្រុម ការងាររបស់ខ្លួនអំពីវិធីគ្រប់គ្រងបាតុករ ដើម្បីបញ្ចៀសការបង្កភាពវឹកវរណាមួយ ហើយប្រកាសថា នឹងធ្វើបាតុកម្មសាកល្បងពីរលើកនៅមុនថ្ងៃកំណត់ធ្វើមហាបាតុកម្មទី៧ ខែកញ្ញា។
គណបក្សប្រឆាំង បានប្រកាសកាលពីម្សិលមិញថា ខ្លួននឹងរៀបចំឲ្យមានការសាកល្បងបាតុកម្មចំនួនពីរលើកនៅថ្ងៃទី១ និងទី៥ ខែកញ្ញា «ដើម្បីធានាឲ្យបាននូវបាតុកម្មអហិង្សា និងទប់ស្កាត់ការបង្កចលាចល ពីក្រុមជនខិលខូច»។
ការបណ្តុះបណ្តាលម្សិលមិញ ដែលមានការសហការជាមួយអង្គការក្នុងស្រុក នៅទីស្នាក់ការគណបក្ស ក្នុងសង្កាត់ចាក់អង្រែ ខណ្ឌមានជ័យ មិនបានអនុញ្ញាតឲ្យអ្នកសារព័ត៌មានចូលយកព័ត៌មានឡើយនៅពេលពួកគេទៅដល់ទីនោះ ហើយត្រូវលោកស្រី ជូ ឡុងសូមូរ៉ា តំណាងរាស្ត្រមណ្ឌលភ្នំពេញ ជាភរិយាលោក សម រង្ស៊ី ប្រាប់មកអ្នកកាសែតភ្នំពេញ ប៉ុស្តិ៍ ក្នុងទឹកមុខមាំថា «នេះជាកម្មវិធីផ្ទៃក្នុងរបស់គណបក្ស អ្នកកាសែតមិនត្រូវបានអញ្ជើញឡើយ»
គម្រោងធ្វើបាតុកម្មអហិង្សារបស់បក្សប្រឆាំង កំណត់យកថ្ងៃទី៧ ខែកញ្ញា មុនការប្រកាសលទ្ធផលរបស់គណៈកម្មាធិការជាតិរៀបចំការបោះឆ្នោត(គ.ជ.ប) ដើម្បីទាមទារឲ្យបង្កើតគណៈកម្មការពិសេស ដោះស្រាយភាពមិនប្រក្រតី លើការបោះឆ្នោត ដែលគណបក្សនេះយល់ថា គណបក្សប្រជាជនកម្ពុជា មិនមានសុច្ឆន្ទៈក្នុងការបង្កើតឡើយ។
មិនតែប៉ុណ្ណោះអគ្គនាយកហិរញ្ញវត្ថុនៃគណបក្សសង្គ្រោះជាតិ លោក គី វណ្ណដារ៉ា បានអំពាវនាវតាមលិខិតកាលពីថ្ងៃព្រហស្បតិ៍ ទៅកាន់អ្នកគាំទ្រនិងសប្បុរសជនដែលជាអ្នក«ស្រឡាញ់យុត្តិធម៌និងប្រជាធិប តេយ្យ» សុំឲ្យចូលរួមផ្តល់ថវិកា ដល់ការប្រព្រឹត្តទៅនៃមហាបាតុកម្មថ្ងៃ៧ ខែកញ្ញាខាងមុខនេះ។
លោក គី វណ្ណដារ៉ា បញ្ជាក់ថា៖«គណបក្សសង្គ្រោះជាតិ នឹងបន្តកិច្ចការរបស់ខ្លួនក្នុងការទាមទារនិងតវ៉ាឲ្យមានការដោះស្រាយទាក់ទងដល់ភាពមិនប្រក្រតីទាំងឡាយ ក្នុងដំណើរការបោះឆ្នោតនេះ តាមរយៈការធ្វើមហាបាតុកម្មអហិង្សាប្រឆាំងលទ្ធផលនៃការបោះឆ្នោត»។
ប៉ុន្តែ អាជ្ញាធររាជធានីភ្នំពេញកំពុងក្រើនរំឭកឲ្យគណបក្សសង្គ្រោះជាតិឲ្យគ្រប់គ្រងចំនួនអ្នកចូលរួមក្នុងការប្រមូលផ្តុំនេះឲ្យបានប្រសើរកុំឲ្យមានករណីដូចការជុំគ្នានៅទីលានប្រជាធិបតេយ្យកាលពីដើមសប្តាហ៍នេះ ដែលធ្វើឲ្យសមត្ថកិច្ចមានការបារម្ភ ពីការបង្កឲ្យមានអសន្តិសុខជាយថាហេតុណាមួយ នាពេលជួបជុំក្រោយទៀត។
លោកប៉ា សុជាតិវង្សអភិបាលរាជធានីភ្នំពេញពីម្សិលមិញ បាន ជម្រាបជូនតាមលិខិតមួយទៅគណបក្សសង្គ្រោះជាតិបង្ហាញពី«ការសោកស្តាយ»ចំពោះគណបក្សនេះដែលមិនបានយកចិត្តទុកដាក់អនុវត្តតាមកំណត់ហេតុនៃកិច្ចប្រជុំរវាងអាជ្ញាធររាជធានីនិងតំណាងគណបក្ស កាលពីថ្ងៃទី២៣ ខែសីហា ដែលកំណត់ថា មនុស្សចូលរួមការជួបជុំនៅទីលានប្រជាធិបតេយ្យនាថ្ងៃទី២៦ ខែសីហា និងគ្មានការអញ្ជើញមនុស្សពីតាមខេត្ត ហើយតាមការរាយការណ៍មានការ«កើនលើសពីការកំណត់ រហូតដល់ជិត២ម៉ឺននាក់»។
លោកអភិបាលកត់សម្គាល់ថា៖ «ជាក់ស្តែងប្រជាពលរដ្ឋនៅតាមបណ្តាខេត្ត ក៏ត្រូវគេអញ្ជើញឲ្យចូលរួម...ប្រការនេះបញ្ជាក់ឲ្យឃើញថា គណបក្សសង្គ្រោះជាតិ មានលទ្ធភាពគ្រប់គ្រាន់ក្នុងការបង្កើតព្រឹត្តិការណ៍ជួបជុំសមាជិកគាំទ្របាន តែពិតជាគ្មានលទ្ធភាពគ្រប់គ្រងនិងកម្រិតចំនួនអ្នកចូលរួមបានឡើយ ជាហេតុបង្កឡើងនូវក្តីបារម្ភដល់ប្រជាពលរដ្ឋ អំពីស្ថានភាពអាក្រក់ជាយថាហេតុណាមួយ ដែលអាចនឹងកើតមានឡើងក្នុងពេលជួបជុំគ្នាលើកក្រោយៗទៀត និងឈានទៅប៉ះពាល់ដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមយ៉ាងធ្ងន់ធ្ងរ»។
សាលារាជធានីសូម ៖«ស្នើឲ្យ លោកប្រធានគណបក្សសង្គ្រោះជាតិយកចិត្តទុកដាក់ពិនិត្យឡើង វិញនូវចំណាត់ការទាំងឡាយ របស់ខ្លួនឲ្យបានច្បាស់លាស់ និងមានការទទួលខុសត្រូវខ្ពស់ដើម្បីឲ្យការជួបជុំសម្តែងមតិនានាពេលក្រោយទៀត អនុវត្តស្របតាមច្បាប់ស្តីពីបាតុកម្មដោយសន្តិវិធីនិងគោលការណ៍រក្សាសណ្តាប់ធ្នាប់សាធារណៈដែលចែងក្នុងច្បាប់ជាធរមាន»។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ ឲ្យដឹងបន្ថែមកាលពីម្សិលមិញថា ទោះជាឮពីការប្រកាសបាតុកម្មរបស់បក្សប្រឆាំង ក៏សាលារាជធានី មិនទាន់បានទទួលលិខិតសុំច្បាប់ធ្វើបាតុកម្មផ្លូវការនៅឡើយ។
លោកក៏បញ្ជាក់លើលិខិតអភិបាលរាជធានីខាងលើថា នេះ គ្រាន់ជាការក្រើនរំឭកដល់បក្សប្រឆាំងឲ្យធ្វើអ្វីមួយគិតគូរនូវប្រយោជន៍ជាតិជាធំ ព្រោះសមត្ថកិច្ចមានការបារម្ភពីអសន្តិសុខ នៅពេលមានកម្លាំងជាច្រើនហើយបក្សប្រឆាំងមិនអាចគ្រប់គ្រងបាន លើសពីចំនួនកំណត់ក្រោម១ម៉ឺននាក់។
លោកបន្តថា៖ «អភិបាលថា កុំឲ្យនាំកម្លាំងចូលពីខេត្ត តែគាត់នាំចូលក្នុងលក្ខណៈចាត់តាំង។ នេះសុទ្ធតែល្មើសនឹងការអនុវត្តតាមកំណត់ហេតុកិច្ចប្រជុំដែលឯកភាពគ្នា។ គាត់មានលទ្ធភាពប្រមូលផ្តុំតែអសមត្ថភាពក្នុងការគ្រប់គ្រងកម្លាំង។ គាត់មិនត្រឹមបង្កការព្រួយបារម្ភដល់សមត្ថកិច្ចទេ តែដល់ពលរដ្ឋផងដែរ។ ចុះបើថ្ងៃណាគាត់ប្រមូលកម្លាំងច្រើនជាងនេះ តើពលរដ្ឋព្រួយយ៉ាងណាទៅ អាជីវករ ពាណិជ្ជករនឹងគិតយ៉ាងម៉េច?»។
នៅពេលមានសភាពតានតឹងនយោបាយក្រោយការបោះឆ្នោត កម្លាំងប្រដាប់អាវុធរបស់រដ្ឋាភិបាលត្រូវបានដាក់ពង្រាយរាប់រយនាក់ និងមានការប្រុងជើងការខ្ពស់ចំពោះការបង្កភាពវឹកវរ ចៃដន្យណាមួយពីក្រុមប្រឆាំងលទ្ធផលបោះឆ្នោត។
ចំណែកគណបក្សប្រជាជនកម្ពុជា ក៏បានចេញសេចក្តីថ្លែងការណ៍ពីម្សិលមិញ អំពាវនាវឲ្យបក្សប្រឆាំងត្រូវតម្កល់ប្រយោជន៍ ជាតិជាធំ ហើយថា ខ្លួននៅតែត្រៀមបន្តជួបចរចា។
លិខិតនោះបញ្ជាក់ថា៖«ប្រការដែលគណបក្សសង្គ្រោះជាតិ ប្រកាសធ្វើមហាបាតុកម្មអហិង្សា ប្រឆាំងលទ្ធផលនៃការបោះឆ្នោតមុនការប្រកាសលទ្ធផលផ្លូវការ នឹងធ្វើឲ្យប៉ះពាល់ដល់ជីវភាពរស់នៅក្នុងសុខសន្តិភាពរបស់ប្រជាពលរដ្ឋ និងជាការប្រឆាំងឆន្ទៈពលរដ្ឋតាមរយៈសន្លឹកឆ្នោត ហើយជាចេតនាបំផ្លាញការបោះឆ្នោតមួយដែលសាធារណមតិជាតិ និងអន្តរជាតិ បានវាយតម្លៃថា ជាការបោះឆ្នោតប្រកបដោយលក្ខណៈសេរី មានសន្តិភាព និងតម្លាភាព»។
លោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា ប្រាប់ភ្នំពេញប៉ុស្តិ៍ថា មហាបាតុកម្មរបស់បក្សប្រឆាំងទោះក្នុងរូបភាពណាក៏ដោយ មិនអាចជាចំណុចគន្លឺះដោះស្រាយបញ្ហាបានឡើយ ហើយគណបក្សប្រជាជននៅតែបើកបន្តឲ្យមានការចរចា តាមថ្នាក់ដឹកនាំ។ លោកបន្តថា ៖ យើងត្រៀមជានិច្ចឲ្យមានការចរចាដើម្បីបន្តនូវសន្តិភាព ផ្សះផ្សាបង្រួបបង្រួមជាតិ ប៉ុន្តែ ការចរចាត្រូវផ្អែកលើលទ្ធផល គ.ជ.ប ព្រោះច្បាប់ប្រគល់សិទ្ធិពេញលេញដល់គ.ជ.ប»។
អំពីការធ្វើបាតុកម្ម លោកថា រដ្ឋាភិបាលមានវិធានការទប់ស្កាត់បាតុកម្មដែលបង្កជាហិង្សាហើយរំពឹងថា បក្សប្រឆាំងនឹងធ្វើតាមច្បាប់ស្តីពីបាតុកម្ម៕
No comments:
Post a Comment
yes