គណបក្សសង្គ្រោះជាតិមិនទទួលស្គាល់ដាច់ខាតរដ្ឋាភិបាលថ្មីអាណត្តិទី៥នេះឡើយព្រោះជារដ្ឋាភិបាលដែលខុសច្បាប់

សន្និសិទសារព័ត៌មានរបស់គណបក្សសង្គ្រោះជាតិព្រឹកថ្ងៃពុធនេះ

ជាថ្មីម្តងទៀតប្រធានគណបក្សសង្គ្រោះជាតិ បានធ្វើការប្រកាសជាសារធារណៈនៅក្នុងសន្និសិទ​សារ​ព័ត៌មានរបស់គណបក្ស នៅព្រឹកថ្ងៃទី២៥ កញ្ញាថា គណបក្សសង្គ្រោះជាតិ គឺមិន ទទួលស្គាល់​រដ្ឋាភិបាលថ្មី អាណត្តិទី៥នេះជាដាច់ខាត ព្រោះជារដ្ឋាភិបាលដែលកើតឡើង ដោយខុសច្បាប់ ។

ការប្រកាសរបស់ប្រធានគណបក្សសង្គ្រោះជាតិ បែបនេះ ដោយហេតុថាការប្រជុំសភាដំបូង គឺមិន​មានវត្តមានបេក្ខជនជាប់ឆ្នោតរបស់គណបក្សសង្គ្រោះជាតិចូលរួម ហើយការបោះ​ឆ្នោត​ដោយ​កញ្ចប់ ធ្វើការ​ជ្រើស​រើស​ប្រធាន អនុប្រធានរដ្ឋសភា​ ប្រធាន អនុប្រធាន​គណៈកម្ម​ការ​ជំនាញ និង​សមាសភាព​រដ្ឋា​ភិបាល ក៏គ្មានវត្តមានបេក្ខជនជាប់ឆ្នោត​របស់គណបក្សសង្គ្រោះ​ជាតិចូល​រួមផង​ដែរ ។

ក្នុងនោះអ្វីដែលកត់សម្គាល់ គឺដំណោះស្រាយប្រទេសជាតិ ក៏គណបក្សជាប់ឆ្នោតទាំងពីរនៅ មិន​ទាន់​បានដោះស្រាយជាផលវិជ្ជមាននៅឡើយ ហេតុនេះការបង្កើតរដ្ឋាភិបាលថ្មីនៅពេល នេះ គឺវា​មិនទាន់អាចទៅរួចនោះទេ ។

ជាមួយគ្នានេះ លោកប្រធាន សម រង្ស៊ី បានលើកឡើងថា អ្វីដែលគណបក្សប្រជាជន ធ្វើនេះ​គឺមាន​លក្ខណៈដូចជារដ្ឋប្រហាររដ្ឋធម្មនុញ្ញ គឺការលួចប្លន់អំណាចពីប្រជារាស្រ្ត ការរៀបចំ ក្បាល​ម៉ាស៊ីន​ស្ថាប័នរដ្ឋដោយខុសច្បាប់ និងដោយរំលោភច្បាប់កំពូលជាតិ យ៉ាងធ្ងន់ធ្ងរ ។ ដូច​នេះ​គណបក្ស​សង្គ្រោះជាតិ មិនអាចទទួលស្គាល់ និងមិនអាចសហការតាមរូបភាពណា​មួយជាមួយរដ្ឋាភិ​បាល​បែបនេះឡើយ ។

ចំណែកលោកអនុប្រធានគណបក្សសង្គ្រោះជាតិ កឹម សុខា បានលើកឡើងថា អ្វីដែលគណ​បក្ស​សង្គ្រោះជាតិ បានធ្វើក្នុងរយៈពេលប៉ុន្មានថ្ងៃមកនេះ គឺជាជោគជ័យសម្រាប់គណបក្ស សង្គ្រោះជាតិ ហើយជាការដើរតាមផ្លូវត្រូវ ដែលផ្ទុយពីគណបក្សប្រជាជន ដែលដើរតាម​ផ្លូវ​ខុស ។

ជាមួយគ្នានោះលោកអនុប្រធាន កឹម សុខា បានលើកឡើងថា គណបក្សសង្គ្រោះជាតិ ដើរផ្លូវ ត្រូវ គឺយើងគោរពតាមឆន្ទៈម្ចាស់ឆ្នោត ដែលម្ចាស់ឆ្នោត បោះឆ្នោតឲ្យគណបក្សសង្គ្រោះជាតិ បាន​ប្រាប់​មកថ្នាក់ដឹកនាំគណបក្សសង្គ្រោះជាតិ គឺមិនឲ្យបេក្ខជនជាប់ឆ្នោតចូលរួម​ប្រជុំសភា​លើក​ដំបូង​ជា​ដាច់​ខាត ដោយហេតុថា យុត្តិធម៌ មិនទាន់មានចំពោះពួកគាត់​ជាម្ចាស់ឆ្នោតនៅ​ឡើយទេ ។

ក្នុងនោះគណបក្សសង្គ្រោះជាតិ ក៏បានគោរព តាមគោលការណ៏ប្រជាធិបតេយ្យ​ សេរីពហុបក្ស គោរពតាមរដ្ឋធម្មនុញ្ញ ដែលបានចែងថា ត្រូវតែមានឯកភាពជាតិ គឺយើងធ្វើអ្វីត្រូវតែមានការ ឯក​ភាពជាមុនសិន តែអ្វីដែលគណបក្សប្រជាជនបានធ្វើ ​គឺខុសទាំងស្រុង ​ដោយសារ​តែយើង​នៅមិនទាន់មានឯកភាពជាតិនៅឡើយ ហើយគណបក្សសង្គ្រោះជាតិ គោរពតាមឆន្ទៈរបស់​ប្រជា​​ពលរដ្ឋ គោរពតាមច្បាប់ធម្មនុញ្ញដែលជាច្បាប់កំពូលជាតិ​ និងគោរពតាមគោលការណ៏ ប្រជា​ធិប​តេយ្យ សេរី ពហុបក្ស ៕