អង្គការសិទ្ធិមនុស្សចំនួន៣ កាលពីថ្ងៃពុធម្សិលមិញ ជំរុញឲ្យអាជ្ញាធរត្រូវស៊ើបអង្កេតទ្បើងវិញ នូវឃាតកម្មលើអតីតប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា វិជ្ជា ដើម្បីបង្ហាញថា និទណ្ឌភាពមិនបន្តកើតមាននៅកម្ពុជា។
មជ្ឈមណ្ឌលសិទ្ធិមនុស្សកម្ពុជា (CCHR) សមាគមអាដហុក (ADHOC) និងគណៈកម្មាធិការប្រព្រឹត្តកម្មនៃអង្គការ-សមាគមការពារសិទិ្ធមនុស្សកម្ពុជា (CHRAC) បានចេញសេចក្តីថ្លែងការណ៍រួម បន្ទាប់ពីតុលាការកំពូល កាលពីថ្ងៃទី២៥ ខែកញ្ញា បានសម្រេចលើកលែងបទចោទ និងដោះលែងលោក ប៊ន សំណាង និងលោក សុខ សំអឿន ដែលជាប់ចោទពីបទបាញ់សម្លាប់ លោក ជា វិជ្ជា កាលពីឆ្នាំ២០០៤ ឲ្យមានសេរីភាពទ្បើងវិញ។
សេចក្តីថ្លែងការណ៍រួម ឲ្យដឹងថា បើទោះបីជា តុលាការដោះលែងជនជាប់ចោទទាំងពីរក៏ដោយ ក៏ការឃុំខ្លួនជនដែលគ្មានកំហុសទាំងពីរបានធ្វើឲ្យប៉ះពាល់ដល់សេរីភាពរបស់គេ ហើយអ្នកទាំងពីរមិនបានទទួលសំណងអ្វីពីការឃុំខ្លួនពួកគេ។ សេចក្តីថ្លែងការណ៍រួម បន្តថា ទោះជាយុត្តិធម៌ត្រូវបានផ្តល់ជូនពួកគេ ប៉ុន្តែ យុត្តិធម៌សម្រាប់លោកជា វិជ្ជា មិនទាន់មាននៅទ្បើយទេ។
សេចក្តីថ្លែងការណ៍រួម ក៏ស្នើឲ្យតុលាការកំពូលកំណត់ថ្ងៃបើកសវនាការជំនុំជម្រះសកម្មជនដីធ្លីតំបន់បឹងកក់ អ្នកស្រី យ៉ោម បុប្ផា ដែលជាប់ពន្ធនាគារមួយឆ្នាំមកហើយ។ អង្គការសង្គមស៊ីវិល សង្ឃឹមថា តុលាការនឹងផ្តល់យុត្តិធម៌ជូនអ្នកស្រី ដូចករណីជនជាប់ចោទទាំងពីរដែរ។
ចំណែក គណបក្សសង្គ្រោះជាតិ នៅថ្ងៃព្រហស្បតិ៍នេះ យល់ថា ការដោះលែងលោក ប៊ន សំណាង និង លោក សុខ សំអឿន នឹងធ្វើឲ្យសាធារណជនចោទសំណួរទ្បើងវិញថា តើអ្នកណាជាអ្នកសម្លាប់លោក ជា វិជ្ជា? សេចក្តីថ្លែងការណ៍របស់គណបក្សសង្គ្រោះជាតិ ចាត់ទុកថា ការឃុំខ្លួនជនជាប់ចោទទាំងពីរ គឺជាការរំលោភសិទិ្ធមនុស្សដ៏ធ្ងន់ធ្ងរ ហើយប្រព័ន្ធយុត្តិធម៌នៅកម្ពុជាកាន់តែមានភាពខ្មៅងងឹតទៀត។
គណបក្សសង្គ្រោះជាតិ បញ្ជាក់ម្តងទៀតពីជំហររបស់ខ្លួនឲ្យមានការធ្វើកំណែទម្រង់ស្ថាប័នរដ្ឋ ជាពិសេសកំណែទម្រង់ប្រព័ន្ធតុលាការ។
VOD មិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ និងស្នងការនគរបាលរាជធានីភ្នំពេញ លោក ជួន សុវណ្ណ បាននៅទ្បើយទេ៕
No comments:
Post a Comment
yes