រូបថតដោយ លោក ញឹម សុខន
អង្គការជាង៤០ នៅថ្ងៃសុក្រនេះ រកឃើញថា ប្រព័ន្ធផ្សព្វផ្សាយជាពិសេស ទូរទស្សន៍ និងវិទ្យុ មានភាពលម្អៀងខ្លាំងបំផុតទៅកាន់គណបក្សប្រជាជនកម្ពុជា និងបានបំពេញតួនាទីមួយមួយកាន់តែអាក្រក់ទៅ សម្រាប់ការបោះឆ្នោតនៅកម្ពុជា។
ក្នុងសន្និសីទសារព័ត៌មានស្តីពីដំណើរនៃការបោះឆ្នោត បន្ទប់ស្ថានការណ៍ថ្ងៃបោះឆ្នោតឆ្នាំ២០១៣ ដែល មានអង្គការជាង៤០ លើកឡើងថា ទូរទស្សន៍ និងវិទ្យុ មានភាពលម្អៀងបំផុត ទៅរកគណបក្សកាន់អំណាច នៅមុន និងក្រោយការបោះឆ្នោត ដោយបានផ្សព្វផ្សាយពីគណបក្សប្រជាជនកម្ពុជាជាច្រើន បើប្រៀបធៀបនឹងអាណ្ណត្តិមុនៗ។ អង្គការទាំងនេះ ជំរុញឲ្យមានកំណែទម្រង់ប្រព័ន្ធផ្សព្វផ្សាយគោរពតាមគោលការណ៍សមធម៌ និងមានភាពសេរី ដើម្បីឲ្យការបោះឆ្នោតក្រោយៗទៀត មានភាពសេរី និងយុត្តិធម៌។
តែបន្ទប់ស្ថានការណ៍ថ្ងៃបោះឆ្នោតឆ្នាំ២០១៣ លើកឡើងថា មានតែទូរទស្សន៍មួយទេ គឺទូរទស្សន៍ជាតិកម្ពុជា ដែលបានគោរពតាមគោលការណ៍របស់គជប។
កន្លងមក ប្រជាពលរដ្ឋ និងសង្គមស៊ីវិល បានរិះគន់ថា ទូរទស្សន៍ក្នុងស្រុកមួយចំនួនធំថា ផ្សាយព័ត៌មានមិនមានតុល្យភាព និងមាននិន្នាការទៅរកគណបក្សកាន់អំណាច។ តែទូរទស្សន៍ទាំងអស់នោះ លើកឡើងថា គេមានគោលការណ៍ផ្ទាល់ខ្លួនក្នុងការផ្សព្វផ្សាយ។ពលរដ្ឋ បានរិះគន់យ៉ាងខ្លាំងទៅលើអ្នកអត្ថាធិប្បាយតាមទូរទស្សន៍មួយចំនួន ដូចជាទូរទស្សន៍ស៊ីអ៊ិនស៊ី និងទូរទស្សន៍បាយ័នជាដើម ដែលធ្វើឲ្យគេ លែងចង់មើលទូរទស្សន៍ទាំងនោះទៀត។
កាលពីពេល លោក សម រង្ស៊ី ត្រឡប់មកពីប្រទេសបារាំងវិញ មិនមានទូរទស្សន៍ក្នុងស្រុកណា ហ៊ានផ្សព្វផ្សាយពីការវិលមកដល់នោះទេ។ ទូរទស្សន៍ទាំងនោះ លើកឡើងថា គេមានកាលវិភាគនៃការផ្សព្វផ្សាយ។
សម្រាប់មហាបាតុកម្មរបស់គណបក្សសង្គ្រោះជាតិ នៅថ្ងៃទី០៧ខែកញ្ញានេះស្ថានីយ៍ទូរទស្សន៍ក្នុងស្រុកមួយចំនួន បង្ហាញជំហរថា ពួកគេនឹងឲ្យសហការីចុះទៅយកព័ត៌មានទាក់ទងនឹងការធ្វើមហាបាតុកម្ម អហិង្សារបស់គណបក្សសង្គ្រោះជាតិ នៅថ្ងៃទី០៧ ខែកញ្ញានេះ ប៉ុន្តែមិនប្រាកដថា នឹងចាក់ផ្សាយឡើយ។
អគ្គនាយកទូរទស្សន៍ជាតិកម្ពុជា កឹម គុណវឌ្ឍន៍ ប្រាប់VOD កាលពីថ្ងៃព្រហស្បតិ៍ថា លោកនឹងបញ្ជួនសហការីលោក ឲ្យតាមដានព្រឹត្តិការណ៍នៃមហាបាតុកម្មនោះ តែលោកមិនប្រាកដថានឹងផ្សាយទេ ៖ “រឿងទៅថតដឹងតែមាន សកម្មភាពទៅថត ប៉ុន្តែរឿងផ្សាយជាកិច្ចការមួយ មានភារៈមួយផ្សេងទៀត អ្វីដែលកើតឡើងនៅពេលដែលចប់ ទើបយើងដឹងថាតើវាត្រូវដំណើររបៀបណា យើងមិនអាចទស្សន៍ទាយ ដំណើរការជាមុខបានទេ ព្រោះរឿងរ៉ាវវាមិនទាន់កើតឡើង”៕
ប្រភពពី VOD
No comments:
Post a Comment
yes